24/01/2024
( တွေ့ဆုံမေးမြန်းခန်း )
" အားကောင်းမောင်းသန်အစိုးရတစ်ရပ် " ဖေဖော်ဝါရီ ၁ ရက် အစိုးရအပြောင်းအလဲ အလားအလာများအပေါ် ရခိုင့်ဦးဆောင်ပါတီ (AFP) ဥက္ကဌ ဒေါက်တာအေးမောင်နှင့် တွေ့ဆုံမေးမြန်းခန်း
ရန်ကုန် ၊ ဇန်နဝါရီ ၂၄ ၊ ၂၀၂၄
ဗိုလ်ချုပ်မှူးကြီးမင်းအောင်လှိုင် ဦးဆောင်တဲ့ နစကအစိုးရအနေနဲ့ အခုဇန်နဝါရီ ၃၁ ရက်မှာ ၆ လ သက်တမ်းတိုးကာလအသစ် ထပ်ရောက်နေပြီ ဖြစ်ပါတယ်။
နစကအစိုးရအနေနဲ့ ဖေဖော်၀ါရီလ ၁ ရက်မှာ ဘယ်လို ဆက်လက်လုပ်ဆောင်နိုင်မလဲဆိုတဲ့အပေါ် ရခိုင့်ဦးဆောင်ပါတီ (AFP) ဥက္ကဌ ဒေါက်တာအေးမောင်ရဲ့ သုံးသပ်ချက်အမြင်ကို ရွှေတြိဂံဒေသသတင်းဌာနက အခုလိုဆက်သွယ်မေးမြန်းထားပါတယ်။
PTL ( ရွှေတြိဂံ ) - မေးမြန်းသူ ။ ။ " နစက အစိုးရရဲ့ ထပ်တိုးခြောက်လက အခု ဇန်န၀ါရီလ ၃၁ မှာ ကုန်ဆုံးတော့မှာဆိုတော့ ဖေဖော်၀ါရီလ ၁ ရက်မှာ နိုင်ငံရေးအပြောင်းအလဲ ဘယ်လိုရှိနိုင်မယ်ဆိုတာ သုံးသပ်ပေးပါဦး ? "
ဒေါက်တာအေးမောင် - ဖြေကြားသူ ။ ။ " ဖေဖော်၀ါရီ ၁ ရက်က နစက ဆက်ပြီးတော့ ၆ လထပ်ယူရအုံးမှာပေါ့ ။ ၆ လ ထပ်ယူမယ် နောက် ၆ လလည်း ထပ်ယူနိုင်ပါတယ်။ ဘာလို့ဆိုရင် ၂၀၂၄ အောက်တိုဘာ သန်းခေါင်စာရင်းကောက်မယ် ။ အဲဒီက တိကျတဲ့မဲ၊ ခိုင်မာတဲ့မဲစာရင်းတစ်ခု ရယူမယ်ဆိုတော့ သန်းခေါင်စာရင်းကောက်တာကလည်း ၁ လ ၂ လ လောက်တော့ကြာမှာပေါ့ ။ ဆိုတော့ ၂၀၂၅ ခုလို ဇန်န၀ါရီလ ၃၁ ရက်နေ့မှာ ထပ်ပြီးတော့ နစကအနေနဲ့ ဆက်ယူမှာလား ? ကာကွယ်ရေးနဲ့ လုံခြုံရေးကောင်စီကို ရွေးကောက်ပွဲအတွက် နိုင်ငံ့တာ၀န်ကို ပြန်အပ်မှာလား ? ဆိုတာက ၂၀၂၅ ဇန်န၀ါရီ ၃၁ ရက်နေ့မှာမှပဲ ကျွန်တော်တို့ သိနိုင်မှာ ။ ၆ လ နှစ်ကြိမ်လောက်တော့ ထပ်သွားဖို့ လိုအပ်တယ်လို့ ယူဆထားပုံ ပေါက်ပါတယ် "
