27/02/2020
250 دولار !! ..ليه؟!
انا عدى عليا كده 10 شهور تقريبا في تركيا
من اول اسبوع عرفت حاجة هنا وبقيت اشوفها كل يوم لحد اللحظة اللي بكتب فيها البوست ده..
اول ما جيت قابلني موضوع الاقامة
فسالت بتتعمل ازاي وبكام .. طبعا فيه ناس كتير بتعمل الاقامة
اصلا انت ممكن تعملها لنفسك! بس ممكن يكون عندك شوية نقص معلومات او مبتعرفش تتعامل مع الكمبيوتر والنت كويس .. لكن الاقامة مش حوار يعني
الحوار بقى في تفاوت التكلفة من مكتب لمكتب او من شخص لشخص!!
انا سمعت ارقام خيالية فعلا بس مش هكلمكم عنها
خلينا نتكلم عن الـ250 دولار تكلفة "الاقامة سنة" مع اكبر جهة بتشتغل في الحاجات دي والرقم مكتوب كده في وشك اول ما تدخل على اي حاجة تخصهم ومكتوب كمان ان الـ250 دولار دول غير الضريبة !! متاخد اعضائي تبيعهم بالمرة!!
معلش بس سؤال .. 250 دولار ليه؟! (بصوت شوبير)
انا في الاخر عملت اقامتي بـ200 ليرة اقسم بالله + الضريبة فقط
250 دولار = 1400 ليرة
احنا بنتكلم في كام ضعف كده؟! .. ليه الفجوة دي كلها؟!
هوا مش خير ولا ايه ياجدعان؟!
مش الاقامة دي الكارت الاحمر اللي بنحطة في المحفظة ومبنعملش بيه حاجة مفيدة.. 250 دولار ليه .. يام نياظي صحي نياظي اساليه 250 دولار ليه؟!!!
هيا دي الحاجة اللي عرفتها .. ان الكوكب ده فيه ناس مجتهدة وفيه ناس جزارين
ناس بتكسب طبعا بس بما يرضي الله
وناس بتدبح اي حد يجي تحت ايديها!!
وقيس على كده كل حاجة .. خدمات سياحية وعقارات وخدمات طلابية والتجارة والبيع والشراء وكل حاجة .. طيب ما نتعامل مع المجتهدين المشكلة فين..
المشكلة ان المجتهدين دول بيعانو بشدة في جانب التسويق ومش عارفين يوصلو للناس ولانهم مش جزارين فصعب عليهم يصرفو على التسويق
اما الجزارين فضاربين السوق كله وواصلين لكل الناس ومعندهمش مشكلة يصرفو كتير على التسويق وممكن يخسرو كمان علشان يحتفظو باحتكارهم للسوق .. وايه يعني لما يخسر شوية في الاعلانات مهوا بيكسب كتير جداااا
وعليه.. فاحنا قررنا نعمل موقع خدمات
هنوصلكم بالمجتهدين وهنعرض عليه الخدمات بافضل جودة مع اقل سعر ممكن ان شاء الله.
