Creatova

12/01/2023

استراتيجية الأرقام المتساوية والعشوائية.. كل شئ مدروس 👌

جرب كدة تدخل على مواقع نايكي واديداس وشوف تسعير المنتجات عندهم عامل ازاي، هتلاقي الأسعار كلها أرقام مقفولة، هتلاقي مثلا الأسعار كلها زي 3499، 3249، 1749..

طب جرب بقى تدخل على قسم التخفيضات في نايكي وشوف التسعير عامل ازاي، هتلاقي أسلوب التسعير مختلف تماماً وهتلاقيها أرقام عشوائية كلها بتنتهي بفصلة 97، أو فصلة 78 زي كدة 824.76 أو 974.78

طبعاً كشخص عادي طبيعي انها تعدي عليك كدة، لكن كماركتير حاجة زي دي مش لازم ابداً تعدي عليك لأن اللي شوفته ده وراه استراتيجية تسعير مهمة جداً اسمها Odd-Even Pricing Strategy

الـ Odd والـ Even هما حاجتين مختلفتين عكس بعض، الـ Odd Strategy معناها انتهاء السعر بكسر وغالباً بيكون بأعداد فردية زي 1 و 3 و 5 و 7 و 9، والـ Even Strategy معناها رقم متساوي مقفول.

في مواقع نايكي وأديداس الرئيسية هتلاقيهم مستخدمين الـ Even Strategy في التسعير، ودي استراتيجية تسعير بيتم اللجوء ليها لما البراند يحب يظهر ان المنتجات بتاعته منتجات بريميوم بكواليتي عالية، لأن الأرقام المقفولة في علم النفس بتوحي بارتفاع القيمة.

أما الأرقام العشوائية اللي بتنتهي بفواصل فردية بتوحي بانخفاض السعر وان في عرض ما هيفوتك، علشان كدة هنلاقي كل الأسعار في قسم التخفيضات بتتبع الـ Odd Strategy.

علشان كدة لو بصيت على كل البراندات اللي بتبيع منتجات للفئات المتوسطة اذا كان لبس او اكل هتلاقيهم كلهم بيتبعوا الـ Odd Strategy وأسعارهم كلها بتكون ارقام عشوائية بتنتهي بفصلة 99، بعكس المنتجات اللي بتبيع منتجات Luxury هتلاقي أسعارها أرقام مقفولة.

#كرياتوفا

29/12/2022

الراجل ده اسمه دان برايس صاحب شركة Gravity Payments مقرها في سياتل، الولايات المتحدة واللي اتأسست سنة 2004، الشركة دي شغالة في الـ Fintech او التكنولوجيا المالية.

دان برايس مليونير وأرباحه الشخصية في السنة بتوصل لمليون دولار، في 2019 كان بيحتفل مع موظفيه ال 120 بفتح مقر جديد للشركة واعلن عن اعلان صدم الكل.

الراجل قال انه هيقص مرتبه السنوي بنسبة 90% من مليون دولار ل 100 الف دولار بس ، وقصاد ده هيعلي جميع مرتبات موظفينه ال 120 لحد أدنى 70 الف دولار في السنة، في حين ان المرتبات في وقتها عنده كان لا تتعدى ال 30 الف دولار.

يعني أقل موظف في الشركة هيكون راتبه 70 ألف دولار في السنة

في لقاء مع CNN المذيعة بتسأله انت ليه عملت كده؟

قالها انه بيدرس القرار ده بقاله سنين، وان ال 70 الف دولار دول هما الحد الأدنى للحياة الكريمة من وجهة نظره اللي مفهومها مبيقفش بس عند توفير الاساسيات، الحياة اللي تتيح لشخص بيت وعربية وتعليم جيد لأولاده ورصيد في البنك وسفر، والمبلغ ده كمان مينمم ان الشخص يبقى مبسوط في حياته.

دان برايس قال ان الموظفين دول بيشتغلوا في المقام الاول علشان الفلوس والحياة الكريمة، فمجرد ماتوفرلهم ده هيبدعوا بشكل اكبر بكتير لأن المكان ده بقى بالنسبالهم الأمان، ودي مش اول مرة يعملها، عملها مرة في 2015 بس كان المبلغ اقل من كدة بكتير.

قال كمان انه مليونير ومش هيفرق معاه المبلغ ده دلوقتي، في حين انه هيفرق جامد مع الموظفين، وانه بيستعد للوصول للحظة دي من سنين.
دان بيدعوا جميع الشركات في امريكا انها تعمل زيه ويخلوا مينمم الرواتب 70 الف دولار في السنة.

#كرياتوفا

25/11/2022

خليك متابع 👇

23/11/2022

ازاي غيرت سيارة البيتل اللامؤخذة الألمانية شكل تسويق السيارات في الستينيات 👇

سنة 1960 وبعد الحرب العالمية الثانية بـ 15 سنة، الولايات المتحدة كانت متربعة على عرش السيارات في العالم بلا منافس وده الوقت اللي اتشهرت بيه عربيات أمريكا باسم American Muscles او العضلات الأمريكية بسبب قوة العربيات دي زي فورد ودودج وشيفرولية وغيرهم.

تسويق السيارات في الوقت ده كان تقليدي جداً لأبعد الحدود، التسويق كان عبارة عن اعلانات طويلة عريضة مليانة بمواصفات العربية الكاملة من الألف للياء مع صورة العربية.

المستخدمين في العالم في الوقت ده كانوا بيحبوا جداً العربيات الضخمة والكبيرة ذو الأداء القوي جداً وده اللي كان متوفر في العربيات الأمريكية، وده طبعاً وبكل تأكيد كان بعيد كل البعد عن عربية البيتل اللامؤخذة الألمانية.

عربية البيتل من فولكس فاجن عربية صغيرة جداً وضعيفة جداً جداً ومفيهاش ربع مواصفات العربيات الأمريكية، والجماعة اللامؤخذة الألمان كانوا عارفين انهم علشان يبيعوا العربية دي لازم يبدأوا في تغيير ثقافة الناس تجاه العربيات، وان العربيات الكبيرة والضخمة مش دايماً هي الاختيار الأفضل ليهم.

علشان يعملوا ده كان لازم يغيروا نظرتهم تجاه العربيات الصغيرة من غير مايحسسوهم انها صغيرة، فكان استخدام أسلوب الـ Minimal Design في الإعلانات هو العامل الرئيسي.

