03/10/2023
اس وقت پاکستان میں چالیس ہزار پاسپورٹ روزانہ کی بنیاد پر بن رہے ہیں یعنی اس سال ایک کروڑ کے قریب پاسپوٹ بنیں گے اور کم ازکم بیس لاکھ افراد ملک سے باہر چلے جائیں گے اور اپنے بچوں کو بہتر مستقبل دیں گے۔ بڑی خوشی کی بات ہے کہ لوگوں کو شعور آ رہا ہے کہ اپنے بچوں کو اچھا مستقبل دیں اور ظلم کی چکی میں مزید پسنے کی بجائے یہاں سے نکلیں. شاید آپ کو یہ وطن بے زاری لگے لیکن حقیقت یہی ہے کہ جس گھر کا کوئی فرد بیرون ملک ہے وہی قدرے بہتر زندگی گزار رہے ہیں۔ جس ملک میں کسی مخصوص طبقے کا زندگی پر حق ہو وہاں سے کم ازکم عارضی طور پر ہجرت کر جانی چاہیے. اللہ کی اتنی بڑی زمین پر جہاں 246 ممالک، آٹھ ارب انسان بستے ہیں آپ کے لیے بہت مواقع ہیں.
آپ درخت نہیں کہ ایک جگہ سے دوسری جگہ نہیں جا سکتے ہیں۔ پہلی ترجیح کینیڈا، امریکہ، آسڑیلیا رکھیں. دوسری ترجیح یورپ تیسری گلف ممالک، چوتھی ویتنام، تائیوان، کمبوڈیا اور پانچویں ترجیح ازبکستان، کرغزستان رکھیں. لیکن یہاں سے ضرور نکلیں گھٹ گھٹ کر نہ مریں حسرتوں والی زندگی نہ گزاریں. چھوٹی چھوٹی جائز خوشیوں کے لیے نہ ترسیں نہ بچوں کو ترسائیں. دو یا تین دوست ملکر کر نکلیں تو زیادہ بہتر ہے۔ پاکستان سے کم پیسوں میں کامیاب کاروبار کیا جا سکتا ہے۔ جہاں جا سکتے ہیں چلے جائیں کم از کم موجودگی حالات سے بہتر زندگی گزاریں گے.
آپ نے ٹھیکہ نہیں لیا ہوا کہ بارہ گھنٹے کام بھی کریں لوڈ شیڈنگ بھی برداشت کریں دنیا کی مہنگی ترین بجلی بھی خریدیں سولر کا انتظام خود کریں۔ گرمیوں میں بھی گیس لوڈشیڈنگ دیکھیں ملاوٹ شدہ چیزیں کھائیں، انتہائی آلودہ اور غیر صحت مند ماحول میں رہیں. بچوں کو غیر معیاری تعلیم دلوائیں ہر وقت اس خوف میں مبتلا رہیں کہ کوئی بچوں کو اغوا نہ کر لے بچوں کو دکان پر بھیج کر جان مٹھی میں آئی رہے
کیوں؟
باقی دنیا میں بھی آپ بارہ گھنٹے کام کرتے ہیں تو آپ کے بچے اور آپ سکون کی نیند سوتے ہیں شور شرابے سے پاک زندگی نہ ہڑتالیں نہ روڈز بند معیاری تعلیم بچوں کا اچھا مستقبل نہ لوڈ شیڈنگ نہ گیس کی بندش نہ سیکورٹی کے مسائل نہ سرکاری دفتروں کے چکر
آپ کم پڑھے لکھے ہیں تو کوئی ایک سکل سیکھ کر ملک سے نکل پڑیں انوسٹمنٹ ہے تو چھوٹے بزنس کا سوچیں تعلیم یافتہ ہیں تو اپنی کمیونیکیشن بہتر کریں اپنی فیلڈ کا تھوڑا بہت تجربہ لیں اور کمر کس لیں.
اللہ پاک ہجرت آسان بنائے.
