老hike都移民

14/01/2025

沖繩旅遊 – 賞櫻2025

一年一度嘅沖繩賞櫻活動終於喺2025/01/05由那霸開出嘅第一個櫻花開始，今年櫻花比上年早咗8日開。同往年一樣，喺各區嘅都會舉行唔同嘅櫻花祭，所以今年都會分享返有咩賞櫻好地方

PS. 想了解賞櫻、夜櫻、櫻花祭? 請睇返 賞櫻2024
https://rentkuruma.blogspot.com/2023/12/blog-post_16.html

今歸仁城跡
今歸仁櫻花祭將於2025/01/25 ~ 2025/02/02喺今歸仁村內今歸仁村城跡舉行。
開放時間係每日08:00 ~ 21:00 最後入場時間係20:30。
留意返係要收取入場費

八重岳櫻之林公園
八重岳櫻花祭將於2025/01/18 ~ 2025/02/02 喺本部町內櫻之林公園舉行。
因為唔駛入場費，所以係全日開放。
值得一提係，喺八重岳櫻之林公園內，係有機會望到座頭鯨！所以賞櫻同時，記住留意海面情況。

名護中央公園
名護櫻花祭將於 2025/01/25 ~ 2025/01/26喺名護市內名護中央公園舉行。
入場時間係11:00 ~ 21:00。
畢時會有封路措施，恭請留意。

漫湖公園
那霸美麗櫻花祭將於那霸市內漫湖公園中央噴水廣場舉行。
實際時間尚待公報。

八重瀨公園
八重瀨櫻花祭將於2025/01/20 ~ 2025/02/02 喺八重瀨公園舉行。
開放時間係每日08:00 ~ 21:000

再次提一提大家，去欣賞櫻花時，記住:

請勿折枝
請勿醉酒駕駛
請將車輛泊到適當位置
自己垃圾自己帶走
自駕要搵O.Rent租車
做個有質素嘅旅客，咁先可以受當地人尊重

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人




http://rentkuruma.blogspot.com/2025/01/2025.html

一年一度嘅沖繩賞櫻活動終於喺2025/01/05由那霸開出嘅第一個櫻花開始，今年櫻花比上年早咗8日開。同往年一樣，喺各區嘅都會舉行唔同嘅櫻花祭，所以今年都會分享返有咩賞櫻好地方 PS. 想了解賞櫻、夜櫻、櫻花祭? 請睇返 賞.....

02/01/2025

あけおめ🍾
Happy New Year🍾
因為1/1由07:00已經要工作，一直到夜晚
所以遲咗同大家講新年快樂
祝大家2025，月月有旅行、日日都去玩
2025沖繩見喇 🎉

30/12/2024

沖繩分享 – 天氣

去旅行最擔心係撞正打風落雨時間，尤其係沖繩依類打風落雨多嘅地方。所以出發前一定會不停留意住天氣報告，求神拜佛要有好天氣。所以今次會分享沖繩天氣通常係點。

先要了解沖繩地形先。
沖繩本島如果由最南嘅喜屋武岬計起，去到最北嘅邊戶岬直線距離長103km，即係由香港尖沙咀碼頭計起，去到佛山嘅直線長度。如果計台灣，就大概係基隆到花蓮的大小。

喺依個Size之下，南北部天氣好難統一，會經常性出現北部大雨水浸、南部陽光普照等極端情況。

其次沖繩四面環海，高山唔多，本島最高嘅與那霸岳先得503米，高樓大廈又唔多，所以導致沖繩相當大風，亦因為咁，沖繩天氣係變得極快，隨時上晝打風，下晝出太陽，所以會有「沖繩人落雨都唔用傘」甚至話「沖繩人屋企唔會有傘」依個講法。

一般而言，沖繩基本上每日都會落雨，尤其是零晨時份，但落嘅只係毛毛雨同好快完，除咗梅雨季或受颱風影響，甚少會出現豪雨或落全日。

除咗落雨之外，大家最擔心一定係颱風。每年大概會有25個左右颱風生成，而其中有7個左右會經過沖繩，但其實經過沖繩係指宮古島、石桓島、八重山群島等一帶，本島受影響嘅機會並唔多，所以唔駛太擔心。