أسلوب الـ Minimal Design هو واحد من أعظم أساليب التصميم على الاطلاق، لأنه بيعتمد على المساحة السلبية او الـ Negative Space في التصميم علشان يصب تركيزك كله على المنتج ويحسسك بعظمته.. وده نفس أسلوب التصميم اللي آبل شغالة بيه من سنين طويلة.

التصميم بيكون عبارة عن فراغ تام مع صورة بجودة عالية للمنتج فقط مع الرسالة التسويقية اللي عاوز توصلها، اللي بيعمله أسلوب التصميم في العقل بيسموه في علم النفس بالـ Gestalt Theory، و Gestalt كلمة لامؤخذة ألمانية بمعنى Shape او Form..

النظرية دي بتقول ان المساحة السلبية اللي بتحيط بالعنصر بتحفز العقل وتنشطه وبتديله إحساس زائف بالهدوء والراحة وده اللي بيخلي العقل يصنف العنصر اللي موجود في التصميم انه شيء جميل وجذاب.. وده بالظبط اللي بتحسه لما بتبص على أي تصميم معمول بالـ Minimal Design، بتحس انك مبسوط.

ودي كانت كلمة السر في إعلانات عربية بيتل اللي غرقت الجرايد والمجلات والشوارع وقتها، كل تصميمات الحملات الاعلانية كانت بالـ Minimal Design مع رسائل تسويقية مختلفة، زي ان العربية الصغيرة هي الأفضل على الاطلاق للمدينة، والأوفر في استهلاك البنزين وقطع الغيار.

ده غير انهم لعبوا على تصميم العربية اللي كان واحد من أسوأ تصميمات العربيات وفتحوا فيه اقتراحات كتير باللعب في الألوان زي مانت عاوز.

الحملة التسويقية دي كانت بعنوان Think Small، في رسالة واضحة وصريحة ان مش دايماً العربيات الكبيرة هي الاختيار الأفضل وتغيير مفهوم العربيات عند العميل.

فولكس فاجن وعلى مدار سنين قدرت تغير دماغ الناس وتوجه اختياراتهم ناحية العربية البيتل لدرجة انها بقت العربية الأكثر مبيعاً في العالم لحد أواخر التسعينات، ومن بعدها العربيات الصغيرة بقت تنتشر ويبقى ليها سوق كبير في كل دول العالم.

شركات كتير جداً لحد وقتنا ده بتتبع الـ Minimal Design واستراتيجية الـ Negative Space في تصميماتها وحملاتها التسويقية أكبرهم وأبرزهم زي ماقولنا شركة آبل واللي خدت الموضوع لسكة تانية خالص، وبدأت تطبق أسلوب التصميم ده في سوفت وير الأجهزة وتصميم الهاردوير مش بس في الإعلانات والحملات التسويقية.

#كرياتوفا

17/11/2022

واحدة من أعظم حملات التوعية في كندا ❤️

في سبتمبر 2008 في مدينة فانكوفر الناس صحيت الصبح لقت لانشات انقاذ متعلقة على واجهات أشهر المباني في المدينة، اللانشات دي مكتوب عليها Stop Global Warming، يعني أوقفوا الاحتباس الحراري.

اللي علق اللانشات دي بالشكل ده هي منظمة Offsetters الكندية للتوعية بمخاطر التغير المناخي، وده بعد ما مظاهر الاحتباس الحراري بدأت تظهر على المدينة بسبب كثرة الانبعاثات الكربونية اللي جاية من عوادم السيارات، وقلة المساحات الخضراء.

ولأن فانكوفر مدينة ساحلية فمخاطر الاحتباس الحراري والتغير المناخي هتظهر عليها أول حاجة وده اللي ممكن يتسبب في فيضانات كبيرة تغرق المدينة كلها بناء على توقعات الباحثين خلال الـ 100 سنة الجاية واللي ممكن يخلي المدينة تختفي من على الخريطة.

تم وضع اللانشات دي بالشكل ده في دلالة على حدوث الفيضانات دي عاجلاً ام آجلاً وان المدينة بدأت تستعد لحدوثها من بدري وان ده الوقت المناسب لتغيير السلوكيات الغير صديقة للبيئة.

الحملة دي واحدة من أعظم حملات التوعية او الـ Awareness Campaigns اللي اتعملت لأنها بتحقق تقريباً كل عناصر نجاح حملة التوعية..

أول عنصر هو الـ Attention، يعني ايه الفكرة اللي هتنفذها وهتجذب بيها انتباه الناس كلها واما تخلي عندهم فضول يعرفوا ده ايه وليه، واما تخليهم منبهرين من الفكرة والتنفيذ .. وده اللي حصل في الحملة دي واللي جمعت بين الأمرين.

تاني عنصر وهو Engagement يعني الناس هتتفاعل معاك ازاي، بما ان الحملة هي حملة توعية فانت بتتكلم في قضية معينة، فازاي تتناول القضية دي من زاوية جديدة وابداعية تخلي الناس تتفاعل عليها.. وده اللي حصل.

تالت عنصر وهو الـ Call to action، مفيش حملة بتكمل أهدافها من غير CTA او Call to Action حتى لو كانت حملة توعية، وده معناه انت عاوز من الناس ايه بالظبط؟ بعد ماجذبت انتباههم وخليتهم يتفاعلوا معاك لازم تطلب منهم حاجة.. وده اللي حصل فعلاً في الحملة دي وكان الـ CTA واضح جداً وهو Stop Global Warming.

الحملة دي قدرت تاخد انتباه الناس والميديا كلها في الوقت ده وحققت نجاح كبير جداً مش بس على مستوى كندا، بل على مستوى العالم.

#كرياتوفا

11/11/2022

جيل التمانينات والتسعينات هما اللي عارفين شركة Compaq كويس اوي، الشركة اللي كانت بتصنع واحد من أقوى لاب توبات العالم وقتها اللي بيتميز بقوته وسرعته واعتماديته..

شركة كومباك اتأسست سنة 1982 وتم الاستحواذ عليها سنة 2002 من شركة HP بعد ماسقطت سقوط مدوي، بهبوط في قيمة السهم من 51 دولار لـ 12 دولار، وديون تقدر بـ 2 مليار دولار، وللأسف HP مقدرتش ترجع اسم كومباك للمنافسة تاني بعد سنين من المحاولة، لحد ماتم قتل البراند تماماً.

