16/10/2024
☆ ဘုရားရှင်တိုင်း မစွန့်အပ်တဲ့ ဌာနတော် ၄ ပါး ရှိပါတယ်။ ပါဠိလို အဝိဇဟိတ ဌာန လို့ ခေါ်ပြီး ၁) ဘုရားအဖြစ်ကိုရတဲ့ ဗောဓိပင်တည်ရာ၊ ၂) တရားဦး ဓမ္မစကြာ ဟောတော်မူရာ နေရာ၊ ၃) သီတင်းကျွတ်လပြည့်ည တာဝတိံသာမှ ဆင်းသက်တဲ့အခါ လူ့ပြည်မှာ ပထမဆုံး လက်ျာခြေဖဝါးချတော်မူတဲ့ နေရာ နဲ့ ၄) နေမြဲ သီတင်းသုံးရာ ကျောင်းတိုက်ရဲ့ မဟာဂန္ဓကုဋိတိုက်တော်အတွင်းက ကုတင် အခြေစိုက်ရာ တို့ပဲဖြစ်ပါတယ်။
☆ သည်ဌာနတွေဟာ ပွင့်ထွန်းရာ ကာလ အလျောက် ခေတ်တစ်ခေတ်မှာ တွင်ခဲ့တဲ့ ဒေသအမည်တွေ မတူဘဲနေမယ်၊ ဗောဓိပင်အမျိုးအစား ပြောင်းလဲသွားမယ်၊ ကျောင်းအလှူရှင်တွေ ကွဲလွဲသွားမယ်၊ သို့ပေမယ့် နေရာဌာနတွေကတော့ မပြောင်းမလဲ မကွဲလွဲစွာ တူတော်မူကြတယ် ဆိုလိုပါတယ်။
☆ အမှတ် ၃ ဖြစ်တဲ့ အဝိဇဟိတ ဌာနက ဂေါတမဘုရားမြတ်စွာ လက်ထက်မှာ သင်္ကဿနဂိုရ်ပြည်လို့ အမည်တွင် ပြီး သီတင်းကျွတ်လပြည့်ညချမ်းချိန်မှာ နတ်ဗြဟ္မာများ ခြံရံလို့ ဘုရားကျက်သရေတော်အစုံဖွင့်၊ ရောင်ခြည်တော်အဟုန်လွှင့်ကာ ပြန်လည်ကြွမြန်းခဲ့ရာ၊ လူပြည်အရောက် လက်ျာခြေဖဝါး ဦးစွာချထားခဲ့ရာ ဖြစ်ပါတယ်။
☆ ဘုရားရှင်တိုင်းက မယ်တော်နတ်သား အမှူးပြုတဲ့ နတ်၊ဗြဟ္မာများကို အဘိဓမ္မာတရား ဟောမြွတ်ပြီးတဲ့အခါ တစ်နေရာတည်းမှာပဲ လူပြည့်ကိုပြန်ဆင်းကာ ခြေလှမ်းချင်းတူညီစွာ ချကြခြင်းဟာ အဘိဓမ္မာတရားတော်ရဲ့ လေးနက်ခံ့ညားပုံကို ပေါ်လွင်စေသလို မိဘကျေးဇူး သိတတ်ဖို့၊ ဆပ်တတ်ဖို့ အရေးကြီးပုံကို ပြဆိုနေတာလို့ ရှေးဆရာတော်ဘုရားများက အဓိပ္ပာယ်ဖွင့်ဆိုကြပါတယ်။
☆ တစ်နည်းဆိုရရင်တော့ ဘုရားရှင်တိုင်း မယ်တော့်နို့ဖိုး ကျေးဇူးဆပ် တရားဟောပြီးတဲ့အခါ ပြန်ကြွတဲ့ ခြေလှမ်းချင်း တူတော်မူကြတယ်။
☆ ယခုရောက်ရှိလာတဲ့ သီတင်းကျွတ်လပြည့် အခါသမယမှာ တစ်လောကလုံးရဲ့ စံအထားထိုက်ဆုံးဖြစ်တော်မူတဲ့ မြတ်စွာဘုရားရှင်ရဲ့ ပြန်လည်ကြွမြန်းလာတဲ့ ခြေတော်အစုံကို အာရုံရည်မှန်း ပူဇော်ရင်း မိဘကျေးဇူးကို သိတတ် ဆပ်တတ်နိုင်ကြပါစေကြောင်း ဆုမွန်တောင်းလိုက်ပါရစေ။