PTL ( ရွှေတြိဂံ ) မေးမြန်းသူ ။ ။ " ညွန့်ပေါင်းအစိုးရ ဒါမှမဟုတ် အသွင်ကူးပြောင်းရေးအစိုးရတစ်ရပ်ပေါ့ ဖွဲ့နိုင်မယ်လို့လည်း သုံးသပ်ချက်တချို့ ထွက်နေတာရှိတယ်။ အဲဒီအပေါ် ဘယ်လိုမြင်ပါသလဲ ? "
ဒေါက်တာအေးမောင် - ဖြေကြားသူ ။ ။ " အဲတာကလည်း ဖြစ်နိုင်တယ် ။ လက်ရှိ စစ်ရေး၊ နိုင်ငံရေး အကျပ်အတည်းက တော်တော်လွတ်လပ်ရေး ခေတ်လွန်ကာလမှာ တော်တော်ကြီးကြီးမားမားလို့ သုံးသပ်လို့ရတာပေါ့ ။ အဲတော့ နိုင်ငံတော်အနေနဲ့ ဘယ်လမ်းကိုရွေးမှာလဲ ? ငြိမ်းချမ်းရေးဆိုတဲ့ လမ်းတစ်လမ်း ရှိတာပေါ့ ။ နောက်တစ်လမ်းကတော့ ပဋိပက္ခဇုန်ထဲမှာပေါ့ ။ ' အဆိုးကျော့သံသရာ ' လည်နေတဲ့လမ်းကြောင်းပေါ့ ။ အဲတော့ ငြိမ်းချမ်းရေးလမ်းဆိုတာကတော့ အားလုံးမျှော်မှန်းတဲ့ လွတ်လပ်ရေးခေတ်ဦးက မျှော်မှန်းတဲ့ ပြည်ထောင်စုကြီးကို စုပေါင်းညီညာပေါ့ဗျာ ၊ လွတ်လပ်တဲ့အရသာ၊ တရားမျှတခြင်း ၊ ညီမျှခြင်းပေါ့ ၊ အဲဒီဥစ္စာလောကပါလတရားနဲ့ပြည့်တဲ့ နိုင်ငံကြီးပေါ့ ။ အဲဒီလိုရည်မှန်းမယ်ဆိုရင် ညှိနှိုင်းဆွေးနွေး အဖြေရှာဖို့ လိုအပ်တာပေါ့ ။ သို့မဟုတ် ခုနက ပြောတဲ့ ပဋိပက္ခ ၊ ' အဆိုးကျော့သံသရာ ' လည်မယ်ဆိုရင်:အခုခင်ဗျားတို့လည်းမြင်တာပဲလေ ။ ရှမ်းပြည်မြောက်ပိုင်းမှာ မဟာမိတ်သုံးဖွဲ့နဲ့ မြန်မာ့တပ်မတော်တိုက်ပွဲဖြစ်တာပေါ့ ။ ဒါခင်ဗျားတို့သုံးသပ်တဲ့ အတိုင်းပါပဲ ။ တရုတ် - မြန်မာစီးပွားရေးစင်္ကြန်ကြီး ရှိပါတယ် ။ BRI ၊ ကျောက်ဖြူထိ ရည်မှန်းတဲ့ ကားလမ်း၊ရထားလမ်းစီမံကိန်းတွေမှာလည်း အဟန့်အတားဖြစ်တာပေါ့ ။ နောက် တရုတ်ရေနံဓာတ်ငွေ့ပိုက်လိုင်းအပေါ်မှာလည်း ခြိမ်းခြောက်မှုတွေ ဖြစ်တာပေါ့ ။ အဲလိုစဖြစ်တဲ့ အောက်တိုဘာ ၂၇ ကစပြီး မြန်မာ့တပ်မတော်က ခွာစစ်နဲ့ဒီဘက်ကို နောက်ဆုတ်ဆုတ်လာတဲ့အခါမှာ ပါ၀ါလေဟာနယ်ကြီး ဖြစ်တာပေါ့ ။ တရုတ်အတွက် အများကြီးစဥ်းစားဖို့ ဖြစ်လာတာပေါ့ ။လပါ၀ါလေဟာနယ်ရဲ့ လစ်ဟာမှုက အဲဒီလမ်းတလျှောက်လုံးရဲ့ လုံခြုံမှု၊ ရည်မှန်း