ايه اللي حصل؟

كومباك بعد مابقت متربعة على عرش أجهزة الكمبيوتر في التمانينات ونص التسعينات، الإدارة طمعت وحبت تسيطر على كل السوق، في ظل وجود منافسة من شركات ضخمة زي مايكروسوفت و IBM وديل، كل شركة فيهم متخصصة في حتة ومسيطرة عليها.

الشركة وصل قيمتها لـ 100 مليون دولار في السنة التانية بس من تأسيسها كأسرع ستارت اب يوصل للقيمة دي في وقتها، وفي 1986، يعني بعد 4 سنين من التأسيس وصلت لمبيعات تاريخية تقدر بـ 329 مليون دولار.. الأرقام دي كانت أرقام كبيرة في التمانينات.

الشركة كانت رائدة في تصنيع أجهزة الكمبيوتر واللاب توب، وبعد التطور السريع ده، الشركة حبت يبقى ليها كيانها المنفصل، فقررت تدخل في مجالات تصنيع جميع مكونات الكمبيوتر الداخلية، زي المعالج وكارت الشاشة، وكل قطعة داخل الجهاز.. يعني كانت عاوزة تعمل زي آبل ماعملت كدة في معالجات الـ M1 والـ M2.

لكن آبل علشان تعمل ده قعدت سنين طويلة تطور وتخطط علشان تقدر تاخد خطوة خطيرة زي دي مش بالسرعة والاستعجال بتاع كومباك.
مش بس كدة..

دي كمان دخلت في عالم السوفت وير علشان تنافس مايكروسوفت وتعمل نظام تشغيل خاص بيها يكون حصري لأجهزة كومباك، زي الماكنتوش كدة.

من سنة 95 لسنة 98 الشركة استحوذت على كم كبير من الشركات الناشئة المتخصصة في المجالات دي، منهم شركة اسمها Tandem Computers وشركة Digital Equipment Company (DEC) وغيرهم.

الإدارة كان عندها خطة واستراتيجية محكمة من الاستحواذات والتوسعات دي، لكنهم للأسف أغفلوا تقلبات السوق اللي بيحتاج وجود سيولة ضخمة، وأغفلوا كمان ان المنافسين مش هيسمحوا ليهم بالسيطرة على السوق بالشكل ده، خاصة لما يكونوا منافسين زي مايكروسوفت و IBM مثلاً.

كومباك ضيعوا كل السيولة بتاعتهم في الاستحواذات والتطويرات معتمدين على معدلات الدخل والأرباح اللي بتزيد بمرور الوقت، واللي المفروض على الورق هتغطي كل ده.

لكن بعد عمليات الاستحواذ دي وضياع السيولة النقدية، الاقتصاد العالمي دخل في أزمة كبيرة وتراجعت حركة التجارة بشكل كبير جداً وكل الشركات اتاثرت بده، اللي عدى من الأزمة فقط هو اللي كان عنده سيولة ومخطط لحدوث أزمات مفاجئة.. أما كومباك كان مصيرها الديون والبيع لشركة HP.

#كرياتوفا

09/11/2022

كوباية الشاي بالنعناع الجميلة بتاعتك.. واقرأ ❤️

على الرغم من ان الـ CEOs أو المدراء التنفيذيين هما أول ناس بيطبقوا الخطة دي على أي مدير تحتهم، لكنهم برضو بيترعبوا منها لأنها في ثانية ممكن تتطبق عليهم وهتكون نتيجتها ترك المنصب تماماً لأي حد تاني، خاصة لو CEO في شركة ناشئة فيها مستثمرين بيتحكموا في قرارات الشركة.

الخطة من اسمها "التعاقب الوظيفي" معناها التغيير الجذري في الإدارة، واحنا هنا قاصدين نقول الإدارة لأنها كل أساسياتها بتطبق على المدراء بس، سواء المدراء التنفيذيين او أي مدير تاني مسئول عن قطاع.

طول الوقت بتسمع ان في مدراء تنفيذيين تركوا مناصبهم في شركات كبيرة وتم تعيين مدير تنفيذي جديد، طبعاً الفكرة النمطية عند أي حد ان الراجل ده تمت اقالته من المنصب علشان أكيد حصل هبوط في مستوى الشركة او عمل حاجة غلط.

ممكن يكون ده صح في بعض الأحيان، لكن في أحيان كتير بتكون الشركة ناجحة وواقفة على رجلها ومفيش أي مشاكل وبيتم التغيير برضو، وده بقى كوم واستقالة المدراء التنفيذيين اللي هما أصلاً مؤسسين الشركة من منصبهم كـ CEO كوم تاني واحنا شوفنا ده فعلاً أكتر من مرة.

يمكن أشهرهم مؤسسين جوجل لاري بيدج وسيرجي برين لما أعلنوا ترك مناصبهم كمدراء تنفيذيين لحد تاني، وكذلك جاك دورسي مؤسس تويتر لما أعلن انه هيسيب منصبه لحد تاني، وعلى الجانب الآخر بقى في مدراء تنفيذيين رفضوا ترك منصبهم رفض قاطع زي مارك زوكيربيرج لما رفض ترك المنصب بعد ضغط المستثمرين عليه، ومازال مكمل لحد دلوقتي.

خطة التعاقب الوظيفي وتغيير المدراء مبتعتمدش على الهبوط الحاد في مؤشرات الشركة نهائياً، لأن أصلاً لو حصل هبوط فده معناه ان مكنش في خطة تعاقب وظيفي من الأساس ولا كان بيتم التفكير فيها.

الخطة بتعتمد على 3 عناصر رئيسيين وهما الـ KPIs والـ Milestones والـ Vision .. يعني ايه بقى الكلام ده؟

أولاً الـ KPIs وهي اختصار لـ Key Performance Indicators، يعني مؤشرات أداء الشركة، واحنا مش بنتكلم على مؤشرات أداء الفترة اللي فاتت، احنا بنتكلم على مؤشرات الأداء الحالية وهل في توقعات مبنية على خطط ان المؤشرات دي تزيد في المستقبل ولا لا؟

مهو لو المؤشرات دي بتقول ان الأداء هيفضل ثابت على كدة تبقى مشكلة كبيرة، لأن في قاعدة عامة في البيزنس بتقول ان ثبات الأداء لفترة طويلة بييجي وراه انحدار على طول، فلازم الراجل المدير ده يكون مقدم كل الخطط والاستراتيجيات اللي هتقول ازاي الأداء يزيد الفترة الجاية.

