13/09/2024
شمالی وزیرستان/ اتمانزئی مشران اور سیاسی رہنماؤں کی عسکری و سول حکام کے ساتھ جرگہ۔ امن و امان اور گیس پائپ لائن سمیت اہم نکات پر تفصیلی تبادلہ خیال
*سرکار کی جانب سے جی او سی سیون ڈویژن میجر جنرل عادل افتخار، ڈپٹی کمشنر یوسف کریم کنڈی، ڈسٹرکٹ پولیس آفیسر روخانزیب خان اور دیگر سول و عسکری حکام جبکہ اتمانزئی جرگہ کی جانب سے ملک نصراللہ خان، ملک اکبر خان، ملک جان فراز اور دیگر ملکان و سیاسی رہنماؤں نے جرگہ میں شرکت کی۔
اس موقع پر اتمانزئی مشران نے امن و امان اور دیگر مسائل پر مبنی 21 نکاتی ایجنڈے کے حوالے سے عسکری و سول حکام کو تفصیلی طور پر آگاہ کیا۔ جی او سی سیون ڈویژن میجر جنرل عادل افتخار نے جرگہ ممبران کو یقین دلایا کہ ان اتمانزئی قوم کے آئینی مطالبات کو ہرصورت پورا کیا جائے گا۔ انہوں نے کہا کہ امن و امان کا قیام ان کی اولین ترجیح ہے اور اس مقصد کیلئے پاک فوج دن رات کوشاں ہے جس کا احساس یہاں کی عوام کو بھی ہوا ہوگا۔ میجر جنرل عادل افتحار نے کہا کہ اگر ہم سب مل بیٹھ کر مسائل کو اسی طرح بات چیت کے ذریعے حل کرنے کی کوشش کریں تو امن و امان سمیت تمام مسائل با آسانی حل ہو سکتے ہیں۔
اتمانزئی مشران نے میجر جنرل عادل افتحار سے شمالی وزیرستان کی عوام کے بند شناختی کارڈز کی جلد بحالی، مرکزی شاہراہوں سے غیر ضروری چیک پوسٹوں کے ہٹانے اور لاپتہ افراد کی رہائی کا بھی مطالبہ کیا۔ ذرائع کے مطابق مذکورہ جرگہ انتہائی اہم رہا جس میں فریقین کے درمیان باہمی اعتماد اور تعاون کی فضا دیکھی گئی۔ اس حوالے سے فریقین نے عنقریب ایک اور جرگہ منعقد کرنے پر بھی اتفاق کیا۔
