23/11/2015
عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، ده‌ستخۆشی له گروپێكی خۆبه‌خش له مامۆستایان‌و قوتابیانی زانكۆی كۆمار كرد .
به‌ڕێوه‌به‌ری گشتی سه‌ردانی سه‌رۆكی زانكۆی كۆمار ده‌كات
به‌مه‌به‌ستی به‌هێزكرنی په‌یوه‌ندی‌‌و په‌ره‌پێدانی كاری خۆبه‌خشی له‌نێو خوێندكارانی زانكۆدا، پاشنیوه‌ڕۆی ئه‌مڕۆ یه‌كشه‌ممه، 22ی تشرینی دووه‌م، عومه‌ر گوڵپی، به‌ڕێوه‌به‌ری گشتی چاودێریی‌‌و گه‌شه‌پێدانی كۆمه‌ڵایه‌تی له پارێزگای سلێمانی، سه‌ردانی د.سه‌ڵاح عه‌زیز سه‌رۆكی زانكۆی كۆمار بۆ زانست‌و ته‌كنه‌لۆجیای كرد .
له سه‌ره‌تای دیداره‌كه‌دا به‌ڕێوه‌به‌ری گشتی ده‌ستخۆشی له گروپێكی خۆبه‌خش له مامۆستایان‌و قوتابیانی زانكۆی كۆمار كرد كه به‌شێوه‌یه‌كی خۆبه‌خشانه هه‌ستاون به ئه‌نجامدانی پڕۆژه بۆ پشتیوانیكردن‌و هاوكاریكردنی دامه‌زراوه كۆمه‌ڵایه‌تییه‌كان، هه‌روه‌ك داوای كرد ئه‌مجۆره كارانه له ناوه‌نده‌كانی زانكۆدا په‌ره‌یان پێبدرێت كه شوێنێكی گرنگن بۆ بیرۆكه‌و سه‌روه‌تێكی گه‌وره‌ی مرۆییشیان تیا كۆبووه‌ته‌وه .
هه‌روه‌ك به‌شێكی دیداره‌كه ته‌رخان بوو بۆ گفتوگۆ له‌باره‌ی به‌رهه‌می زانكۆكان بۆ هه‌ردوو كه‌رتی تایبه‌ت‌و كه‌رتی گشتی له ڕوانگه‌ی پێگه‌یاندنی كادیری پێشكه‌وتوو به‌هۆی به‌رزی كوالێتی خوێندنه‌وه ڕۆڵێكی گه‌وره‌ی هه‌یه له به‌هێزكردنی دامه‌زراوه‌كاندا بۆ ڕووبه‌ڕووبوونه‌وه‌ی پێویستی بازاڕ بۆ ده‌ستی كارو به‌رزكردنه‌وه‌ی ئاستی پێشكه‌شكردنی خزمه‌تگوزارییه‌كان .
له‌لای خۆشییه‌وه، سه‌رۆكی زانكۆی كۆمار، خۆشحاڵی خۆی به سه‌ردانه‌كه ده‌ربڕی‌‌و ئاماده‌یی خۆیانی پیشاندا بۆ هه‌ر هه‌ماهه‌نگی‌‌و هاوكارییه‌ك له‌پێناو خزمه‌تكردنی كۆمه‌ڵگه‌‌و به‌تایبه‌ت دامه‌زراوه كۆمه‌ڵایه‌تییه‌كاندا .