يعني لما مؤسسين جوجل سابوا مناصبهم، جوجل كانت واحدة من أعظم شركات التقنية في العالم وفي أرباح متزايدة، لكن هما شافوا ان في خطوة كبيرة اوي لازم تتاخد، اللي هي خطوة Alphabet ولازم حد تاني يقود في المرحلة الجاية غيرهم.

ثانياً الـ Milestones يعني الإنجازات اللي بيتم الوصول ليها واحد بعد التاني، او خلينا نقول المحطات بدل الإنجازات، يعني احنا وصلنا لإيه الفترة الجاية والمفروض نوصل لإيه بعد 3 شهور، وبعد 6 شهور، وبعد سنة.. وهكذا
ثالثاً بقى الـ Vision وهي الرؤية المستقبلية للشركة، ايه الرؤية اللي عند المدير ده علشان يوصل بيها الشركة لمكانة معينة في المستقبل وهل بتتوافق مع رؤية الإدارة والمستثمرين ولا لا؟

يعني لما مايكروسوفت عينت ساتيا ناديلا كمدير تنفيذي جديد للشركة في 2014 حطوا رؤية واضحة جداً لمكانة مايكروسوفت في المستقبل وهي انها تكون قائدة ثورة العوالم الافتراضية وده اللي مايكروسوفت شغالة عليه فعلاً من زمان وبتحضر لحاجة أعظم بكتير من الميتافيرس.

وده سبب من أسباب ان مارك زوكيربيرج اتسرع وأعلن عن الميتافيرس وهو بعيد كل البعد عن الجاهزية.

الـ 3 عناصر دول هما اللي بيحددوا المدير التنفيذي ده هيكمل في الشركة ولا لا، والشئ الصعب انك تاخد القرار ده على نفسك انت وانت مؤسس للشركة.. في ناس فهموا ده ونفذوه زي جوجل وتويتر زي ماقولنا، وناس رفضوه زي مارك وكتير جداً من الناس توقعوا ان مؤشرات فيس بوك "او ميتا بقى" تحت قيادته هتفضل تنحدر.. وده اللي بيحصل فعلاً حالياً.

#كرياتوفا

09/11/2022

لسة مخلصناش من العلامة الزرقاء، ظهرت العلامة الرمادي 🙃

تويتر بيختبر حاليا علامة جديدة لونها هيكون رمادي ،ودي غير العلامة الزرقاء اللي بتقدر تظهرها من خلال Twitter Blue مقابل 8 دولار.

العلامة الرمادية دي بتكون موجودة تحت اسم المستخدم وبيكون مكتوب جانبها Official العلامة دي بتكون مخصصة للحسابات الرسمية زي حسابات البرندات والحكومات والصحفيين ، وده طبعا بعد مالعلامة الزقاء بقة متاحة للكل لازم يكون في علامة تانية تبين ان الحساب ده رسمي للبرند او للجهة او للشخص.

ولحد دلوقتي لسة مفيش معايير ظهرت للعلامة الرمادية كل اللي عارفينه ان العلامة هتكون للبرندات و للمؤسسات الحكومية والصحفيين وبعض الشخصيات العامة.

#كرياتوفا

06/11/2022

لو مهتم بكورس ال Content Creation & Copywriting من Creatova Academy سجل في المحاضرة المجانية التعريفية بالكورس اللي هتكون يوم الاحد الجاي 13 نوفمبر ان شاء الله..

تقدر تسجل من خلال موقعنا https://creatova.com وهنتواصل معاك لتأكيد الحضور.

في خصومات كبيرة هتتم على الكورس في يوم المحاضرة ان شاء الله ❤️

#كرياتوفا

06/11/2022

في أواخر القرن التاسع عشر وفي بدايات القرن العشرين هنري فورد كان شغال عند توماس اديسون علشان يطور محركات الجازولين وكان كبير المهندسين هناك، محركات الجازولين في الوقت ده كانت عبارة عن ثورة صناعية جديدة والمفروض انها المستقبل بعد المحركات البخارية، زي دلوقتي مابيتم استبدال محركات الجازولين بالمحركات الكهربائية.

في الوقت ده العربيات مكنتش لسة موجودة والاعتماد كله كان على "العربات" اللي هي العربيات باحصنة، فورد كان عنده رؤية وحلم وحولهم لمهمة وهي صناعة سيارات بتمشي بمحركات الجازولين، لحد ماقدر يصنع أول نموذج لعربية بمحرك سنة 1896 وكان قوتها حوالي 26 حصان، لكنا كانت فاشلة جداً.

حلم هنري فورد الاساسي كان تصنيع عربيات للعامة تستخدم في الشوارع وفي الحياة اليومية مش مجرد نموذج عربية يتحط في متحف، وعلشان يحقق المعادلة دي كان لازم تكون العربية بقوة معقولة والاهم سعر مناسب.

المهندسين في شركة اديسون قالوله انت بتحلم لسة بدري ع الكلام ده، ومين قالك ان الناس اصلاً محتاجة النوع ده من العربيات؟ خلينا مركزين احسن في شغلنا. اللي بيجيب فلوس.

ساعتها هنري فورد قال جملته العظيمة جداً وهي "لو سألت الناس هما محتاجين ايه هيقولوا طبعا عاوزين احصنة اسرع" واستقال بعدها من شركة اديسون وأسس شركة تانية لنفس الهدف اسمها Detroit Automobile Company لكنها فشلت برضو بعد سنة، وبعدها قدر يأسس شركة فورد سنة 1936 ومن هنا كانت الانطلاقة الحقيقية لثورة النقل في القرن العشرين.

البيزنس في الوقت ده اللي كان مسيطر عليه هما السلطات الحاكمة وكبار رجال الأعمال، حتى محركات الجازولين نفسها متمش التفكير فيها وتطويرها الا لما رجال الأعمال الكبار وأصحاب النفوذ زي جي بي مورجان وغيره بدأوا يفرضوا سيطرتهم على الثروة البترولية في العالم ..

أي حد كان بيقرب من تهديد البيزنس بتاعهم كان بيخلصوا عليه زي نيكولا تيسلا مثلاً لما كان عاوز يستبدل محركات الجازولين بالمحركات الكهربائية وقتها واتحارب من الكل وتم إخفاء جميع اختراعاته.

