18/08/2023
Tuug ayaa soo galay guri ay ku jirto Naag waayeel ah saqda-dhexe habeenkii , markii ay aragtay tuugii inuu soo galay gurigeeda, weliba ay ogaatay inuu tuug yahay, waayeeshii waxey bilowday iney qeyliso, oo ay leedahay : “ isoo gaar Cabbuudow ”.
Tuugii ayaa arkay waayeeshii oo qeylineyso, inta aayar u soo dhawaaday ayuu ku yiri “ aamus, maxaad u qeylineysaa duqyaheey !?.”
Waxay ugu jawaabtay : “ Wiilkeygiyoow waxaad u egtahay wiil wanaagsanoo la ixtiraamo, laakiin duruuftu waa waxa kugu qasbay inaad wax xaddo waqtigaan ee saqda-dhexe ah, ee bal idhegeyso wiilkeygiyoow, waxaan haystaa lacag iyo jawharad badan, ee iyaga qaado, qeylada aan qeylinayey waxey eheed; riyo ayaan ku dhex jiray, la argagaxay, aan ka hurdi waayay, ee riyada ii micneey / ii fasir wiilkeygiyow ! ”.
Tuugii ayaa yiri: “waa yahay ee iisheeg riyada aad ku riyootay , aan kuu fasiree ”. Waxey u sheegtay riyadii ay ku riyootay, waxey tiri: “ anigoo socdo webiga qarkiisa, si lama filaan ah ayaa lugta ii baxday, dhagax halka yaalay ku simbiririxooday, waxaan ku sigtay inaan ku dhaco webiga, kor baan u qayliyey : isoo gaar Cabbuudow, isoo gaar Cabbuudow, isoo gaar Cabbuudow ! ”.
Tuugii ayaa yiri : “ waa kuma Cabbuud 🤔🤔🤔 ”. Si lama filaan ah ayaa Cabbuud-kii soo galay qolkii duqda iyo tuuga kuwada jireen sidii gantaal lasoo gamay oo kale.
Tuugiina halkaa ayaa lagu qabtay, laguna xirxiray si saldhiga loo geeyo. Tuugii asigoo ku calaacalaya " duqdaan wey iga caqli badisay, uma immaanin inaan riyo fasiro, ee waxaan u imid xattooyo ”...
Waayeeshii waxey ku tiri “ ka baro dadka, Cabbuud waa wiilkeyga !!! ”...
𝗗𝘂𝗹𝘂𝗰𝗱𝗮 𝗦𝗵𝗲𝗲𝗸𝗮𝗱𝗮: marmar qaarkood waxaa lagu badbaadaa farsamo caqliyeysan sida duqda ay sameysay oo kale.
Guuleysta saaxibayaal.
✍️W/T: Ahmed Abdi Ali ....
