12/08/2021
آپ نو اور دس محرم الحرام کو تفریحی مقامات پر چھٹیاں منانے کے لئے جا رہے ہیں۔
ہماری دعا ہے کہ اللہ تعالیٰ آپ کو خیر سے لے کر جائے اور خیر سے لے کر آئے۔
آپ دس محرم کو اپنے پیاروں کو یاد کرنے کے لئے قبرستان چلے جاتے ہیں۔
ہماری دعا ہے کہ آپ کا یہ عمل قبول ہو۔
آپ محرم الحرام میں نکاح کرنا چاہتے ہیں۔
ہم دعا گو ہیں کہ آپ کی نئی زندگی خوشیوں سے بھرپور ہو۔
آپ خود کو مسلمان سمجھیں۔
ہم خود کو کافر تصور کر لیتے ہیں۔
بس التجا یہ ہے کہ جس طرح آپ اپنی زندگی میں سب کچھ کرنے کا حق محفوظ رکھتے ہیں۔
اسی طرح ہمیں بھی حق دیں کہ ہم آپ کی طرح ٹھنڈے مقامات کی سیر کرنے کے بجائے شدید گرمی میں سڑکوں پر آل رسول (ص) کا غم منا سکیں۔
آپ بیشک قبرستان جا کر اپنے پیاروں کا غم منائیں۔
اسی طرح ہمیں بھی حق دیں کہ ہم اپنے پیاروں کا غم بھول کر نبی کریم (ص) کے پیاروں کا غم منا سکیں۔
آپ بیشک نکاح کر کے زندگی میں خوشیاں لائیں۔
اسی طرح ہمیں بھی حق ہونا چاہئے کہ ہم مستوراتِ اہلبیت علیہ السّلام کے اجڑے سہاگوں کا ماتم کر سکیں۔
ہم آپ کو جیو اور جینے دو کی دعوت دیتے ہیں۔
ہم آپ کی محرم الحرام میں خوشیاں برداشت کر لیتے ہیں۔
آپ ہمارے غم برداشت کر لیں۔
آئیں ہم ایک دوسرے کو برداشت کرنے کا سلیقہ سکھاتے ہیں۔
آئیں ہم نبی کریم (ص) کی وراثت تقسیم کر لیتے ہیں۔
خوشیاں تم لے لو مگر غم ہمیں دے دو۔.
