Visit Aragona - Sicilia

29/10/2023

"Di jiornu nun ni vogliu e la sira spardu l'ogliu. Ciccu era lagnusu e chinu di disgrazii ma avia lu cori granni. Dava tantu prima di arriciviri e paroli ditti avia sempri. Li guai di la pignata li sapi la cucchiara ca l'arrimina. Cu d'antru voli di lu sò ava a sapiri dari e drocu cadi la scecca e vonta lu rrinali. Stancu pariva Ciccu di sentiri e ascuntari tutta sta genti, cu dri quattru craculi lu vittiru jirisinni luntanu pi sempri. Ciccu semu tutti nantri ca paroli ni sintemu tanti, vinni lu tempu di la ragiuni ca metti scantu a lu servu e puru a lu patruni. Sà benedica a tutti. Chissu liggivu e chissu vi scrissi di Ràona".

18/09/2023

"Nun c'è ziti senza sciarri e morti senza calunnia. Chissu ci diciva Peppi a so cuscinu Ciccu ca faciva sempri lu cretinu, iddru lu taliava e si vuntava dannuci di lu schinu a ghiri appinninu. Lu senzu ci voli nesciri a sti quattru sperti ca si stannu vinnennu la scecca cu la sacchina e puru li vertuli. Cu di manca e cu di dritta vinnuta la scecca ognunu s'ammutta la propria carretta. A sti quattru cristiani bboni cumminti ci restanu sulu dri quattru castagni, finu a quannu nun c'arrivanu iddri e ci li scangianu pi allappusi cutugni. Mi veni di cantari comu mi 'n para me nannu, cantati cu mmia ca ni passa lu tempu. - Zi Giuvanni culu di canni ca ietta pirita e fa castagni. - Chissu mi ricordu e chissu vi cuntu di Ràona"

17/09/2023

"Aghiorna e scura e cunta un jiornu sia pi ccu parti sia pi ccu ni stu tempu nun fa ritornu. Lu tempu avi tanti difetti, circamu di nun pinsarici ma tornanu sempri anchi si l'ammucci o li ietti. Pinsannuci stu tempu nun'è di nuddru, c'è cu pensa di sapiri ma sbaglia di bruttu. Ricurdari putemu cu l'occhi mezzi chiusi pi ristari suli e in silenziu cu la propria menti e dru tecchi di lustru ca trasi. Ristari suli cu la propria memoria ca è l'unica cosa ca cu parti e resta si trova. Memoria ca resta, picchì lu cori batti e sarba sempri lu veru bbeni di cu nun torna ni stu tempu ca veni. Chissu vi cuntu di Ràona"

12/09/2023

"Nun c'è mai nuddru pedi pedi sentu lamintari. Taliativi 'ntunnu ma nun lu diciti ca lu pisci feti di la testa e nò di li pedi. Campana ca nun senti a primu sonu voli diri ca dru sonu nun ci piaci. Semu a Ràona e nun semu cchiù tanti ma pi dari cunsigliu vastamu, tantu ca sapemu dari puru sbagliu. Ma vuliri beni è cosa magnu speciali e facemu prima a ni sparlari lestu comu si cuntassimu dinari. Ogni munnu e paisi e nun mi resta ca diri ca jiu vi lu dissi comu sta ghiennu a finiri. Chissu mi cuntaru e chissu vi cuntu di Ràona".

11/09/2023

"Cu nun sapi passa pi fissa e cu sapi soffri pi la so scuntitizza. Nun c'è cristianu felici si nun si sapi gurdari la so robba e chiddru ca la so vucca dici. Ogni forti focu torna cinniri e di li scorci si fa nutrimentu pi fiura di maggiu e rosi pi li nnamurati. Nì resta picca senza amuri, resta nenti senza rispettu, suli si nasci e suli si mori senza lu vulirisi beni. Ora ca di li Santi sta genti si scorda si torna a fari finta di nenti, aspittannu c'arriva la raggia e dra confusioni ca sparti dulura e dinari. Chissu mi cuntaru e chissu vi cuntu di Ràona".