另一個天災係地震，因為香港係一個無地震嘅地方，所以一聽到地震就會好緊張，但其實沖繩本島一年震最少廿次，但因為每次都係得一二級震度，近三年都只係錄得一次三級震度，所以喺沖繩係幾乎感受唔到有地震發生過。

亦因為沖繩本島地震規模弱，所以海嘯發生率亦唔高，相反近台灣嘅宮古、石桓等地區會比較大機會發生。

至於溫度方面，沖繩嘅冬天係非常之短，只有12-2月三個月時間，就算係冬天，平均最低氣溫都唔低於15°C，最凍都係得10°C。但因為日照強烈，導致日夜溫差好大，所以建議洋蔥式穿法。

相反夏季時間係非常之長，由6月梅雨季結束後起，到10月底都依然炎熱，不過因為受海風影響，所以平均溫度都唔會超過30°C，但都係因為日照強烈，喺中午可隨時可以錄得35°C高溫，所以防曬用品係好重要。

總括黎講，沖繩係一個成日落雨，日夜溫差大嘅地方，但其實颱風侵襲本島機率並唔大，平時睇到新聞話沖繩又打風、又海嘯通常都係指石桓、宮古島等一帶。就算真係本島打風、海嘯，都不過係幾個鐘或一日嘅影響（除咗23年卡努），只要準備好plan B，買好旅遊保，風季都冇乜好怕。

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人

去旅行最擔心係撞正打風落雨時間，尤其係沖繩依類打風落雨多嘅地方。所以出發前一定會不停留意住天氣報告，求神拜佛要有好天氣。所以今次會分享沖繩天氣通常係點。 先要了解沖繩地形先。 沖繩本島如果由最南嘅喜屋武....

25/12/2024

Merry Christmas!!
每年聖誕節，聖誕老人都會坐住R3DNO53 (REDNOSE) 航班去世界各地派禮物，唔知大家收唔收到聖誕禮物呢？

21/12/2024

本來想挑戰一缸油行唔行到1,000km
行咗705km 預計仲可以行多260km
喺依個時候！就要交車俾客🥹🥹
我覺得可以過到千，下次再試！

20/12/2024

日本food court食完野，係要自己執返啲餐盤返去的，麻煩唔好失禮香港人

ps. 枱面包維他奶，肯定係香港人喇呱？

18/12/2024

沖繩分享 - 跨年活動2025

跨年，對於香港、台灣黎講就係出門狂歎慶祝嘅日子，但對日本人黎講，誇年係一個相對平靜嘅日子。

傳統上，日本人喺除夕日（日文：大晦日）當晚， 約埋親朋戚友聚喺屋企，煮吓蕎麥麵、食住年糕、熱住清酒，一齊喺屋企睇紅白大賽 (以前仲有絕對不能笑系列)。亦有部份人會去參加寺院、神社嘅跨年祁福法會，聽住象徵人生108種煩惱嘅除夕鐘聲迎接新嘅一年。

沖繩亦唔例外，所以跨年活動真係唔多，以下分享一下店長所知嘅

兒童王國
位於中部嘅兒童王國，係県內相當有名嘅動物園。喺12月下旬開始已經舉行緊晚上燈光show，喺除夕當晚，除咗有倒數活動外，兒童王國內更有多個活動，如歌舞表演、煙花表演、甚至有喪屍及恐龍出沒。不過留意返，兒童王國31號不設現場購票，所以要參加就要預先購票

詳情: https://www.xmas-fantasy.com/

ANA Interco Manza beach resort
位於恩納嘅ANA Interco Manza beach resort，喺除夕當晚都有舉行跨年倒數活動，畢時會有三線、和太鼓等表演，喺倒數後更會有煙花表演。最正嘅係，活動係免費參加！但如果要泊車就收¥4,000/架

