09/10/2017
بتأهل منتخب مصري لكأس العالم 🏆 ناس كتير حتفكر تروح تشجع مصر في روسيا
احنا هنعرفك خطوة بخطوة ازاي تشتري تذاكر المباريات
أول خبر حلو أنك مش محتاج تأشيره لدخول روسيا لو اشتريت تذاكر حضور المباريات , الخبر التاني مش محتاج تصريح أمني و لا اجراءات أمنيه للسفر , يعني زي الباشا تشتري التذاكر و تحجز تذكرة الطيران و تحضر أحلى مباريات في روسيا
مجرد ما تشترى تذكره مباره واحده وتعمل fan id بقيت مؤهل انك تدخل روسيا
اولا : حتدخل على موقع الفيفا الرسمي و تسجل عليه بايميل و باسوورد و تشتري التذاكر من الموقع ده : https://goo.gl/P8JSvB
ثانيا : تختار بلد اقامتك و بلد جنسيتك
ثالثا : اختيار نوع التذاكر , حيكون ليك 3 أختيارات:
أما أنك تختار ماتشات في مدينة معينه في روسيا
أو تختار ماتشات مجموعه معينه
أو تختار ماتشات فريق معين
حنفترض أنك حتختار ماتشات فريقك ( مصر ) , حيكون أمامك 5 أختيارات مختلفه بناء على عدد التذاكر بتبدأ من أول 3 تذاكر ( لحضور 3 ماتشات المجموعة الأولى ) و أقل سعر ليها حاليا 347 دولار لل 3 ماتشات في الدرجة الثالثة , و الاختيار اللي بعدها 4 تذاكر ل 4 ماتشات ( 3 ماتشات الدرجة الثالثة + ماتش الدور ال 16 ) و بتوصل لحد 7 تذاكر ( متضمنه نهائي كاس العالم ) , أو ممكن تختار حضور ماتش واحد فقط و ده بيبدأ سعره ب 105 دولار و لكن ده لازم تحدده مسبقا وقت الحجز , و لو حبيت تحضر ماتش الافتتاح سعره 220 دولار
رابعا : حتختار عدد التذاكر اللي عاوز تشتريها ( لكل أكونت الحق في شراء لحد 4 تذاكر ) , و لكن لازم يتم تحديد بيانتهم في عملية الحجز و هيا غير قابله للالغاء أو التعديل في المستقبل
خامسا : حتوصل لصفحة check out و تدخل بياناتك بالكامل و العنوان اللي حيتم شحن التذاكر ليه
أخيرا : حتوصل لصفحة الدفع , حتحط بيانات الكريدت كارد و تدفع تمن التذاكر اللي تم اختيارها
في المرحله الحاليه لن يتم خصم سعر التذاكر من الكريدت كارد و لكن حيوصلك ايميل بتأكيد الحجز و لو وقع عليك الاختيار حيتم خصم المبلغ خلال شهر, لأننا حاليا في فترة الاختيار العشوائي لأصحاب التذاكر ذات السعر المنخفض و دي بتكون أقل سعر لتذاكر المباريات
بعد خصم المبلغ فعليا و تأكيد حصولك على التذاكر تقدر تدخل تعمل ال Fan ID و دي اللي حتخليك تقدر تدخل روسيا بدون فيزا و كمان حتديلك صلاحية لاستخدام المواصلات العامه في روسيا مجانا و الكارت ده حيوصلك لحد بيتك مجانا
طريقة التقديم على ال Fan ID:
تدخل على الموقع ده https://goo.gl/vTXQy8
بتعمل application وهتكتب بياناتك بالكامل و تعمل upload لصورة شخصية حديثة و رقم التذكرة او رقم order التذكرة اللي وصلك على الايميل بعد شراء التذاكر ( ملحوظة : مش حتقدر تعمل ال Fan ID الا بعد شراء التذاكر و دفع تمنها على الموقع فعليا )