05/09/2023

"Si vuliti passari pi fissa criditi sempri a chiddru ca vi dicinu. Battagliuna a cogliri e figli fimmini schetti a maritari nun ponnu aspittari. Sciaveriu era lu masculu granni e li soru stavanu nirvusi comu vespi lagnusi aspittannu maritu cu vuluntà di travagliari e facci pulita. Megliu picca godiri ca assai trimuliari ci diciva so matri. Finiva sempri pi diri ca lu Signuri duna biscotti a cu nun avi li denti. Schetta nun voli diri nenti ma pi dri tempi era comu na cunnana. Tempi ca vannu e tempi ca vennu, stamu tutti a taliari mentri c'è cu ancora aspetta. Chissu mi cuntaru e chissu vi cuntu di Ràona".

03/09/2023

"Frisca frisca è sta storia. Quannu lu senzu nun camina li vrazza stancanu. Vidu cu fa finta di cumannari dari ordini e livari tempu a la so furtuna e babbiari cu chiddra d'antri. Mastru Saru diciva sempri ca lu sceccu ni pensa una una e lu sò patruni centu pi nun farisi acchianari di 'n coddru. Ma a Ràona è usanza ca picca sunnu li testi ca pensanu e tanti li scecchi ca arraglianu. Ma quannu la furtuna nun ti dici, calati 'n terra e cogli babbaluci. Aspeittamu ca si metti a chioviri allura. Chissu mi cuntaru e chissu vi cuntu di Ràona".

31/08/2023

"Megliu scrusciu di catini ca sonu di campani ci diciva Ciccu a so cumpari Peppi. Peppi arrispunniva ca scusciu di carta assai e cubaita quasi nenti. Chiacchiari facivanu mentri accumpagnavanu pinseri e dulura cu vinu 'n tribulatu e olivi scacciati. Chi ni resta diciva Peppi, ci pariva ca parlava sulu, Ciccu runculiava stancu di dra jiurnata di colari. Chissu mi cuntaru e chissu vi cuntu di Ràona".

30/08/2023

"Truvavu na littra abbannunata a la pruvvidenza. Truvavu sciatu e lacrimi di un'amuri passatu. L'amuri passa comu ogni antra calunia pì sentisi vivu e forti. Dopu l'amuri si pensa a campari e nun si pò nun pinsari a la morti. Scurusu lu tempu, si sintiva tuttu dru pisi di dra muntagna e quantu comu a'mmia si ricordanu e quanti antri lu cuntanu. Eramu chiddri a lu scuru di lu munnu, e a lu lustru di ddra citalena stanca, ca ni dava dra tecchia di luci e spiranza. Chissu mi cuntaru e chissu vi cuntu di Ràona".

29/08/2023

24/08/2023

"Si ungeru un minchiuni e un'omu ranni. Colari si piglia cu voli cangiari tuttu o nenti. Cuntenti nun c'è nuddru di sti tempi, cu la voli cotta e cu la disia cruda. C'è cu s'affaccia ni sta strata, a lu Giacatu e vidi comu lu tempu si carrià craculi, tavuli e trispa e tuttu dru piaciri di stari a nun fari nenti ma tutti 'n zemmula felici e cuntenti. Na cunnanna pi nun aviri fattu nenti e forsi nenti era troppu o nenti ma cu ci arraggiuna cu sta ggenti. Chissu mi cuntaru e chissu vi cuntu di Ràona".

23/08/2023

"L'acqua ntr'augustu arricria ogliu e mustu. L'anticu si sbaglia sulu quannu nun sapi quannu finisci l'aria netta e 'n cumincia a truniari. Lampi e trona cunfunninu cu aspetta lu bellu tempu senza truvari riparu. Nipù, di tutti li cunti, chissu è chiddru menu giuiusu. A Ràona magnu eranu chiddri sbirsati ca ni la bella stasciuni cantavanu e a la 'mmirnata abballavanu, di lu friddu. Comu diciva Pina di Caluzzu: a lu jiornu nun nnì vogliu e la notti spardu l'ogliu. Chissu mi cuntaru e chissu vi cuntu di Ràona".