詳情: https://www.anaintercontinental-manza.jp/offers/detail/?id=213

美國村
至於美國村呢，就官方網頁冇表明除夕當晚會有活動，連煙花都只係話24、25、26、28會有，不過美國村始終係不夜城，相信各界店舖都會有自發活動，BTW 如果真係要去美國村跨年，就要留意佢哋停車場開放時間，因為除夕當日全部停車場都會提早關閉，為免玩完冇車離開，所以要留意交通情況。

詳情: https://www.okinawa-americanvillage.com/info20231226/

國際通
最後國際通，作為沖繩地標，雖然官方無公佈有跨年活動。但一眾商舗都會喺除夕當晚延長營業時間，更加會有期間限定嘅街頭美食，同沖繩傳統嘅舞蹈表演，如果住附近就唔可以錯過。

日本真係唔多跨年活動嘅地方。相比跨年，日本人更加會重視一月一號嘅初詣。

初詣，即係新年（一般指1~3號期間)第一次去神社參拜嘅活動，畢時神社附近都會開滿攤檔，撈金魚、射汽球、掟飛鏢等唔少得，仲會有串燒、炒麵、章魚丸等美食。
如果喺沖繩跨年，不妨1/1去沖宮、波上宮等神社體驗一下日本人嘅新年。

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人




http://rentkuruma.blogspot.com/2024/12/2025.html

跨年，對於香港、台灣黎講就係出門狂歎慶祝嘅日子，但對日本人黎講，誇年係一個相對平靜嘅日子。 傳統上，日本人喺除夕日（日文：大晦日）當晚， 約埋親朋戚友聚喺屋企，煮吓蕎麥麵、食住年糕、熱住清酒，一齊喺屋企....

14/12/2024

最近天氣開始凍，沖繩啲貓貓可能會喺車底過夜
所以大家開車前，記得望一望車底，拍一拍車身通知佢哋一聲🤗🤗

#可以不愛但請不要傷害

11/12/2024

使唔使靚到咁😍😍

03/12/2024

自駕遊分享 - 中央線変移

唔知大家喺日本自駕時，有冇試過上午行果時係3線行車，但夜晚行果時變咗4線行車？條中央線位置唔同咗？當遇上果時有咩需要注意？

喺日本依個地帶叫中央線変移區，中文叫調撥車道，英文叫reversible lane。
係會跟據車嘅流量而去改變車道嘅行車模式，打個比喻，A區上午時間因為多人返工返學，所以出市區方向開放4條行車線，相反夜晚時間因為出市區方向少車，所以就會將4條行車線改為3條，將其中一條行車線改為俾大家返Ａ區用。
好處係可以改善交通情況，但唔好處係唔熟嘅情況可能會變咗逆線行車，相當危險。

中央線変移區喺外國有「自殺車道」嘅惡名，所以日本都有廢除嘅趨勢。依家喺沖繩，仲有兩段中央線変移區，分別係

・国道507号・国道330号（那覇市在国場十字路口開始到旭町十字路口）

・県道29号線（那覇市在松川（西）十字路口開始到安里十字路口）

兩段路雖然都唔接近国道58，不過為免唔小心闖入，所以都要注意一下。

進入中央線変移區後，會有路牌清晰表示中央線位置，請緊記，係靠中央線嘅左邊行車，亦不要超越中央線。

除咗頭頂有中央線表示外，地下亦有閃爍嘅道路燈黎做分隔線，另外仲有指示燈好清楚提示邊條線唔行得。

如唔小心入錯車道，唔好倒車！！只需打方向燈入返正確道路就得。
其實中央線変移區一啲都唔可怕，只需留意指示及減慢車速就得。就算錯都唔駛驚，因為本公司提供嘅車全部都有貼上外國人駕駛標示，所以其他車都會對我司車比較包容同忍讓。

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人

唔知大家喺日本自駕時，有冇試過上午行果時係3線行車，但夜晚行果時變咗4線行車？條中央線位置唔同咗？當遇上果時有咩需要注意？ 喺日本依個地帶叫中央線変移區，中文叫調撥車道，英文叫reversible lane。係會跟據車嘅流量...