يمكن ده كان سبب رئيسي في نجاح هنري فورد، لأن دخول محركات الجازولين في عالم السيارات كفيل انه يفتح بيزنس وسوق مستمر ومربح لـ 100 سنة قدام. وده فعلاً اللي حصل..

لكن برضو لازم نقول ان هنري فورد مسلمش للشكل التقليدي للبيزنس في الوقت ده واللي كان مقتصر على تلبية احتياجات الناس وحل مشاكلهم، هو عمل احتياج جديد مكنش موجود قبل كدة وخلاه أساسي في حياة كل الناس.

في امور كتير جدا حاليا مشابهة لقصة فورد، زي دخول الانترنت، السوشيال ميديا، وسائل الدفع المختلفة وكلها كانت ثورات حقيقية وخلت اصحابها على عرش اثرياء العالم واسمائهم اتحفرت في التاريخ.

كل الحاجات دي احنا مكناش عارفين اننا هنبقى محتاجينها او حياتنا مش هتمشي من غيرها، لكن وجودها خلاها أساسية في حياتنا ومن منظور البيزنس فتحت فرص جديدة سواء فرص عمل او فرص تطور أكتر.

خلينا بقى نسأل نفسنا سؤال مهم دلوقتي وهو نفس السؤال اللي سألوه المهندسين اللي كانوا شغالين في شركة اديسون لفورد..

لو اتسألت انت محتاج ايه دلوقتي او ايه أقصى حلمك في العربيات؟ هتلاقي الإجابة عربيات أقوى، أسرع، عربيات بتطير او بتعوم.. ممكن نفتح الاحتمالات زي ماحنا عاوزين لأن سقف توقعاتنا حالياً عالي جداً على عكس زمان.

خلينا نقفل الموضوع بقى بسؤال أهم.. سمعت عن الهايبرلوب؟

#كرياتوفا

04/11/2022

ازاي حولت بيرو نفسها لبراند عن طريق الـ Branding وتأثير ده على قطاعاتها المختلفة..

البراندينج مش بس مقتصر على الشركات والأفراد، البراندينج ممكن يعمل عظمة أكبر بكتير اوي لو اتوظف صح في تسويق الدول، وده بنشوفه بعنينا بقالنا سنين بأفضل صورة ممكنة من دول قريبة مننا زي السعودية والامارات وقطر مثلاً اللي بيعملوا لنفسهم هوية بصرية خاصة وبيحطوا نفسهم في الـ Position اللي يستحقوه.

قطر مثلاً في كاس العالم السنادي بتدينا دروس في البراندينج، بس ده مش موضوعنا انهاردة.. موضوعنا عن دولة كبيرة في قارة أمريكا الجنوبية مساحتها حوالي مليون وربع وتعداد سكانها حوالي 33 مليون نسمة، وهي بيرو.

بيرو قبل 2011 كانت بتعاني من ان عدد السياح مش على القدر المطلوب وكمان في صعوبة في جلب الاستثمارات وكذلك صعوبة في تسويق منتجاتها وخدماتها وصناعاتها مع ان بيرو بتمتلك معالم سياحية رهيبة، ومشهورة بصناعات كتير وفيها صناعات جالبة للاستثمارات.

بيرو بتمتلك موقع متميز وعندها واحد من أكبر السواحل على المحيط الهادي، وعندها معالم تاريخية من آلاف السنين، ده غير ان غابات الأمازون بتغطي 60% من مساحة البلد وفيها مزارات سياحية مميزة جداً ده غير التنوع البيولوجي اللي فيها.

سنة 2009 لجنة بيرو للصادرات والترويج السياحي "زي وزارة السياحة عندنا كدة" قررت انها تشتغل على براندينج خاص بالدولة تبدأ بيه حملات تسويقية موجهة للعالم هدفها 3 حاجات، الترويج السياجي وزيادة عدد السياح، وعرض فرص نمو الدولة للمستثمرين الأجانب لجلب الاستثمارات، وعرض موارد الدولة للخارج لتعزيز الصادرات.

ودي كانت التحديات الثلاثة اللي المفروض خطة البراندينج الجديدة تعملها، وفي خلال سنتين شغل كانت البراندينج الجديد ظاهر للنور سنة 2011.

أول حاجة نفذوا لوجو خاص للدولة، هتلاقي اللوجو في الصورة اللي على البوست، حرف الـ P تم تصميمه على شكل حلزوني وده كان واحد من الأشكال المميزة لحضارة بيرو القديمة واللي هتلاقيه محفور في معالم قديمة كتير في بيرو.

الشكل الحلزوني ده بيمثل لحضارة بيرو القديمة رمز للتطور والتغيير والتحول، وكمان شكله قريب من البصمة وحطوا شعار There’s Peru for everyone، كتلميح زي مافي بصمة لكل شخص.

ففي البداية اللوجو كان مبني على رؤية واضحة وفيه رموز متأصلة عند بيرو وقدروا يوصلوا ده بشكل ممتاز في حملاتهم التسويقية.

تاني حاجة اشتغلوا على الهوية البصرية والألوان اللي هتمثل هوية البلد، قرروا يشتغلوا على 6 ألوان بتمثل الثقافات المختلفة لشعب بيرو ومعالم بيرو الأثرية المشهورة بالألوان والبهجة، وبدأوا يصوروا المعالم السياحية والأثرية والمعالم المشهورة في بيرو وبقوا يحطوها في أي حملة تسويقية.

تالت حاجة نفذوا ويب سايت بهوية بيرو البصرية الجديدة باللغة الاسبانية وهي اللغة الأم لبيرو، واللغة الإنجليزية، الموقع متقسم لـ 5 أقسام مختلفة، قسم خاص بالسياحة وفيه كل المعالم السياحية والأثرية علشان تتعرف على البلد ومعالمها ومقالات مختلفة بتعرفك على كل تفصيلة في البلد.

وقسم خاص بموارد البلد التجارية والصناعية بكل معلوماتها، وقسم خاص بالطبخ لأن بيرو مشهورة بالطبخ والأكل وفيها أطباق كتير مميزة، وقسم خاص بالاستثمار وده فيه كل الفرص الاستثمارية اللي في البلد ومعلومات عنها، وأخيراً قسم خاص بالفنون والمواهب في البلد وثقافة البلد.