22/08/2023

"Ogni forti focu torna cinniri. Ogni cuscenza cu lu pirdonu si lava e torna comu nova. Ogni casa comu ogni cantunera si porta 'n coddru dulura e pinsera, picchì sapemu chi semu e sapenu chi era ca ni faciva spirari ni sta longa storia. La vita scurri e ogni cosa si fa beddra o tinta ma di sicuru c'è sulu ca passa tuttu pi la memoria. Finu a quannu c'è cu la cunta nun si perdi comu persiru lu rispettu chissa genti ca ora voli diri e 'nsignari senza sapiri ne tantu menu fari. Chissu mi cuntaru e chissu vi cuntu di Ràona".

21/08/2023

"La lingua unn'avi ossa ma rumpi l'ossa. Tantu và la quartara all'acqua ca o si rumpi o si fiacca. A lì me tempi nun si facivanu tanti dumanni, cu sapiva sapiva e cu nun sapiva ristava ad ascuntari. Ora tuttu stu parlari cunfunni vrazza e gammi e ni stamu tutti fermi. Ma Ràona è comu na fimmina schetta ca avi pacienzia e aspetta. Ma comu dra fimmina c'aspetta la vicchiaia s'apprisenta e addiventa menu taliata pi dra peddri ca si fa cu lu tempu sempri cchiù arrappata. Chissu mi cuntaru e chissu vi cuntu di Ràona".

20/08/2023

"Cu ricorda e cu scappa davanti a la memoria di sti tempi passati. Cu piccava di bbona cunnutta avia la via cu curta, cu pinsava cu mala cuscenza putiva aviri furtuna, grana e canuscenza. Ma a tempu di fami c'è fami e nun senti di vuliri sapiri comu lu chiamanu a lu continenti lu varrili. Lu Rusariu a dri tempi nun era un monumentu, na chiazza o un chianu ma era un locu unni li cristiani eranu a purtata di manu. Ora cu sti beddri mascari 'n cipriati circamu saluti e grana picchi avemu tutti cu la facci e cu li cori malati. Chissu mi cuntaru e chissu vi cuntu di Ràona".

19/08/2023

"Chi eranu beddri dri vesti cu li merletti e sti casi cu sti mura ormai vecchi. Arriccamati e lassati suli all'acqua e a dru tempu ca cunsuma a tutti cu la stessa forza. Ràona nipù ascunta ca mi si inchi lu cori di cuntintizza, Ràona è chissa ca vidi e chiddru picca di veru ca ti cuntanu. Ascunta e pensa ca cu ti voli beni pi farisi strata prima o poi t'accatta e ti posa comu sti mura e sti dulura ca mi fannu cumpagnia ni sta vicchiaia. Nipù arricordati ca cu pensa sbaglia e cu fa è a rischiu di sbagliari ma ci resta dru piaciri di aviri fattu e di putiri fari. Chissu mi cuntaru e chissu vi cuntu di Ràona".

09/08/2023

"Stenni lu pedi finu a quannu lu linzolu teni. Lu tempu piglialu sempri comu veni. Vicenzu u nicu canusciutu comu 'nZuli era tistardu e cu li mani grossi. Ci piciacivanu li bifari e li piruna e quannu arrivava nun cinnì lassava una. Ma lu fattu assai stranu era ca parlava bbonu l'italianu. La curpa è di lu continenti dicivanu tutti o dra so matri ca li studiava tutti. Scappari di stu paisi vuliva Margherita, l'avveniri stà ni la littra ci diciva so nanna e iddra criscennu capiva dra cunnanna. Setti sarmi di turrenu tinivanu lu maritu attaccatu comu na mula ni drà mangiatura e dra testa ci faciva diri ca era persa la spiranza e la virsura. Ora nuddru ci po diri cchiù cosa, ora nuddri po diri cchiù cosa. Chissu mi cuntaru e chissu vi cuntu di Ràona".

