Stoga

22/09/2024

Stoga har fått støtte frå Bufdir til et 3-årig prosjekt for inkludering av barn og unge i Bygland. Me har difor starta opp Stoga Kunstakademi (SKA), for elever i 8.-10. klasse i Bygland.
Kvar fredag 1445-1715, middag og frukt, gode samtalar og problemløysingar, diskutere idéar, le av nokre, og gjennomføre nokre.
Me har eit sceneoppdrag med jobbar med, eit teaterstykke som me gjerne vil sette opp, ei dukketeaterrigg under utforming, og andre små og store prosjekt, men viktigare er trivsel og å ha det gøy.
Ungdom som vil være med må sjølv sende ein søknad på papir, mail, lydfil, film, sms, bodstikke eller anna. Kva som skal stå i søknaden er opp til søkaren, men den må på eit eller anna vis forklare kven du er, og kvifor du søker.
Ungdom som er for unge eller for gamle, eller kjem frå ein nabokommune, kan óg søke og få plass om det ikkje fortreng nokon frå den primære målgruppa.
Kontakt: Olav Grendstad, 90 66 54 59

20/09/2024

Det kunne sjå ut som ein båt som hadde slete seg på fjorden i føremiddag. Men når ein såg nærare så låg det eit menneske oppi.

Kva som hender først, om hen får napp, må heim å ete, eller når land ved Haugå utpå kvelden, veit me ikkje, men idyllisk var det.

02/09/2024

Varsel om endra åtferdsmønster i Bygland

Frå fyrstkomande torsdag 5. september til og med 6. november vil omlag 10 personar i Bygland kommune i større eller mindre grad få endra åtferdsmønster. Dette har si årsak i innøving av årets revy i Bygland Dramatiske Selskab.

Det endra åtferdsmønsteret vil gje seg ulike utslag, men kan til dømes vere distraherande nynning på offentleg stad, bråe skifte i dialekt og talemåtar, ustabil fysisk framferd og grimasar som ikkje har naturlege forklaringar. Det kan òg være personar som talar muntert med seg sjølve med ord som omstillingskommune, mogelegheitsstudie, kommunedirektør, bubil og stut, spontan og til dels pinleg latter i upassande situasjonar, mental forvitring i møter og samtalar, og høglytt song ut or vindauget frå hus og bilar.

Grunna at dette òg kan gå ut over trafikktryggleiken langs riksveg 9, samt store og små sidevegar i perioden, vert bilistar som er kjenslevar for slik uønskt åtferd oppmoda om å køyre på vestsida av Otra frå Byglandsfjord til Ose. Nokre av desse omlag 10 held delvis til i Evje og Kristiansand, men på slike stader vil ikkje denne type åtferd skilje seg noko særskilt ut.

Føler du det generelt sett utrygt å reise gjennom kommunen i perioden, tilrår me å reise kollektivt med Setesdal Automobilruter, då sjåførane der er drilla i handsame slik åtferd, stundom med å take vedkomande med seg på bussen, og levere hen inn på kommunehuset til kontroll.

Vert du stirra intenst på med eit underleg smil, kjem inn i eit rom kor samtalen brått stoppar opp, eller nokon vil ha deg til å tale utan at dei verkar særskilt interessert i kva du seier, kan det være fare for at du vert handsama på revyen. Om du skulle lure på om det er tilfelle, eller om du berre vil sjå kva all denne uroa i menneskeleg åtferd fører til, skal revyen utspele seg 7.,8. og 9. november på Kulturscena i Bygland. I år har me utvida frå 2 til 3 framsyningar, då folk i aukande grad synest å sette pris at folk set sitt gode namn og rykte på spel for dette, og for som byglendingane plar seie når noko skjer, uansett om det er positivt eller negativt: Det er godt at det skjer noko.

Ynskjer du å verte med i denne flokken, (omlag som å sjå eit naturprogram og ynskje å være ein av dei som smyg seg rundt der i graset), kan du take kontakt. Frisleppet er allereie no til torsdag 1830 på Bygland Kulturscene.

Spørsmål elles omkring det midlertidige endra åtferdsmønsteret kan gjerast til Databutikken på Evje, som overvakar situasjonen nøye, og som òg administrere førehandssalet av billettar.

01/09/2024

Då er sumarsesongen over for i år, både for åkke og Bjoren, som hadde sin siste tur i dag, og som me er havnekontor for. Me har hatt ope kvar dag sidan 13. juni, og no skal det bli godt med litt meir ope for aire ting.

Me takkar alle som har vore innom i sumar, sjølv om dei fleste av dei ikkje les dette sidan det meste er turistar frå inn- og utland. Det har vore ei endelaus rekke av hyggelege samtaler, turistinformeringar og handlar med tilfeldige gjester både på veg nordover og sørover. Nytt i sumar er sal av snaizne ullkjolar, og strikka genserar og sokkar frå Siano, som har vore ein stor suksess. Elles er den mest bruka opningsreplikken til gjestane «Så koseleg det var her!» (på ulike språk og dialektar).