حكومة بيرو أجبرت كل الشركات والمؤسسات في كل الصناعات انها تستخدم الهوية الجديدة وتسوق بيها وتصدرها للعالم، والهوية البصرية الجديدة خدت جائزة أفضل Identity في العالم لسنة 2012.

وفي خلال 3 سنين بيرو أصبحت مقصد سياحي مهم جداً لكتير من السياح اللي مكنوش بيفكروا في بيرو قبل كدة، وده عاد على اقتصاد البلد بفلوس وفرص عمل، وكمان قدروا يجذبوا مستثمرين أجانب للبلد لأن وجود هوية كاملة للبلد بالشكل ده بيدل على وجود خطة محكمة من الدولة للنهوض والتقدم.

بيرو حالياً بقت براند وأصبحت Case Study بيتضرب بيها المثل في ازاي تستغل موارد وتاريخ الدولة في زيادة السياحة والاستثمار والصادرات.

#كرياتوفا

02/11/2022

كيف حلّت نتفلكس معضلة الـ Customer Acquisition Cost 👇

من فترة كبيرة وفي بدايات نتفلكس اكتشفت ان أقصى مدة اشتراك لعميل عندها هي ٢٥ شهر، ومحدش بيكمل بعد كده لأنهم بيزهقوا من انتظار الافلام والمسلسات الجديدة فترة طويلة.. وتم حساب القيمة دي انها ٢٩١!

يعني الشخص الواحد بيصرف ٢٩١ دولار طول حياته على نتفلكس، وطبعا ده غير مرضي تماما لنتفلكس.. والقيمة دي مهمة جدا جدا حسابها علشان تعرف حاجتين

الحاجة الأولى: العميل الواحد بيصرف كام على منتجك طول حياته وده الـ CLV اللي هو Customer Lifetime Value
الحاجة التانية: تكلفة العميل الواحد اد ايه؟ وده الـ CAC اللي هو Customer Acquisition Cost

تعمل ايه؟

نتفلكس أضافت ميزة قلبت الدنيا عندها وهي امكانية Stream اي فيلم على الويب عندها، وبالتالي قلبت وقت انتظار العملاء الممل لوقت مليان أفلام ومسلسلات موجودة على الشبكة تقدر تشوفها في أي وقت.

بعد اطلاق الميزة دي مباشرة، ٤٪ من العملاء اعلنوا انهم هيفضلوا مكملين.. واكيد النسبة دلوقتي طبعا بقت رهيبة.

نتفلكس كمان بقت تعطي لأي حد شهر مجاني لتجربة الخدمة قبل مايدفع دولار واحد، وده لأنها واثقة كويس اوي في الخدمة والمحتوى اللي بتقدمه..

كل اللي نتفلكس عملته هنا انها بدل ماتشتغل طول الوقت انها تجيب عملاء جدد وبالتالي زيادة في ميزانيات التسويق طول الوقت، اشتغلت على رضاء وولاء العملاء القديمة علشان يفضلوا يدفعوا ويضمنوا بقاءهم على المنصة، وبكده قللت تكلفة العميل.

اللي عملته نتفلكس ده مش اختراع، لكنها اشتغلت كويس على مفهوم الـ CLV اللي هو Customer Life-time Value، يعني لو طول الوقت بتشتغل انك تجيب عملاء جدد ومهتمتش بالعملاء القديمة هتقع في مشكلة كبيرة جدا قريب وفي أقرب أزمة البيزنس هيقع.

لكن لو اشتغلت على قاعدة العملاء القديمة وقدمتلهم الـ Values اللي تخلي العملاء يدفعوا باستمرار هتقف على ارض صلبة وقوية ،وهنا بقى معضلة الـ CAC.
الـ Customer Acquisition Cost بيقولك دايماً ان الحفاظ على عميلك القديم هو أهم من الحصول على عميل جديد، لأن تكلفة الحصول على عملاء جدد دايماً أعلى بكتير من العملاء القديمة.

يعني مثلاً العميل الجديد كان بيكلف نتفلكس 16 دولار والرقم ده عالي جداً بالشكل ده وقد يكون أعلى من كدة كمان بسبب الشهر المجاني اللي نتفلكس قررت انها تعطيه لعملاءها، يعني 16 دولار قصاد كل عميل بياخد شهر مجاني ويا اما يكمل بعد الشهر يا اما ميكملش.

نتفلكس ماكنش عندها مشكلة نهائياً تدفع الرقم ده مقابل كل عميل جديد لأنه بالقرارات اللي خدتها فوق ضمنت ان نسبة كبيرة من عملاءها هيجددوا الاشتراك كل شهر وبالتالي التكلفة دي هتقل جداً جداً لأن العميل لو جدد تاني هيبقى كأنه عميل جديد ببلاش ومفيش 16 دولار.

احسب بقى كام عميل قديم هيجدد الاشتراك كل شهر مقابل كام عميل جديد بييجي، وبالشكل ده تكلفة العميل الجديد أصبحت شبه معدومة وبتحقق أرباح كمان.

اذن استراتيجية الـ CAC بتقولك لازم تفكر ازاي تحافظ على عميلك القديم وتخليه يرجع يشتري منك تاني لأنك لو فضلت تعتمد على جلب عملاء جدد طول الوقت هييجي عليك وقت وهيحصل هبوط شديد في الأداء ومش هتقدر تجيب عملاء جدد طول الوقت.

#كرياتوفا

02/11/2022

تويتر قبل ايلون ماسك حمادة، وبعد ايلون ماسك هيكون حمادة تاني خالص 😁

نبذة مختصرة عن اللي هيعمله ايلون ماسك في تويتر

واضح اننا هنشوف تغييرات جذرية في تويتر الفترة الجاية وهنشوف قرارات مجنونة كتير ايلون ماسك اعلن انك هتقدر توثق حسابك من خلال خدمة Twitter Blue ،وسعر الاشتراك هيكون 8 دولار بدل 20 دولار اللي كان موجود في التقارير السابقة، والسعر ده هيكون معدل مش ثابت يعني كل دولة حسب اقتصادها.



من خلال الاشتراك غير انك هتوثق الحساب هيبقي عندك اولوية في الردود والبحث والاشارات وهتقدر تنشر الفيديوهات الطويلة و الملفات الصوتية اللي حجمها اكبر من العادي، ده غير ان ايلون ماسك هيوفر الفترة الجاية طرق ربح لصناع المحتوى علشان يستفيدوا من المحتوى اللي بينشروه ، وقال انه كل الحسابات المغلقة بسبب انتهاك او غير هتتفتح.