05/08/2023

"Quantu durà la nostra amicizia, di la Matrici finu a la Grazia. Ora vi cuntu di chiddra vota ca a Caloriu ci scappa la rota. A carriari eranu tanti ma Caloriu lu faciva già magnu anni. Viaggiu dopu viaggiu lu dannu s'aspetta ma perdiri na rota è cosa assai br**ta. Di tutti chiddri presenti nuddru faciva nenti, picchì di lu forti arridiri si sintivanu li panzi lenti. Pari scimiata ma è verità chiddra ca vi cuntu, addumannati a Affonziu 'ntisu lu turcu, iddru era chiddru c'arridiva cchiù forti picchi accumpagnatu sempri di la bbona sorti. Chiddru ca successi nun è tantu gravi ma pi dri tempi era comu na na botta di sali. Caloriu ancora aspetta, aspetta ma dra rota sula di certu nun s'arrizzetta. Chissu mi cuntaru e chissu vi cuntu di Ràona".

04/08/2023

"Cu di moganu e cu di nuci ognunu avi la so cruci. Ora ti cuntu di chiddra vota ca ci futteru li pumadoru a Fofa. Carusazzi dicivanu a lu chianu pititti ma di picciotti granni diciva Fofa ca si parlava a li Grutti. Comu cantava zi Peppi Rè, c'è un pupu un cavaddru e un Rè, ti piciu ca ti lu cuntu arrè? Nun mi faciti straviari ca di dri pumadoru vi vogliu parlari. Dopu li pira e puru li ficu di pumadoru cuntava 'NRicu. Pari ca Fofa assai si fidava e di la so robba picca si guardava. Si cridiva comu certi ca ristaru futtuti pi fari li sperti. Vuliti sapiri cu si piglia li pumadoru? Cu l'avia chiantatu cu tantu disiu, Fofa ca si sintiva arrubbata era la prima latra. Chissa la cruci ca si purtava 'n coddru, lu mali so era la so spirtizza ca ci faciva perdiri la facci e puru la so grazia. Chissu mi cuntaru e chissu vi cuntu di Ràona".

03/08/2023

"Di tutti dri cristiani ca taliavanu nuddru avia la facci pulita. Ricordu ca si la mangiavanu cu l'occhi a Tresa. L'amuri era vistu cu suspettu, cuntava lu rizzettu. Cuntava chiddru ca s'avia e non chiddru ca si sintiva. Lu cori era a suggettu di lu pitittu. Beddra nunn'era ma mancu br**ta e li vicini la squatravanu tutta. Stava assittata ni dra scalunata cu dra vesta a fiuri curta e malucuminata. Gioventù ca è forti a passari cu sti stoliti cafitteri. Chiddru ca faciva parlari era la raggia ca cu lu passari di lu tempu si fa sarbaggia. Tresa ristà schetta e felici e finu all'ultimu cu ristà la taliava picchì passannu lu tempu veru beddra si fici. Chissu mi cuntaru e chissu vi cuntu di Ràona."

02/08/2023

"Si sintiva sbattiri e ammulari, corpu dopu corpu e botta dopu botta, trimavanu dri quattru bicchiera pusati ni dra cristallera. Mastru finu è troppu ma mancu scarsu era Fifu. Sapiva fari sunari dri craculi comu si fussiru trummi e di lu rumuri stunatu parivanu bummi. Ognunu la cunta a lu so versu, era nicu e ni capiva picca e ora di granni ci sentu ancora cchiù picca, ma di dri botti mi ricordu ancora comu si fussi ieri. Si capiva la raggia e lu duluri, li lacrimi di lu so cori. Sapiddru si Fifu arrivà a ci capiri qualcosa, rumuri e sbattiri faciva, finu a quannu lu munnu ci livà la so poesia. Chissu mi cuntaru e chissu vi cuntu di Ràona".