11/11/2024

自駕遊分享 – 打軚氣

一架車，除咗車身要靚仔，引擎要夠力之外，最緊要就係四條軚。如果本身係車主，打軚氣依啲基本野應該難唔到大家，但如果本身無擁有過車，甚至連單車都冇的話，就要留意了。

車軚，喺打氣前只係一個膠圈，冇負載能力。需要打氣後，先可以承載車身重量、行李重量、乘客重量等。如果車軚唔夠氣會令車軚偏軟，唔單上會增加油耗，仲會因為缺乏支撐力，影響過灣、煞車能力，嚴重仲會因為發熱效應導致爆軚，甚至交通意外。所以租車時必須注意軚氣。

一般黎講，租車公司交車前需檢查清楚一切包括車軚，但畢竟係人手作業，難免會有甩漏。如果Touch wood出車後先發覺唔夠軚氣要點處理，今次就分享一下。

軚氣，日文叫空気圧。同香港一樣，基本上加油站都會提供免費打氣服務，唔同嘅係語言問題。聽過好多Case都話用google translate都唔係好清晰講到俾油站職員聽要做乜，甚至職員會以為係想換軚，所以最好學識自己打。

要自己打軚氣，首先要了解部車需要幾多kPa先。所需軚氣廠方已經印咗喺司機位度門上面，只要打開司機門就可以搵到，搵到之後就可以去搵打軚氣嘅地方。

油站一般會有個叫空気圧点検コーナー，翻譯係軚氣檢查corner。喺入面會有齊打軚氣所需嘅工具 — 氣泵，大致分兩隻：

電子自動式
電子式只需要輸入想要嘅Kpa，然後將氣咀同車軚連接上就會自動打氣，完成然會有聲音提示，方便快捷，不過因為電子式係會固定位置，所以車多情況下可能要排好長時間。

手動式
手動式就比較old School，將氣咀同車軚連接之後，要自己利用手制鬆緊度去調節打氣定放氣，揸緊係打氣，輕按係放氣。手動式好處係可以隨時拎起去任何位置，唔需要專登去檢查corner，喺繁忙時段好好用，不過記緊用完之後要放返原位補充空氣，如果唔係下手用就可能冇氣。

另外車上面都可能會有便攜式氣泵，只需要幫佢叉電後，就可以同電子自動式一樣用法，非常方便。

打軚氣方法好簡單，但有少少地方都要注意

請於車軚冷卻下檢查
因為車軚變熱後，氣壓會隨住溫度上升。所以會建議過去兩小時無使用或行駛少於兩公里嘅情況下檢查。

請緊遵建議kPa去打氣
雖然有部份車主會鍾意車身比較高而打大個kPa，但因為出租車嘅關係，喺唔了解情況下都係建議跟從廠方指示好了。

最重要係，如有任何問題，請即同租車公司聯絡。

天有不測之風雲，希望依編分享用唔著喺大家身上。

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人

一架車，除咗車身要靚仔，引擎要夠力之外，最緊要就係四條軚。如果本身係車主，打軚氣依啲基本野應該難唔到大家，但如果本身無擁有過車，甚至連單車都冇的話，就要留意了。 車軚，喺打氣前只係一個膠圈，冇負載能力.....