Det er aldri ein keisam dag på Stoga. Ein veit sjeldan kven som kjem innom. I dag kom av alle ting skjenkjekontrollen, på ein sundag føremiddag. Dei fann ikkje noko å skrive i rapporten sin. Ein kan vel tru at kontrolløren valgte tidspunkt av di han ikkje likte å skrive så mykje.

Ein nordlending kom inn. Han var i Setesdal for fyrste gong, syntest det var jævlig fint her, og tinga ein dobbel espresso.

Eit eldre ektepar som hadde hytte i kommunen kom innom. Dei hadde ikkje vore her sidan det var glasblåsing. Kona sa det var kommunen sin feil at det vart lagt ned. Dei kaupte 2 is, og mannen syntest det var dyrt.

Ein fyr frå Skien sa at dette var det finaste ladeplassen i Noreg. Han hadde klatra i Urdviki for ti år sidan, var storleg nøgd når han kunne kaupe kaffe latte med havremjølk, og lurte på om eg kjende til ei bok av Lars Saabye Christensen kor ein person hadde gått frå Evje via Kristiansand til Oslo. Det gjorde eg ikkje, men fann ut då eg googla etterpå at det var Notto Fipp.

Ei dame med trønderdialekt ville kaupe is, men ho fann ikkje noko ho likte. Ho fann ei bok som var gratis, og på veg ut fortalde ho at ho ei gong i tida hadde jobba på Byglandsfjord .

Ei lokal dame kom innom med ei venninne, og venninna tykte det var så fint med gamle møbler.

Eit dansk ektepar ville ha ein enkel og ein dobbel latte. Den enkle til kona måtte ha to sukettar i espressoen. Eg lagde som dei spurde om. Dei fylgde med under heile prosessen, men dei virka ikkje nøgde med noko. Dama tok skeia som var til syltetøyet og rørte rundt i latten sin, og la att skeia på disken med ein serviett under.

Eit lokalt ektepar kom innom og kaupte litt proviant for å lade opp til en tyttebærtur. Kona sa at det eigentleg ikkje var så viktig om dei ikkje fann så mykje.

Nokre av dei som var innom i dag hadde sett på TV og kommentera avdukinga av statua på torsdag, og synes det var artig at den vart køyrd avgarde rett etterpå. Eg sa at det syntest eg òg, og om dei ville sjå statuen, måtte dei berre fylgje med, og om naudsynt legge seg på hjul.

Dette var vel om lag halvparten av det som skjedde i dag, på ein sånn passe stille dag. Ein vert ikkje rik i kroner, men i opplevingar. Folk kjem inn døra kvar dag ho er open, og me gjer åkkes beste for at dei skal gå nøgde ut att. Det gjer dei fleste trur eg. Dei gjeng i alle fall ut att.

Framover vil det være ope fredagar og sundagar, og elles når det er arrangement av ymse slag. Kva det vert, veit me ikkje så mykje om, kan hende noko om ein som har sykla motbakkar i dalen, noko med Babettes gjestebod og anna smale arrangement.

Det gjeng an å leie Stoga til møter, seminar og anna, og me kan tilby guiding på museet, på turar i naturen, og aire plassar i kommunen på engelsk, tysk og på ulike norske dialektar.

Me driv turistinfo året rundt, og det er ein takksam og i enkelte høve ein morosam jobb. Å drive Stoga er ein livsstil, og gøy så lenge det varer. No er det haust.

Olav G
Dagleg leiar so kalla

27/08/2024

Prologen til Protestfestivalen skjer i Bygland til torsdag. Første post er på Stoga kl 13. Neste post er rett på utsida kl 18. Resten er på Kulturscena i skulekomplekset ein liten gåtur unna, kl 19., 20. og 21.

26/08/2024

Dette fyrste arrangementet på prologen på Protestfestivalen på torsdag fyrstkomande er av praktiske grunner flutt frå Kulturscena hit til Stoga.

Inngong kr. 200,- betalast i døra, og billetten gjeld då dei aire 4 arrangement resten av dagen, ved museet kl. 18, og på Kulturscena kl. 19, 20 og 21. Sjå protestfestivalen.no eller andre stader her på FB for meir info.

24/08/2024

Det er dagen for gåmålt på Bygland i dag. Filminnspeling på museet om dei reisande med scene frå 1690, og veteranbilløp innom museumsplassen for bilar eldre enn 30 år. Filminnspelinga er i gong, medan bilane kjem køyrande frå omlag 12:45. Då er desse to hendingane i gong samstundes, med mål om at korkje bilar er lydane deira skal blande seg inn i livet på 1690-talet.