30/07/2023

Sabato 29 e domenica 30 luglio, ritorna la NOTTE DELL'ARTE. Dalle 21 alle 24 visite guidate gratuite nelle chiese del Rosario, della Matrice e della Provvidenza, dei musei della cripta e della chiesa Madre. Nella chiesa del Rosario verranno esposte tutte le statue della Settimana Santa Aragonese compresi i Santi Pietro e Paolo. In chiesa Madre durante la visita verranno eseguiti brani con l'organo a canne restaurato. Alla Provvidenza ci sarà una mostra sulla pietà popolare. Nel Teatro Armonia si potrà vedere la mostra sulle miniere. Infine in via Bellini si potrà ammirare la rappresentazione del quartiere della Mercede.

30/07/2023

"Quannu chiovi arriversa la stasciuni è persa. Criditi di sapiri tuttu di l'amuri e nun sapiti chiddru ca lu cori sapi si è veramenti giustu. Cuncetta aspittava darrè a dra finestra, Carminu ammucciatu la taliava, darrè a dra rocca mezza trasuta e mezza di fora. L'amuri avi milli e cchiù combinazioni, comu lu tempu ca si servi di lu rroggiu pi si dari ragiuni. Cuncetta ni dru silenziu si sintiva lu cori battiri forti, Carminu pi lu scantu si cridiva di sentiri vicina la morti. Ma l'amuri è chissu e nenti, si ci pinsamu a quantu dannu facemu stannu fermi, aspittannu li giusti mumenti, a li voti picca e a li voti nenti. Cuncetta e Carminu pigliaru la strata ca ci aiutaru a pigliari li matri e li patri pi vidili assistimati. L'amuri vi stati addumannannu, ristà sulu ad aspittari a li prossimi cu lu curaggiu di si amari. Chissu mi cuntaru e chissu vi cuntu di Ràona".

28/07/2023

Venerdì 28 luglio 2023
Questa sera alle ore 21.00
In Piazza MERCEDE

28/07/2023

"Li cristiani sunnu tantu bravi cu li morti e tantu a lu stessu tinti cu li vivi. La morti avi na furtuna, piglia e scappa e nun supporta comu la vita di essiri travagliata, suffruta. Micheli si scantava e si tiniva stritti li sò ultimi anni. Caminava adasciu pi nun spardari li forzi ma nun sapiva ca la vita è una sorti. Affonziu canusciutu comu briganti pi l'usanza di essiri arroganti, si tiniva stritta la buttiglia di vinu e cu na para di bicchiera ogni muntata ci pariva pinninu. Antunietta avia ristatu schetta e sunnava di stari assittata comu ni dri giornala, cu na bella falletta o una vesta stritta davanti a dra tazza cu ni li mani na sigaretta. Ora nipù ascunta e taci ca ogni cori cerca paci. Bbonu ca stancavu di tantu ricurdari, lu tempu arrobba la vita e l'avveniri. Chissu mi cuntaru e chissu vi cuntu di Ràona".

27/07/2023

"Buon tempu e malu tempu nun dura pi tuttu lu tempu. Agata avia sempri lu stessu scantu, Ciccu amuri di la so vita avia tanti disgrazii e una sula furtuna. Era addruvatu ni lu Cavaleri e a quantu cuntanu si stava 'm parannu lu misteri. La sira turnannu a la casa si mantiniva muru muru picchi era stancu comu dru mulu di mastru Ninu, ca scangiava lu scifu cu lu fiascu di vinu. Forsi lu scantu di Agata era veru picchì cu è 'm briacu nun talia chiaru e po scangiari ragiuni pi tortu e rijiri li manu a la bbona sorti. Agata spissu ni li matinati tiniva li vrazza cummigliati, la facci calata taliannu 'n terra, lu pirchì lu sapi iddra. Tempi ca mi vulissi scurdati, picchì li mani li rijinu l'armari, comu ieri e comu oggi. Chissu mi cuntaru e chissu vi cuntu di Ràona".