#كرياتوفا

01/11/2022

الراجل ده اسمه "جان بورانين" من فنلندا، في سنة 2014 أسس ستارت اب اسمه Spinnova، الستارت اب ده كان بيعتمد على تقنية جديدة عاوز يغير بيها مفهوم الغزل والنسيج في العالم.

التقنية باختصار هي انتاج قماش من نوع جديد تماماً من الخيوط، الخيوط دي بيتم تصنيعها من لب الخشب وعن طريق اعادة تصنيع النفايات الآمنة، Recycling يعني.. الخيوط دي بتتشكل وتتصنع تحت نسب ضغط معينة ومبيتمش دخول فيها أي مواد كيميائية تماماً أثناء التصنيع، يعني بتخرج طبيعية 100%.

وده بيعطي الأقمشة المصنعة من الخيوط دي خواص رهيبة زي المتانة، والراحة الشديدة وكمان ليها تأثير ايجابي على الجسم من حيث الراحة وامتصاص العرق والسوائل بشكل كبير.

في 2015 كانوا بدأوا بشكل رسمي وجاهزين تماماً لعملية الانتاج وبدأوا يدوروا على حاجتين، أولاً عقود كبيرة لتوريد الأقمشة والبدء في استخدامها، وثانياً مستثمرين يدعموا الاستارت اب مالياً.

وفعلاً بدأ يعمل تعاقدات مع شركات صغيرة وكلها تعاقدات ناجحة وبدأ يجذب مستثمرين لأن الفكرة والتقنية فعلاً مميزة، لحد في اواخر 2015 جت شركة حبت تعمل عقد مع Spinnova بتوريد النوع ده من الأقمشة بشكل حصري فقط ليها لمدة سنين طويلة، وعرضت رقم كبير مستغلة ان الشركة لسة ستارت اب ومحتاجة سيولة مادية.

المستثمرين كانوا متحمسين جداً وفجأة جه جان بورانين المؤسس رفض العقد رفضاً تاماً، المستثمرين والشركاء استغربوا جداً من قراره واتضايقوا جداً، انت ازاي ترفض عرض زي ده؟

قالهم انتوا بتبصوا تحت رجلكوا، لكن انا عندي رؤية وخطة مستقبلية ماشي عليها ولو قبلت العقد ده هبقى بقضي على الخطة دي، قالهم لو قبلت العقد ده معناها اننا هنبقى تحت رحمة الشركة دي لسنين طويلة وهتتحكم فينا وفي منتجاتنا زي ماهما عاوزين ويطوروا ويكبروا نفسهم على حساب منتجاتنا.

لكن انا خطتي الكبيرة هي التعاقد مع كبرى العلامات التجارية المشهورة في العالم، والأقمشة دي تبقى باسمنا احنا ويتم انتاجها باسمنا ونوردها لكل دول العالم.

المستثمرين سألوه سؤالين مهمين جداً، هل هتقدر توفر الفلوس الكافية لاستمرارية الستارت اب واستمرارية الانتاج لحد ماتلاقي عقد كبير مع علامة تجارية كبيرة؟

وهل تفتكر اننا هنفضل ندعمك مالياً في الخطة دي بدون معرفة جدول زمني محدد لجني ارباح؟

جان قالهم، أظن لو التقنية مكنتش مميزة وثورية كفاية مكنتوش استثمرتوا الكم ده من الأموال من البداية ولمدة سنة وانتوا برضو مكنتوش تعرفوا الموضوع هيمشي ولا لأ! وكون ان في شركة عاوزة تاخد المنتج حصري ليها ده أكبر دليل على النجاح اللي محققينه، واللي اعرفه اني هفضل وراء الستارت اب لحد ماحقق هدفي.

فبلاش نبص تحت رجلنا ونشتغل على الخطة الكبيرة، في مستثمرين معجبهمش الكلام وانسحبوا ومستثمرين تانيين قرروا يكملوا.

وبعد 6 سنين كاملة، وتحديداً السنة اللي فاتت، جان قدر يستمر ويطور في المنتج لحد ما مضى عقود مع 2 من أكبر العلامات التجارية في العالم وهما Adidas و H&M، وبدأوا يروجوا منتجاتهم الجديدة بالأقمشة الجديدة في الأسواق.

الشركة حالياً بتكبر وبتطور بشكل سريع وملحوظ وبدأوا يعملوا هيكل اداري احترافي وعينوا مدير تنفيذي جديد علشان يقود الشركة في المرحلة الجاية.

الشاهد من الكلام ده ان الطريق صعب ومليان عقبات، بس مادام عندك خطة وهدف هتوصله ولو بعد 6 سنين!

#كرياتوفا

29/10/2022

القوة الشرائية النسائية التي حيرت المسوقين 👱‍♀️

لما تعرف ان المرأة قوتها الشرائية أكتر من 65% من عمليات الشراء اللي بتتم بالإضافة لمساهمتها في الاقتصادات العالمية بأكتر من 15 تريليون دولار جايين بس من عمليات الشراء والاستهلاك يبقى مينفعش تستهين أبداً بيها اثناء العملية التسويقية.

وعلى الرغم من كتر الإعلانات والحملات التسويقية اللي بتستهدف المرأة حالياً، الا ان في إحصائية اتعملت بتقول ان 91% من النساء حاسين ان الشركات والاعلانات مش قادرين يفهموهم ولا مهتمين بيهم بشكل كافي!

المسوقين علشان يقدروا يرضوا المرأة بأي شكل وعلشان يستغلوا القوة الشرائية المرعبة دي عملوا نظرية تسويقية كاملة علشان بس يحطوا أساسيات وقواعد وبيانات وتحليلات وأساليب يقدروا يفهموا بيها Behavior أو سلوك المرأة.. النظرية دي هي الـ Pink Marketing

لو ملاحظ هتلاقي اسمها Pink علشان ده اللون اللي مينفعش يتم استخدامه في أي سياق تاني غير سياق المرأة وده بسبب سيكولوجية اللون من إيجابيات وسلبيات زي ماتكلمنا من كام يوم بشكل مفصل في مقال سيكولوجية الألوان.

نظرية الـ Pink Marketing بتستخدمها كل الشركات تقريباً حالياً، وبتعطيك نظرة شاملة عن ازاي تستهدف المرأة في اعلاناتك وحملاتك التسويقية، وخلينا نبص على بعض اساسيات النظرية..

