09/16/2022
මාර්ගගත ( Online ) ක්‍රමයට මැණික් සහ ස්වර්ණාභරණ ජාත්‍යන්තර වෙළෙඳපොළට අපනයනය කිරීමේ ක්‍රමවේදයක්
ඇමෙරිකානු ඩොලර් 3000ක් දක්වා වූ වටිනාකමින් යුතු මැණික් සහ ස්වර්ණාභරණ මාර්ගගත ක්‍රමය ඔස්සේ අපනයනය කිරීමට හැකි ක්‍රමවේදය පසුගියදා ආරම්භ විය.
වැවිලි කර්මාන්ත හා කර්මාන්ත අමාත්‍ය වෛද්‍ය රමේෂ් පතිරණ මහතාගේ ප්‍රධානත්වයෙන් ගාල්ලේ දී මෙම ක්‍රමවේදය ආරම්භ කෙරිණි.
මෙම ක්‍රමය මගීන් ශ්‍රී ලංකාවේ ඕනෑම තැපැල් කාර්යාලයක් මගින් ශ්‍රී ලංකා රේගුවේ මුලික අවශ්‍යතා ඉටුකර ගැනීමෙන් පසුව ජාතික මැණික් හා ස්වර්ණාභරණ අධිකාරියේ වෙබ් අඩවියට පිවිසීමෙන් මැණික් සහ ස්වර්ණාභරණමාර්ගගත ක්‍රමය ඔස්සේ අපනයනය කිරීමට දිවයින පුරා එහි නියුතු ව්‍යාපාරිකයන් හට අවස්ථාව හිමිවේ.
තවදුරටත් සුළු සහ මධ්‍ය පරිමාණ මැණික් සහ ස්වර්ණාභරණ ව්‍යාපාරිකයින් අපනයන ක්ෂේත්‍රයට ආකර්ෂණය කර ගැනීමත් සමාජ මාධ්‍ය සහ මාර්ගගත වෙබ් අඩවි යොදාගෙන මැණික් සහ ස්වර්ණාභරණ අලෙවි කිරීම සදහා පෙළඹවීමක් ඇති කිරීමත් මෙම ක්‍රමවේදය ක්‍රියාත්මක කිරීම තුළින් අත්පත් කර ගැනීමට අපේක්ෂිත අරමුණු අතර වේ.
මෙම අවස්ථාවට අමාත්‍යංශ නිලධාරීන් , මැණික් හා ස්වර්ණාභරණ අධිකාරියේ සභාපති ඇතුළු නිලධාරින්, ශ්‍රී ලංකා රේගුව, ශ්‍රී ලංකා තැපැල් දෙපාර්තමේන්තුව,ශ්‍රී ලංකා රක්ෂණ සංස්ථාව, ආදි ආයතනයන්හි නිළධාරින් , ප්‍රාදේශීය දේශපාලන අධිකාරිය , මැණික් මැණික් සහ ස්වර්ණාභරණ ව්‍යාපාරිකයන් ඇතුළුසම්භාවනීයන් රැසක් එක්ව සිටියහ.