04/11/2024

AXA安盛 x O.Rent Kuruma

出發前先醒起唔記得買旅遊保😱😱
想買旅遊保唔知邊間好😵‍💫😵‍💫
我哋幫到你‼️
依家可以透過O.Rent Kuruma 投保由AXA 安盛提供嘅旅遊保，保障範圍包括有

行李及個人財物保障📱💻💸
如手機、平板電腦、手提電腦、行李等意外損失或損壞，總保額最高可達HKD $15,000。亦適用於遺失旅遊證件、現金、或未經授權嘅信用卡簽帳。

業餘運動保障🧗‍♀️🚣🏻🪂🏂🤿🏎️
只要被保人以「非」職業身份參加嘅運動或活動，如：浮潛、水肺潛水、自由潛水、拖曳傘、動力傘、飛索、高卡車等。AXA安盛都會為被保人提供受傷甚至死亡嘅保障

自駕遊保障🚗
如租車自駕遊時發生因碰撞而損毀或被盜，被保人需支付租車自付額或需預先支付的款項亦會得到保障

經O.Rent Kuruma 投保，更可獲保單85折優惠，歡迎聯絡查詢。🤗

PS. 去沖繩的話，記得搵我哋租車
#沖繩旅遊
#沖繩
#自駕遊
#香港人

04/11/2024

自駕遊分享 – 汽車雙生兒

香港地少人多、物價高昂，要買車已經唔容易，要養車更加難。所以除咗汽車發燒友外，一般大眾都對車款唔會有太多認知，更惶恐要了解車款大細、可載行李量、性能等，而日本車因為各式各樣問題，令到好多明明spec一樣，但名字唔同嘅車款出現，所以今次分享下有咩常見車係twins

Alphard / Vellfire
Toyota Alphard (亞佛)，相信唔係揸開車嘅人都會聽過佢個名。而Vellfire正正係Alphard嘅兄弟。
兩者因為都係用同一款底盤開發，所以不論長度、寬度、高度、軸距都完全一樣，但兩者外觀上就好唔同。

Toyota 將Alphard定位做商務級，形容Alphard係「優雅而精緻」。而Vellfire定位係比較前衛同年青，形容Vellfire「實力和強烈個性」。強調Alphard係追求舒適性，vellfire就係追求運動性。所以兩者喺除咗外觀，車內配套都唔一樣。所以令好多人誤會係兩個Size嘅車。

Noah / Voxy
同樣係Toyota，Noah 亦有佢嘅兄弟 – Voxy。同Alphard情況一樣，Noah同Voxy都係用同一款底盤開發，所以不論長度、寬度、高度、軸距都完全一樣。亦同樣地，兩者外觀、定位都好唔同。
Toyota 將Noah定位比較穩重，所以外觀方面都係比較保守同傳統風格。相反Voxy就行年青路線，外觀上比較花巧、前衛。不過兩者車內配套大致都係一樣，所以基本上依兩兄弟只係外觀上嘅分別。
另外，其實依兩兄弟仲有另一個兄弟 – Esquire，不過因為市場佔用率完全唔及Noah / Voxy，所以Toyota喺2021年都宣佈停產Esquire。

Fit / Jazz
依架並唔係兄弟車，係根本同一架車，只不過喺唔同地方，佢就有唔同嘅名。屬於Honda嘅Fit，本名係叫Fitta，但因為瑞典話內，Fitta 係指Pussy，所以出世前將ta 唔要，直接用Fit 依個名。亦因為唔同嘅原因，導致香港、澳門、歐洲等地區要叫佢做Jazz，日本、台灣、美洲等要叫Fit。

Corolla Levin / Sprinter Trueno
要數兄弟車代表作，一定係Toyota嘅AE86。受到「頭文字D」影響，令到AE86喺港、澳、台等地區都充滿人氣。AE86起源起第一季Corolla，之後因為市場上希望Corolla出運動型車款，所以1972年時就出咗Corolla Levin，然後喺1974年時，為咗增加市場佔有率，Toyota就將Levin再生另一個兄弟出嚟，就係Sprinter Trueno。之後依兩兄弟一路成長，去到1983年，終於變成一代神車「AE86」。到AE86時，Trueno 同Levin 基本上性能上係冇分別，但外觀上就有一個明顯分別就係Tureno係採用收納式頭燈，而Levin係用開放式頭燈。喺銷售量方面，本來Levin係力壓Trueno近一倍，但當頭D嘅出現(1998年)，Tureno喺二手市場價格激增，近年仲一車難求。順帶一提，其實佢哋仲有一個北美兄弟，叫做Corolla GT。