ထားတဲ့စီမံကိန်းကာလမှာ ဆောင်ရွက်လို့ မပြီးနိုင်ဘူး၊ မဖြစ်နိုင်တော့ဘူးဆိုတဲ့ ယူဆချက် တရုတ်ပီကင်းဘက်မှာ သွားပြီးတော့ ရောင်ပြန်ဟပ်မှာပေါ့ ။ အဲတော့ အဲဒီလုံခြုံရေးအတွက် ဘာလုပ်မှာလဲဆိုတာ တရုတ်ပြည်မကြီးဘက်က စဥ်းစားမှာပေါ့ ။ မြန်မာ့တပ်မတော်ရဲ့ ဒီဘက်နောက်ဆုတ်တဲ့ကြားက ပါ၀ါလေဟာနယ်မှာ TNLA ထိန်းနိုင်မှာလား? ကိုးကန့်ထိန်းနိုင်မှာလား? ' ၀ ' ပဲထိန်းမှာလား? ဒါကြီးကခုနကပြောတဲ့ ' အဆိုးကျော့ ' သံသရာ ပေါ့ ။ ခဏလေးအားဖြင့် နယ်မြေယာယီရသွားတယ် ၊ ငြိမ်းချမ်းမှုမရှိဘူးဆိုရင် အဲဒီနေရာမှာ ပြန်ပြီး စစ်ပြန်ဖြစ်မှာပေါ့ ။ ကောင်းတဲ့နေရာ လာကြမှာပေါ့ ။ အခုထက် ပိုခြောက်ခြားစရာ ဖြစ်လာမှာ ။ အဲဒီ သံသရာမှာ ဆက်နေမှာလား? သူနိုင်တယ်၊ ကိုယ်ဆုတ်တယ်၊ သူနိုင်တဲ့ နေရာကို ကိုယ်က ပြန်တိုက်တယ် ။ အဲဒီနေရာမှာ လူထု တည်တည်ငြိမ်ငြိမ်နေထိုင်နိုင်မှာလားဆိုတာတစ်ခု မေးခွန်းပေါ်လာတာပေါ့ ။ နောက် တရုတ် - မြန်မာ ချစ်ကြည်ရေး စင်္ကြန်ကနေ အိန္ဒိယသမုဒ္ဒရာထွက်ပေါက်ပေါ်မှာ ဘယ်လောက်ထိခိုက်သလဲဆိုတာ တရုတ်ပြည် အစိုးရဘက်ကလည်း စဥ်းစားမှာပေါ့ ။ အဲတော့ မြန်မာနိုင်ငံ အခုဖြစ်တဲ့ ' အဆိုးကျော့ ' သံသရာကနေအစိတ်စိတ်အမွှာမွှာ ကွဲသွားနိုင်မှာလားဆိုတဲ့မေးခွန်းထိ ထိပ်ပိုင်းခေါင်းဆောင်တွေဘက်မှာcတွေးကြတော့မှာပေါ့ ။ မြန်မာ့ တပ်မတော်ဘက်မှာလည်း စဥ်းစားမယ် ။ SAC လည်း စဥ်းစားမယ် ။ တစ်ဖက်က ကိုးကန့်တို့၊ ' ၀ ' တို့ ၊ မိုင်းလားတို့ ၊ TNLA လို ခေါင်းဆောင်တွေလည်းစဥ်းစားမှာပေါ့ ။ တရုတ်ပြည်လည်း စဥ်းစားမှာပေါ့ ။ ပြိုကွဲသွားရင်ဖြစ်လာနိုင်တဲ့ ပြောင်းပြန် Action - Reation ( သက်ရောက်မှုနှင့် တန်ပြန်သက်ရောက်မှု ) တရုတ်ဘက်က စဥ်းစားမယ် ။ လမ်းနှစ်သွယ်ဆိုးကျိုး သံသရာမှာ ပတ်နေရစ်မှာလား ? သို့မဟုတ် ငြိမ်းချမ်းတဲ့ ဖြစ်စဥ်ကိုယူမှာလား ? လက်ရှိအနေအထားကို ခြေဥအရလည်းပဲ ကာကွယ်ရေးဦးစီးချုပ်ကို ကာလုံကအပ်နှင်းထားတာ သုံးနှစ်ပြည့်တော့မယ် ။ ရှေ့ဆက်ပြီးတော့ ဘယ်လိုသွားကြမှာလဲ ? သွားမယ့်ကာလကလည်း SAC ဘက်ကညွှန်းသလို အောက်တိုဘာ ၂၀၂၄ မှာသန်းခေါင်စာရင်း ကောက်ရဦးမယ် ။ နှစ်ကြိမ်သွားမှပဲ သူ့ရဲ့ပန်းတိုင်ကပြီးမယ် ။ တည်ငြိမ်လုံခြုံတဲ့အခင်းအကျင်းနဲ့ ကာလုံကိုလည်း အာဏာပြန်အပ်ရဦးမယ် ။ အဲတော့တည်ငြိမ်လုံခြုံအေးချမ်းအောင် ခုနက လမ်းနှစ်သွယ်ထဲက ဘယ်လမ်းကိုရွေးကြမှာလဲ? အဲ့လိုရွေးဖို့ အတွက် လာမယ့်ဖေဖော်၀ါရီ ၁ ရက်နေ့မှာ အားကောင်းမောင်းသန်အစိုးရ တစ်ရပ်လိုသလား? လက်ရှိသုံးနှစ်တာကာလ SAC ရဲ့ အစိုးရပေါ်လစီ ချပေးတဲ့ Method ( နည်းစဉ် ) ကပေါ့ဗျာ ၊ ဒီဘက်က ၀န်ကြီးချုပ်ဦးဆောင်တဲ့ အစိုးရအဖွဲ့ပေါ့ဗျာ ။ အဲတော့ သုံးနှစ်လောက် ကာလနဲ့လကျွန်တော်တို့ဖြတ်ကျော်နေတဲ့ကာလမှာ အခုကြီးကြီးမားမားပြဿနာ ရင်ဆိုင်ခဲ့ရပြီးပြီ ။ ဘယ်လိုအားကောင်းမောင်းသန် အစိုးရတစ်ရပ် ဖေဖော်၀ါရီ ၁ ရက်နေ့မှာပေါ်ခဲ့ရင် အခုနကလမ်းနှစ်သွယ် ၊ အဓိကတော့ ငြိမ်းချမ်းတဲ့လမ်းကို ရအောင်ကိုယူမှဖြစ်မယ် ။ ပြည်ထောင်စုကို အကောင်းဆုံးနည်းနဲ့ ရွှေ့မှဖြစ်တော့မယ် ။ ' အဆိုးကျော့သံသရာ ' ကနေ ရုန်းထွက်လိုချင်တယ်ဆိုရင် ရုန်းထွက်နိုင်တဲ့ အင်အားစုတစ်ခုကိုရအောင် တည်ဆောက်ရမယ့်အစိုးရတစ်ရပ်သည် လာမယ့်ဖေဖော်၀ါရီ ၁ ရက်နေ့မှာ ပေါ်မှဖြစ်တော့မယ်ဆိုတဲ့ လိုအပ် ချက်ပေါ့ဗျာ ။ အဲတာကို နစက ခေါင်းဆောင်တွေ၊ ကာလုံမှာပါတဲ့ ယာယီသမ္မတ အပါအ၀င်ပုဂ္ဂိုလ်တွေ ၊ လက်နက်ကိုင်အဖွဲ့အစည်းခေါင်းဆောင်တွေ ၊ NCA ထိုးတာရှိမယ် ၊ NCA မထိုးတာရှိမယ် ၊ တခြားနိုင်ငံရေးနယ်တွေက ပုဂ္ဂိုလ်တွေ ၊ စစ်ဘက်နယ်ဘက်ကပုဂ္ဂိုလ်တွေ ၊ ဘယ်လိုစဥ်းစားကြမှာလဲဆိုတဲ့ အဖြေတစ်ခု ပေးကိုပေးရတော့မယ် ။ နစကအနေနဲ့ ဟုတ်ပြီလား ၊ အဲတော့ နစကလဘယ်လိုစဥ်းစားမှာလဲ ? ဖေဖော်၀ါရီ ၁ ရက်နေ့ကနေ တစ်နှစ်တာ ခြောက်လနှစ်ကြိမ် သွားကြရမယ့် အစိုးရ၊ အဲဒီ အစိုးရကိုဦးဆောင်တဲ့ နစကပေါ့ဗျာ ။ Policy Guide Lines ( မူဝါဒပိုင်း လမ်းညွှန်ချက်များ ) ပေးမယ့်အဖွဲ့ ၊ သူတို့သုံးသပ်ကြမှာပေါ့ ။ သုံးသပ်ပြီးပြီလို့လည်း သုံးသပ်ပါတယ် ။ ဘာလို့ဆိုရင် ဖေဖော်၀ါရီ ၁ ရက်ဆိုတာ အခုအင်မတန်ကပ်ပြီလေ ။ အပြန်ပြန်အလှန်လှန် သုံးသပ်ပြီးမှ ဘယ်လိုမြန်မာနိုင်ငံတစ်ခုလုံးနဲ့ ပတ်သက်တဲ့ ငြိမ်းချမ်းတဲ့ဖြစ်စဥ်တွေရောက်အောင် လာမယ့် ခြောက်လတာနှစ်ကြိမ်မှာ အပြောင်းအလဲတစ်ခုရောက်အောင် SAC ကာကွယ်ရေးဦးစီးချုပ်သည် ဘယ်လိုဦးဆောင်မှာလဲ? အလွန်တရာအရေးကြီးတဲ့ Turning Point ( အလှည့်အပြောင်းအမှတ် ) တစ်ခုကို ရောက်နေပြီ ။ အဲတော့ ဖေဖော်၀ါရီ ၁ ရက်မှ မြင်ကြရတော့မှာပေါ့ ။ အားကောင်းမောင်းသန် မြန်မာ့နိုင်ငံရေးကို တကယ့်ကို ပြောင်းပြန်လှန်ပစ်နိုင်တဲ့ ၊ ပဋိပက္ခ အဆိုးကျော့သံသရာကနေ ရုန်းထွက်နိုင်လောက်တဲ့ နိုင်ငံရေးအားတစ်ခု လိုပြီ ပေါ့ဗျာ "
PTL ( ရွှေတြိဂံ ) ။ ။ " လက်ရှိ အစိုးရခေါင်းဆောင်တွေမှာ ပဋိပက္ခတွေ ချုပ်ငြိမ်းဖို့ အဖြေတစ်ခုရှိနေနိုင်လားဆိုတာ သုံးသပ်ပေးပါဦး "
ဒေါက်တာအေးမောင် ။ ။ " အဲတော့ ငြိမ်းချမ်းဖို့လိုအပ်တယ်ဆိုတဲ့ လိုအပ်ချက် ၊ ခင်ဗျားတို့လည်းခံစားရမှာပေါ့ ။ စစ်နဲ့ပတ်သက် တဲ့ ဒုက္ခသည်တွေ ၊ အဲဒီဟာကြောင့်ဖြစ်လာတဲ့ ပြည်တွင်းနေရာရွှေ့ပြောင်းကြရတဲ့ပုဂ္ဂိုလ်တွေ သန်းချီရှိသွားပြီ ။ မြန်မာနိုင်ငံက ဒီဆိုးကျိုး သံသရာကနေ ရုန်းမထွက်နိုင်သေးဘူးဗျ ။ ပဋိပက္ခတွေ များတယ် ။ လူမျိုးစုတွေ ၊ ဘာသာပေါင်းစုံ နေကြတဲ့တိုင်းပြည်ဆိုတော့ အင်မတန် ( အထိအခိုက် ) မခံနိုင်တဲ့အနေအထား ရှိတာပေါ့ ။ အဲဒီလိုမြန်မာနိုင်ငံကို ညီညွတ်ပြီးတော့ တည်ငြိမ်အေးချမ်းဖွံ့ဖြိုးတိုးတက်အောင် ၊ ငြိမ်းချမ်းအောင် ၊ လွတ်လပ်မှုအရသာ ၊ သာတူမှုတရားမျှတမှုကို လူတိုင်းခံစားနိုင်အောင် ၊ လူမျိုးတိုင်းခံစားနိုင်အောင် ၊ ဘယ်လိုသွားမှ ဖြစ်မယ်ဆိုတဲ့ အဖြေတစ်ခုလည်း အခုထိပ်ပိုင်း ပုဂ္ဂိုလ်တွေ ရင်ထဲမှာရနေပြီလို့ ထင်ပါတယ် ။ လက်နက်ကိုင်အဖွဲ့အစည်းခေါင်းဆောင်တို့ ရင်ထဲမှာလည်း ရှိနေပြီထင်တယ် ။ စုစည်းနေတဲ့ မြန်မာနိုင်ငံ ပြိုကွဲသွားရင် ဘာဖြစ်လာနိုင်လဲ ? ဟုတ်လား? စုစည်းခဲ့တဲ့နိုင်ငံ ပိုပြီးခိုင်မာအောင် စုစည်းဖို့အတွက် ဘာတွေ လိုအပ်မှာလဲ?ချစ်ကြည်မှုခိုင်မာအောင်၊ ဒီပြဿနာကို ရပ်အောင်၊ ဒါတွေက ထိပ်ပိုင်းခေါင်းဆောင်တွေ ရင်ထဲမှာခုလောက်ဆိုရင် မေးခွန်းနဲ့အဖြေနဲ့ လိုအပ်တဲ့အဖြေတစ်ခုကိုတော့ဖြင့် လူထုအတွက် ရှိပြီးသားဖြစ်နေပြီလို့ ထင်ပါတယ် ။ အဲဒီပြဿနာရဲ့အဖြေ၊ အဖြေရဲ့ရလာဒ်ပေါ်မှာ လူထုလက်ခံတဲ့ ၊ လူထုကလည်းပဲ သိပ်ချစ်တဲ့ အဖြေမျိုး ၊ ရလာဒ်မျိုးဆိုရင် မြန်မာနိုင်ငံတော်ကြီး နှစ်ပေါင်းများစွာပေါ့ ။ ရှည်ကြာပြီးတော့ ကမ္ဘာ့အလယ်မှာ တင့်တင့်တယ်တယ် ရှိနေဦးမှာပါ။ သို့တည်းမဟုတ် အတ္တတွေ များပြီးမှ ပြည်ထောင်စုဆိုတာ ' အမွေလုစရာ စစ်ပွဲစစ်မြေပြင်ကြီးတစ်ခု ' လိုမှတ်ပြီးမှ ' လက်နက်သည် အဓိက၊ လက်နက်ရှိရင်နိုင်ပြီ ' အဲတာမျိုး စစ်မြေပြင်အသီးသီးဖြစ်သွားရင်တော့ဖြင့် ခင်ဗျားတို့၊ ကျွန်တော်တို့အတွက်လည်း မကောင်းဘူး ။ အနာဂတ်သားသမီးတွေအတွက်လည်း မကောင်းဘူးလို့ ပြောရမှာပေါ့ "
ဖြေကြားသူ - ဒေါက်တာအေးမောင် ၊ ဥက္ကဌ ၊ ရခိုင့်ဦးဆောင်ပါတီ (AFP)
မေးမြန်းသူ - PTL ၊ ရွှေတြိဂံဒေသသတင်းဌာန
ဓါတ်ပုံ - ရွှေတြိဂံဒေသသတင်းဌာန
#ရွှေတြိဂံဒေသသတင်းလွှာ
#ရွှေတြိဂံ_တွေဆုံမေးမြန်းခန်း_ရခိုင့်ဦးဆောင်ပါတီ_AFP_ဥက္ကဌ_ဒေါက်တာအေးမောင်
#ဖေဖေါ်ဝါရီ၁_နစက_ပုံမှန်သက်တမ်းတိုး_ကြားဖြတ်_ညွန့်ပေါင်း_မာရှယ်လော_အလားအလာ