26/07/2023

"Ciccu toccami, maaa! Ciccu mi tocca. Chi bellu passatempu ca si truvà Filippu cu dra calunia ca è cchiù nicareddru. Ciccu lu tocca e scippa e Filippu carria finu a quannu la stanchizza s'arrenni e li vertuli a mala abbanna appenni. La vicchiaia arriva sempri ni lu mumentu sbagliatu, mentri nun ci pinsamu e arridennu stamu facennu li cunti cu dri tempi passati. Lu tempu aspetta e nun pirduna ne santi omini e mancu na fimmina scetta a dijunu. Chiddru ca ti vogliu fari capiri nipù è ca ni sintemu di nichi granni e di vecchi picciliddri. Guardati di lu tempu ca iddru alla fini è lu sulu ca ti talia. Chissu mi cuntaru e chissu vi cuntu di Ràona".

25/07/2023

"Chiamavu l'orbu pi darimu aiutu, grapiu l'occhi e mi fici scantari. Mastru scarparu scanzu e fimmini santi finu a quannu nun leva lu ventu e scummoglia l'antareddri. Ninu canusciutu comu chiavuni avia un dammusu ca putiva vastari pi diciottu cristiani. Tecchia di vinu sinceru e cacocciuli affumati e passavanu cuntenti dri sirati. Cu assittatu e cu alladritta si gudivanu la vuci beddra di dra fimmina schetta. Nun tantu pi la vuci stavanu l'omini ma pi vidiri si putivanu arrubbarici dru fiavuru di libertà ca si purtava 'n coddru Tresa. Cu arridennu e cu facennu li facci strani e cu ammucciatu si sintiva parlari, forza Tresa ca trasi, forza Tresa ca trasi. Vastasi arrispunniva Rosa, lu cinniri di dri cacocciuli s'ammiscava a dru vinu e arrivava subitu lu matinu. Chissu mi cuntaru e chissu vi cuntu di Ràona".

24/07/2023

"Cu lassa la strata vecchia pi la nova sapi chi lassa e nun sapi chi trova. Nun sapiri è comu nun vidiri e nun vuliri vidiri è comu nun vuliri capiri. Angilinu aspittava sempri lu prossimu tempu e nostramentri si faciva cchiu vecchiu. So frati Carminu aviva la scarpa grossa e pi lu viddranu voli diri tantu e nenti. Nun mi fari diri cosi ca nun vogliu ca poi di na mezza cosa ci cunzati na grossa 'n salata. A Ràona tutti sunnu chiddri ca sunnu e nuddru voli essisi chiddu ca è, vonnu tutti arrinesciri comu arrinisciva Ninu a 'm baiari n'aratru di cani e aspittari di putiri lavurari. Chissu mi cuntaru e chissu vi cuntu di Ràona".

23/07/2023

"Carminu avia un piciniu ni dra testa grossa e senza capiddri. Avia na figlia maritata ca era senza figli, chiddra schetta ca s'ammucciava dra panziceddra. Lu senzu ci vuliva nesciri di fora ma nun c'era tantu di capiri. Chiddra maritata taliava e chiddra schetta prestu annacava. So cumpari Ciccu 'n tisu Gaddrazzu ci cuntava sempri lu stessu fattu. Cumpà nun vi angustiati, nun cunta comu e cu simina ma cu arricogli e ni fa grazia. Carminu ci pinsava e si mittiva dra testa tecchia a lu quietu nun dannu cuntu a la genti di lu paisi ma a lu so cori granni. Chissu vi pò pariri un fattu stranu ma nipù a li me tempi lu pinsari era picca e jiuculanu. Facivanu finta di fari attenzioni ma poi si era cchiù straviati di ddra canzuni, ca ci canusci sulu picca paroli e lu restu lu canti a zonzu comu stu munnu ca gira pi lu so versu e nantri anchi vulennu nun ci putemu fari chiossà di tantu. Chissu mi cuntaru e chissu vi cuntu di Ràona".