兄弟車(姉妹車)又點止咁少，大家下次租車時，如果冇晒目標車款嘅話，不妨試下搵埋佢哋兄弟，可能會有驚喜。

PS. 去沖繩的話，記得搵我哋租車

#沖繩旅遊
#沖繩
#自駕遊
#香港人

香港地少人多、物價高昂，要買車已經唔容易，要養車更加難。所以除咗汽車發燒友外，一般大眾都對車款唔會有太多認知，更惶恐要了解車款大細、可載行李量、性能等，而日本車因為各式各樣問題，令到好多明明 spec 一樣，...

23/10/2024

沖繩旅遊 - UO夜機線

以往香港往返沖繩最夜嘅機只有HK airline嘅

HX658: HKG>OKA (11:30 > 15:00)
HX657: OKA>HKG (16:00 > 17:50)

但由2024/11/01開始，Hk express將以往飛鹿兒島線嘅UO826、UO827改為沖繩線，時間將會係

UO826: HKG > OKA (15:50 > 19:20)
UO827: OKA > HKG (20:15 > 22:15)

所以大家可以留喺沖繩嘅時間亦可以大幅延長，同時因為非繁忙時間關係，機場安檢時間都會大幅縮短，所以大家check in後會有更加多時間喺那霸機場度逗留。

當大家煩惱緊喺機場買咩手信嘅同時，唔知大家有冇興趣帶座首里城返去呢

首里城喺沖繩人眼中係代表住琉球王國嘅文化同象徵，情況就好似獅子山喺香港人眼中一樣，所以喺沖繩好多地方都會見到佢嘅蹤影。而喺那霸機場內，就可以自己制作一張首里城嘅明信片。

有趣嘅地方係，制作明信片嘅地方係散播喺機場唔同地方，共有四個。喺Check point度係可以搵到提示，之後就係考對機場嘅熟悉程度。當搵齊四個印章之後，就可以合成一個首里城嘅明信片出黎，有興趣嘅朋友可以帶埋小朋友一齊喺機場黎一場冒險之旅。

https://rentkuruma.blogspot.com/2024/10/uo.html

PS. 去沖繩的話，記得搵我哋租車
#沖繩旅遊
#沖繩
#自駕遊
#香港人

15/10/2024

沖繩分享 - 神社參拜

一講到日本著名嘅建築物，神社應該會佔一席位，但神社入面其實參拜緊啲咩？究竟要俾幾多香油先好呢？今日就分享一下。

分享神社之前，需要先講緊一個宗教 — 神道教

神道教係一個日本傳統宗教，遠自公元前已經有歷史記載。信奉「天地萬物皆有靈」，將世間萬物令人敬畏或祟拜嘅都視為「神」，由大自然到人、物、甚至石頭都一切都可以去崇拜，就連福氣、災厄、疾病依啲抽象概念嘅事都可以計算在內。所以神道教所拜嘅神之多，又被稱為「八百萬神」。

唔單止會崇拜神，就連妖魔鬼怪都冇問題，因為佢咃對神嘅定義係「神係任何令人感到恐懼及敬畏嘅任何事物或現象，神、佛、魔、人都係無分別」。
另外佢哋相信一件人工製成嘅物件，被使用時間超過99年之後，就會獲得生命成妖怪，又名「九十九神」。

而神社，就係為神道教提供地方舉行祭祀等儀式嘅地方，所以可以話每個神社內嘅祭神都唔一樣，不過都有大路嘅如：造物神、日神、月神、火神、風神、海神、山神等等，亦都會有以天皇做祭神如：八幡神。

因為神社係屬於神聖嘅地方，所以神社嘅結構係有精心設計過，神社嘅四圍由好多樹木嘅森林組成，又稱為「鎮守之森」。而樹林內會有樹林被稱為「御神木」，之後會將御神木用「注連繩」連住，喺注連繩上面再綁上白色嘅「紙垂」，然後同鳥居連上將入口隔離。

