05/11/2024
ATONZU
Sos buscos paren de oro
E s’ispozana a bellu e senza sonu.
Hat sa terra onzi donu
A sos omines dadu a bonu coro.
De un’atera edade
Paret su mundu in chirca, desoladu.
Su passadu est passadu
Cun donzia sua grazia e buntade.
Sos pastores pastura
Bandan’a terra istranza a si chircare,
Sos montes pro su mare
Lassana a malu coro cun tristura.
Su pane su massagiu
Preparat cun coraggiu e cun fatiga
E pensand’in s’ispiga
In sas tebias àeras de magiu.
In custu morrer serenu
De sa natura in fruttos imbezzada,
De una noa annada
S’omine chircat, d’animu pienu
Cuddos fruttos novellos,
Cudda fortuna de sa sua vida;
E tenet pro guida
Sos isperios suos pius bellos.
E g*i cando moridi
De sa terra sa forza e i su fruttu,
In mesu a tanti luttu
De s’omine cudd’opera fióridi.
- MONTANARU -
Antioco Giuseppe Casula (Dèsulu)