Stoga er open som vanleg, ut august, kvar dag 11-17.

22/08/2024

19/08/2024

No til laurdag kjem det veteranbilar på rekke og rad oppover dalen, og alle kjem innom og tar ein stopp på museumsplassen, rett her ved Stoga.

Om du vil sjå dette, kan du rigge deg til rundt museumsområdet frå kl. 1230, og om du vil nyte dalens kan hende beste kaffe samstundes, så har me takagare (takeaway).

Fyrstkomande laurdag kan ein sjå veteranbilar på rekkje og rad gjennom Setesdal.

08/08/2024

No nærmar det seg. Avslutning på årets teaterkoloni i dag. Fri entre.

06/08/2024

Her i Bygland gjeng det føre seg. Velkomen no til torsdag kl. 17.

28/07/2024

Det er tida for å fly på heia, til dømes Setesdal vesthei.

Har du spørsmål om turer i vestheiane, kan me svare på det meste. Kom gjerne innom for ein turprat.

(Her eit sprang i går frå ein bogestein på Holteheii.)

23/07/2024

Gruvemysterium

Me på turistinformasjonen har fått inn ein spurnad om kor ei gruve ligg, eit lite sumarmysterium, som me vonar nokon kan hjelpe oss med. Det er ein Kenneth Hovestøl som spør. Han vil gjerne vitje gruva att. Han har nokre leietrådar og han skriv blant anna:
«… var med på "Bitterblue gruva" på midten av 90- tallet. Sammen med en gammel gullgraver og brødrene Thorsen fra Kragerø.
Jeg kan ikke huske hva bonden eller grunneier heter, dessverre. Og er heller ikke sikker på hvor i terrenget den ligger. Men ser ut som om det traktorvei opp dit nå.
Vi bodde på en gammel gård. På Lidi, tror jeg det var.
Det var bare en åpen gruve. Vi gutta boret med en gammel Pioneer boremaskin og en bonde som også kjørte buss, sprengte dynamitten.
Han gamle gullgraveren het Leif. Husker ikke etternavn. Men TV 2 var der oppe og laget et lite innslag. Men jeg finner ikke noe på tv2...
Vi bodde i et gammelt hus fra 1700-tallet. Og en som het Knut Brokke hadde bodd der. Vi kjørte et lite stykke oppover lia, forbi en som drev med Tiur og gikk noen 100 meter oppover i skogen.
Leif var hjerteoperert og bodde hele tiden oppe ved gruven. Vi gikk opp og ned hver dag.»
Me kan óg legge ut denne på andre stader her på FB, Gamle bilder i Bygland, Setesdal Sogelag og anna, men me tek det her fyrst, for å syne fb-fylgjarane kva slag spurnader me stundom fer inn, og kan hende me får svar allereie i fyrste fb-runde.

17/07/2024

Grunna usikkert vær, vert det gratis folkemusikk-konsert her i dag òg med Endre Stulien Robstad (biletet) og Kulturpatrulja. Konserten byrjar omlag kl 14.30, når Bjoren-passasjerane er attende på land og har fått kome seg i Stoga.

Konserten er altså gratis og alle er hjarteleg velkomne.

(Konserten i går var framifrå, med omlag 20-25 lyttande og særs imponera og nøgde folk frå ulike nasjonar i salen. Dei avslutta med applaus som ingen ende ville ta, før patruljesjefen tykte det var nok og gjekk av scena.).

(Foto Geir Daasvatn)

16/07/2024

Gratis konsert i dag kl. 14

med Kulturpatrulja, dalens kulturelle arv og mest talentfulle musikalske kulturformidlarar.

Alle hjarteleg velkomne. Her er god plass til alle.

Biletet er frå då dei var her forrige veke, då været i skipsleia til Bjoren ikkje gjorde det tilrådeleg å opptre på båten. Kulturpatrulja er alltid velkomne til Stoga.

(Foto: Geir Daasvatn)

14/07/2024

Denne snaisne ullkjolen er sumarens lille store schläger her på bruket. Kauparane var fyrst lokale, men har no vorte meir kontinentale.

Desse på bileta får me snart oppover, i tillegg til dei omlag 15 aire i ulike mønstre og fargar me har att på stativet. Handstrikka ullgensarar frå same leverandør har me òg.

(Ope kvar dag 11-17 minst)

10/07/2024

Første tur for året i dag kl. 12.

(Stoga er som vanleg ope frå kl. 11-17, og omlag kl. 14 kjem Kulturpatrulja)

10/07/2024

I dag kjem den flotte Kulturpatrulja til Stoga, og skal ha framsyning omlag kl. 14. Dei skulle ha vore på Bjoren, men været tillet inkje syssa aktivitetar ombord. Patrulja er alltiv velkomen til Stoga. Me ser fram til dette. Fri entré.