而大多數神社都係由鳥居、石級、參道、手水舍、拜殿/幣殿、主殿、賽銭箱等組成

因為神社係屬一個聖域，所以要跟從以下步驟參拜：

1. 進入「烏居」前，先向鳥居輕微一鞠躬。

2. 穿過石級，到達「參道」

3. 去「手水舍」清潔自己雙手同漱口
清潔方式：使用木勺，洗左手→洗右手→水倒去左手中漱口→洗左手→最後用水清洗木勺柄。

4. 入殿後，喺「賽銭箱」前對「御神體」先一鞠躬，之後投入香油錢（お賽銭）後再搖鈴，之後兩拜兩拍手一拜，再許願（心中默許），完成後再鞠一次躬就完成。

至於香油錢添幾多好呢，傳統上就冇指定嘅，無論一円定係一万円都無所謂，隨心就好了，不過對應返日文，唔同金額就有唔同嘅意義，以下會介紹一部份：

5円：有緣（ご縁）
11円：好緣（いい縁）
15円：十分有緣（十分なご縁）
25円：兩倍有緣（二重にご縁）
41円：由始至終都有好緣（始終いい縁）
100円：會有一百條緣（百の縁）
111円：無論點都第一（何でも一番）
115円：好有緣（いいご縁）
123円：步步高昇
415円：超級有緣（十二分にご縁）
485円：緣份由四方八面來（四方八方からご縁）
777円：Lucky數字
2,525円：微笑（ニコニコ）
2,951円：幸福來（福来い）
10,000円：萬事完滿（万事円満）

有好嘅，當然就會有唔錯，所以以下金額係唔建議大家投放嘅：

10円：緣份變遠（遠縁になる）
33円：會遇到倒楣嘅事（散々な目にあう）
65円：無咩好緣份（ろくなご縁がない）
69円：無咩好事（ろくなことがない）
71円：無緣（ない縁）
75円：緣盡了（なんのご縁もない）
79円：喊出黎（泣く）
85円：果然無緣（やっぱりご縁がない）
95円：苦嘅緣就有（苦しいご縁にあう）
105円：真係無緣（当分ご縁がない）
500円：再無其他效果（これ以上の効果はない）

唔單止數目上面要注意，用嘅貨幣都要留意。

一般會建議用五円同五十円，因為依兩款硬幣中間通窿，寓意住好運。相反唔建議用十円同五百円，因為十円有寓意緣份變遠嘅意思，而五百円就會再無其他效果，所以如非必要，都會避免用依兩款硬幣，同埋香油錢係唔可以向其他人借嘅，切記切記。

另外，神社方面唔希望大家投放一円硬幣，原因唔係因為嫌錢少，係因為如果存入大量硬幣銀行會收手續費，而個手續費係用枚做單位，每一千枚就要收1,100円，換句說話講，如果存1,000枚一円呢，神社方面仲要倒貼。所以為神社著想，盡量唔好放一円。
最後，請勿入錯「寺廟」，因為日本除咗神道教嘅嘅神社之外，仲有佛教（仏教）嘅寺廟，入面嘅參拜儀式係唔一樣，最大分別係神社有「巫女」，寺廟有和尚，唔好「入錯寺廟拜錯神」。

PS. 去沖繩的話，記得搵我哋租車
#沖繩旅遊
#沖繩
#自駕遊
#香港人

一講到日本著名嘅建築物，神社應該會佔一席位，但神社入面其實參拜緊啲咩？究竟要俾幾多香油先好呢？今日就分享一下。 分享神社之前，需要先講緊一個宗教 — 神道教 神道教係一個日本傳統宗教，遠自公元前已經有歷史.....

13/10/2024

限時優惠📣📣📣

由即日起到2024/11/30，凡司機能提供：
牌簿 /&
的士司機証 /&
小巴司機証 /&
10號車牌 + 巴士職員証 /&
等等

証明司機有足夠路面經驗，即可獲得全單85折優惠!!

