20/07/2024
Hello မတွေ့တာကြာပြီနော် အလုပ်မအားလို့အမြဲ Active မဖြစ်တာနားလည်ပေးပါဦး ဒီတစ်ခါမျှဝေပေးချင်တာက "ပိုလှတဲ့မနက်ဖြန်"ဆိုတဲ့စာတိုလေးပါ....
"ပိုလှတဲ့မနက်ဖြန်"
မနက်ဖြန်ကိုလူတိုင်းပိုင်ဆိုင်နိုင်မှာမဟုတ်ပေမယ့် လူတိုင်းက မနက်ဖြန်အတွက်ကြိုးစားနေကြပါတယ်။ ကျောင်းသားတစ်ယောက်ဟာ သူ့ဘဝအတွက်ကောင်းမွန်တဲ့ဘဝရဖို့ ပညာကိုကြိုးစားသင်နေသလို လူနာတစ်ယောက်ဟာလည်း သူ့အတွက်မနက်ဖြန်ရဖို့ ဆရာဝန်တွေနဲ့အတူ ကြိုးစားကုသနေတာကိုလည်း ဆေးရုံတွေမှာတွေ့ရမှာပါ။
ဘန်ကောက်ရောက်တော့ ဟိုဟိုဒီဒီလျှောက်လည်ရင်း ကယားဝက်အူချောင်းဝယ်ချင်တာနဲ့ပဲ KhlongToei Market ရောက်သွားတယ်။ အများဆုံးမြန်မာတွေတွေ့ရတယ်။ ဒါပေမယ့် အများစုက တိုင်းရင်းသားတွေပါ။ သူတို့ကိုမေးကြည့်တော့ ပန်းရံအလုပ်၊ကျပန်းအလုပ်တွေလုပ်ကျတယ်တဲ့။ လုပ်ခလစာကလည်းအင်မတန်နည်းပါတယ်။ ဒါပေမယ့်သူတို့ရဲ့မနက်ဖြန်အတွက် သူတို့ကြိုးစားနေကြတယ်။
ရတဲ့လုပ်ခစာနဲ့မနက်ည လောက်အောင်စားဖို့ရယ်၊ အဆောင်ခရယ်ကို ကာမိအောင်အတော်ရုန်းကန်ရတယ်လို့ပြောပါတယ်။ အဆင်မပြေလို့ပြန်မယ်လုပ်တော့လည်း နေစရာအိမ်မရှိတော့ဘူး။ တချို့နေရာကစစ်မြေပြင်ဖြစ်နေတုန်းပဲ။ တချို့ကလည်းတရားမဝင်တဲ့ပုံစံမျိုးနဲ့ ဒီမှာနေနေကြရတာ။ ပြန်ပို့ခံရမှာလည်း စိုးပါတယ်။ သောကအပူတွေနဲ့ ရှင်သန်နေထိုင်ကြရပါတယ်။ ဒါပေမယ့်အကောင်းဆုံးရှင်သန်နေကြတယ်။ အကောင်းဆုံးရှင်သန်ကြရတယ်။ သူတို့မှာမျှော်လင့်ချက်တွေရှိတယ် ပိုကောင်းတဲ့မနက်ဖြန်အတွက်ပေါ့။
အမှန်အတိုင်းပြောရရင် အဲ့အချိန်ဟာ ကိုယ်တွေအလုပ်ရဲ့ Bonus နဲ့ပတ်သတ်ပြီး အလုပ်ထွက်ချင်စိတ်ဖြစ်နေခဲ့တာပါ။ အလုပ်ပြောင်းဖို့အတွက်လည်း တစ်ခြားအလုပ်လည်းရှာနေပေမယ့် မတွေ့သေးတဲအချိန်ပါ။ ဆိုတော့ ခွင့်ယူပြီးစိတ်ထွက်ပေါက်အနေနဲ့ခရီးထွက်လာခဲ့တာပါ။ ခြေဦးတည့်ရာသွားမယ်။ ရောက်တဲ့ Hotel တည်းမယ် စသည်ဖြင့်ပေါ့။ ဒါပေမယ့် သူတို့နဲ့ကြုံတွေ့ရပြီး ကိုယ်ထက်အခြေအနေဆိုးတဲ့သူတွေရှိပါသေးတယ် အားတင်းထားပါဦးဆိုတဲ့ စိတ်ကလေးရခဲ့ပါတယ်။ သူတို့ကိုလည်း ပိုစာနာမိခဲ့ပါတယ်။ ဒါကြောင့်လည်း ဒီခရီးစဉ်လေးကို Sympathy Trip လို့မှည့်ခဲ့တာပါ။
ဒီကာလကြီးမှာ အားလုံးရဲ့မနက်ဖြန်ကခက်ခဲနေကြပါတယ်။ ပြည်တွင်းကလူကခက်ခဲသလို ပြည်ပကလူတွေလည်း ခက်ခဲနေကြပါတယ်။ အနေအစားဆင်းရဲစွာနဲ့ ရှင်သန်နေကြရပါတယ်။ တချို့အဖိုးအဖွားတွေဆို သူတို့အခုအသက်အရွယ်အထိမကြုံဖူးတဲ့ ဘေးဒုက္ခကို ရင်ဆိုင်နေရတယ်လို့ မှတ်ချက်ပေးကြပါတယ်။ လူငယ်လူရွယ်တွေရဲ့လုပ်အားတွေလည်း အဆုံးအရှူံးခံနေရပါတယ်။ ပညာတက် ပညာရှင်အများစုကလည်း သူများနိုင်ငံမှာ အခြေအနေမပေးတဲ့အတွက် အခြေခံအလုပ်တွေနဲ့လုပ်နေကြရတာတွေကလည်း မျက်မြင်ပါပဲ။ ပိုလှတဲ့မနက်ဖြန်ဖြစ်ဖို့ မျှော်လင့်ရင်း ကြိုးစားကြတယ်။ မျှော်လည်းမျှော်လင့်ကြတယ်။
အခုအချိန်မှာကျွန်တော်တို့ရဲ့မနက်ဖြန်ဟာ ဒီနေ့ထက်ပိုဆိုးချင်ဆိုးမယ် ဒါပေမယ့် အကောင်းဆုံးရှင်သန်ကြတယ်။ ဒီကြားထဲမှာမှ အခက်အခဲကြားထဲအချင်းချင်းဖေးမကူညီနေကြရင် မနက်ဖြန်တွေဟာ ပိုလှလာနိုင်ပါတယ်။ အမှောင်ထုကြီးစိုးနေတဲ့ ညပြီးဆုံးသွားရင် ရောင်နီသာတဲ့နေ့သစ်တစ်နေ့ကိုရရှိလာမှာကိုမျှော်လင့်ရင်း......
မောင်မင်းခေါင်
၂၀.၇.၂၀၂၄
゚