أول حاجة مينفعش تستغل أي نقاط ضعف عند المرأة علشان تعلن او تروج عن المنتج بتاعك وده خطأ كارثي وقعت فيه Dove قبل كدة في حملة من حملات الـ Diversity Marketing بتاعتها لما أطلقت إصدارات محدودة من الغسول بتاعها بـ 7 اشكال مختلفة، الأشكال دي بتمثل كل الأشكال الممكنة لجسم المرأة في رسالة واضحة من دوف ان كل واحدة لازم تتقبل شكلها وشكل الآخر بدون أي تنمر او عنصرية..

لكن في الحقيقة الرسالة وصلت معكوسة تماماً وانهال على دوف كم من الهجمات والسُباب على السوشيال ميديا غير عادي لأنهم شافوا ان دوف بيسلطوا الضوء أكتر على ان أشكال الأجسام دي غير مقبولة واحنا لازم نتقبلها، ده غير تحفظهم بقى على بعض الأشكال نفسها.

تاني حاجة لازم تكون عارف ان واحد من سلوك المرأة اثناء الشراء هو التردد والمقارنة على عكس الراجل اللي بيميل اكتر ناحية الاختيارات والقرارات السريعة، علشان كدة هتلاقي معظم منتجات النساء فيها اختيارات كتير وده اللي المفروض بيتعارض اصلاً مع نظرية معضلة الاختيارات Choice Paralysis اللي بتقول كل ماعدد الاختيارات زاد كل ما المبيعات قلت بسبب الحيرة والتردد.

لكن سلوك المرأة بينسف النظرية دي من جذورها في كتير من الحالات وكتير من المنتجات.

تالت حاجة المرأة بتحب تتعامل مع المرأة اللي زيها ويتثق أكتر في منتجات البراندات اللي بتحس انها مخصصه وموجهة فقط للمرأة، وده بسبب ان المرأة بتحس دايماً ان نظرة الراجل ليها فيها نقص او وراها أهداف أخرى.

جميع جوانب حياة المرأة هي محل دراسة واهتمام المسوقين علشان يوصلوا لمفاتيح القوة الشرائية دي لدرجة ان بقى في استراتيجيات تسويقية منفصلة علشان بس اظهار الدعم النسائي زي الـ Diversity Marketing اللي ذكرناها من شوية واللي بمعنى التنوع واللي بتستخدمها الشركات حالياً بهدف المساواة بين الاناث والذكور في كل شيء وكلها لأهداف تسويقية في الآخر.

سيكولوجية الـ Pink Marketing بشكل عام بتعتمد على استغلال نقاط الضعف في المخ لتوجيهه لاتخاذ القرارات الشرائية بشكل او بآخر، سواء بشكل مباشر عن طريق الإعلانات المباشرة او بشكل غير مباشر عن طريق اللعب على المشاعر.

#كرياتوفا

28/10/2022

حصاد الاسبوع 👇

تابع صفحة Creatova Magazine وخليك متابع أخبار وتريندات البيزنس والتسويق والسوشيال ميديا يومياً ❤️

27/10/2022

عاوزكوا تتخيلوا ان شخص قدر يعمل ابلكيشن زي اوبر وكريم في بلد مفيهاش انترنت اصلا ! هو عمل كده فعلا 😃

الشخص ده اسمه مارتن بروينزا
والبلد دي هي "كوبا - Cupa" قبل 2016

كوبا قبل 2016 الانترنت مكنش متاح فيها نهائياً للشعب ولا ADSL ولا 3G حتى، كان متاح فقط للجامعات ومؤسسات الدولة العليا.

في كوبا شركة اتصالات واحدة فقط اسمها ETECSA، جميع المكالمات والرسائل بتمر من خلالها، الشركة كان عندها خدمة اسمها Nauta بتمكن اي حد في كوبا انه يبعت ويستقبل ايميلات على موبايلاتهم طبعا بدون وجود انترنت او الحاجة اليه، تبعت وتستقبل عن طريق الشبكة العادية فقط.

في 2014، مارتن عمل موقع اسمه YoTeLlevo، الخدمة دي بتمكن السياح الأجانب اللي بره كوبا "وعندهم انترنت عادي" انهم يحجزوا تاكسي جوه كوبا اما لوجهة معينة من مكان معين او يفضل معاهم طول فترة اقامتهم في كوبا.

بس ازاي؟ السائح عنده انترنت عادي، لكن سواق التاكسي في كوبا !؟ والعملية هتتم ازاي؟

فاكرين خدمة الايميلات اللي اتكلمنا عنها من شوية؟
السائح بيحجز التاكسي عادي، فيقوم الموقع باعت تفاصيل الحجز في ايميل للسائق المطلوب ومعاها ايميل السائح ويبدأوا الاتنين يتواصلوا مع بعض عن طريق الايميلات لحد الحجز مايتم.

في البداية، الموقع كان بيبعت للسواق ايميل السائح ويتواصلوا الاتنين مع بعض، طيب مارتن هيكسب ازاي!؟

بدأ مارتن ميبعتش ايميل السائح لسواق التاكسي ويبعتله تفاصيل بس بحيث يبقى هو الوسيط والتفاصيل معاه هو بس، وبدأ يطلب كومشن من السواق علشان ال deal يتم، وكمان بقى يحدد أسعار مناسبة ومعقولة ترضي الطرفين.

وبكده يكون حل مشكلة للسائح اللي بييجي ووفرله وسيلة مواصلاته بأسعار كويسة، وحل مشكلة لسواق التاكسي وبدأ يجيبله شغل أكتر.

مارتن بيقول على قد الموضوع مايبان ساخر شوية لأننا بنتكلم على تقنية تقريبا من سنة 1995، لكنه كان مربح جدا وطفرة في وقتها وحل مشكلة حقيقية.

الموضوع ده استمر اقل من سنتين، وبعد كده في 2017 شركة الاتصالات في كوبا اعلنت دخول الانترنت بشكل رسمي للجميع ADSL و 3G

الموقع كان شغال لحد فترة قريبة بس طبعا اتطور كتير بعد دخول الانترنت، لكن مارتن بيقول ان حتى بعد دخول الانترنت السواقين مازالوا بيستخدموا الايميلات لأنها بقت مألوفة جدا بالنسبالهم ومبسوطين بيها..

#كرياتوفا