條款:
資料需與登記司機一致
如登記司機為兩名，需要兩名司機同時提供証明
優惠只適用🇭🇰香港駕照跟🇭🇰香港牌簿
折扣不適用於保費❌
需交車前最少一天提交証明

08/10/2024

沖繩分享 - 風獅爺

去過沖繩嘅朋友都知道，沖繩石獅 — 風獅爺係無處不在，甚至係可以代表沖繩。究竟風獅爺係咩黎呢？

風獅爺，琉球語：シーサー(Shisa)，相傳起源於中國南部，大約喺漢朝時五胡亂華年代，當時戰亂頻頻，所以好多漢人都去金門避難，但因為當時正吹東北季風，所以第一批去金門嘅船幾乎全部覆沒。

而其中一隻船上面，原本住閩浙地區嘅山越居民見到咁情況就拎屋企供奉嘅山貓爺出黎祈福。之後突然海面變得平靜，船身亦平穩落黎。同船嘅漢人見到之後都開始供奉依隻神獸。

去到明朝，由移居琉球（即現今沖繩）嘅福建人帶埋山貓爺過去。到17世紀後期，沖繩富盛村週邊嘅農田經常有火災，有當地士族話火災係因八重山邪靈引起，所以要將石獅放山頂面向八重山，村民照做之後，真係冇再發生火災。自從之後，依隻石獅就成為琉球嘅守護神，就連2戰受到美軍炮擊之下，依隻石獅都只係受到皮外傷（左邊面身都有子彈窿）。

風獅爺同時受到日本狛犬及中國石獅嘅影響，風師爺由原來獨立單體，變成一男一女。造型亦由雄赳赳、身穿披風、以站立或蹲嘅方式示人，變成一隻開口大笑一隻靦腆微笑示人。

貴為琉球守護神，以前係唔可以隨便擺放出黎。只有神社、城門、村口、御嶽（聖域）、貴族嘅墓陵及屋頂等地方先可以設置。直到琉球國滅亡併入日本之後先可以平民化，變成依家嘅風獅爺。

依家嘅風獅爺係由一男一女組成，開口大笑嘅係男性，相反靦腆微笑嘅就係女性。造型方面都相當多，求家宅平安、工作順利、學業進步、愛情得意等等等等都有，不過有一個就一定不變，就係可以放喺門口或屋頂辟邪，但唔係隨便買返去就得，要佢起作用，就要進行覺醒儀式（即係開光）。

先喺風獅爺身上撒鹽淨化，之後用水沖乾淨
將清酒倒入風獅爺個口入面
然後深呼吸一啖氣，再用力向風獅爺吹
最後喺風獅爺旁邊大力拍三下
完成以上動作之後，先算同風獅爺開光，咁佢先會幫手鎮宅辟邪。

既然風獅爺咁多功用，下次黎沖繩，大家不妨帶一對返屋企。

PS. 去沖繩的話，記得搵我哋租車
#沖繩旅遊
#沖繩
#自駕遊
#香港人

去過沖繩嘅朋友都知道，沖繩石獅 — 風獅爺係無處不在，甚至係可以代表沖繩。究竟風獅爺係咩黎呢？ 風獅爺，琉球語：シーサー(Shisa)，相傳起源於中國南部，大約喺漢朝時五胡亂華年代，當時戰亂頻頻，所以好多漢人都去.....

01/10/2024

尋日香港各大自駕遊討論區都有share一件事 - 香港人沖繩自駕炒車後打卡

先唔評論租客嘅態度
不過有一點各位自駕遊司機一定要留意

就係小路出大路係一定一定一定要停低望清楚先轉出
見到「止まれ」都一樣

基本上我哋都會再三提醒每一客户
不過都希望未成為我哋客戶嘅都緊記依點
停一停最多阻大家三秒時間，但換黎嘅係全車人安全。

PS. 去沖繩的話，記得搵我哋租車
#沖繩旅遊
#沖繩
#自駕遊
#香港人