12/11/2019
شويه معلومات عن رومانيا لو عايز تيجي دراسه أو شغل او زياره :
أولا لو معاك فيزا سياحه متقدرش تحولها ل إقامه أو تشتغل بيها في رومانيا الكلام ده غلط الفيزا السياحيه مش بتتجدد هما ٣ شهور ولازم ترجع بلدك وبيكون إسمها
visa type :C
الفيزا التانيه إسمها
Visa type : D
ودي الي بتتحول ل إقامه بعد كده سؤاء كنت متجوز من مواطن أو مواطنه رومانيه ومقدم علي (لم شمل ) أو جاي علشان تدرس ولقيت شغل بعد كده أو لو جاي تشتغل علي طول
٢_ عقود العمل بتطلع لما يكون الشخص الي هيبعتلك معاه الجنسيه وصاحب مصنع مثلا او صاحب محلات
فخدوا بالكم من النصابيين كويس جدا وإتأكدو من كل حاجه
٣_ علشان تيجي رومانيا لازم يكون معاك دعوه سؤاء من جامعه او من شغل
وحتي لو جاي سياحه لازم دعوه من فندق أو دعوه زياره من حد عايش هنا
٤_ معظم الرومانيين مش بيتكلموا إنجليزي وهتلاقي الي بيتكلموا إنجليزي بس هم الناس الي ف المناطق السياحيه ف اللغه الإنجليزيه مش كفايه علشان تتصرف في رومانيا
٥_ علشان تشتغل ف رومانيا (دا غير معرفتك للغه) لازم تكون مميز في مجال من المجالات الي هما محتاجينها هنا يعني تدخل تدور وتعرف معلومات أكتر علي المجالات الي محتاجاها البلد
٦_الدخل الشهري للمواطن العادي (مش الدكتور او المدير او المهندس مثلا) بيكون حوالي ٥٠٠ يورو أو أكتر شويه علي حسب مجال شغلك بس ده من غير ما تدفع فلوس إيجار أو أكل يعني في الأول هتتعب
وأسعار إيجار الشقق بيبدأ من ٢٠٠ يورو حسب المكان
٧_ بالنسبه للدراسه هتلاقي مدن الشباب ب بتبدأ من ٢٠ يورو لحد ١٢٠ يورو في الشهر علي حسب القرب من المترو والمظهر العام للمكان وطبعا بيكون في تخفيض علي الموصلات ليك كا طالب
٨_الشهاده الي هتاخدها من رومانيا هتكون معتمده تقدر تشتغل بيها في أي مكان في أوروبا مش زي روسيا
٩_ رومانيا إتحاد أوروبي مش شينجن بس لو معاك إقامه هتقدر تسافر ل كرواتيا أو قبرص او بلغاريا لمده ٣ شهور سياحه غير ما تقدم علي فيزا
١٠_العمله هيا الليو وبيعمل حوالي ٤ جنيه وشويه ومحدش بيتعامل ب اليورو غير قليل جدا فلما تيجي حول اليورو ل ليو
طب وأنا لو عايز أسافر طيب أبدا إزاي ؟؟؟
١_اللغه وحط مليون خط تحت اللغه لو عايز تسافر رومانيا إتعلم روماني عندك برنامج إسمه Duolingo نزله من google store هيفيدك تتعلم الأساسيات علي الأقل وبطريقه مبسطه بس إنت متكسلش علشان ده هيساعدك في التأقلم بسرعه لو جيت هنا
٢_الفلوس وطبعا دي تحتها ملايين الخطوط علشان تسافر دراسه بقي أو شغل لازم يكون معاك فلوس تكفيك ل ٦ شهور ع الأقل تحسبا لأي حاجه لإن شغلك في الأول مش هيكفي لحد بس متتأقلم مع الوضع
وفي حلول تانيه تزود بيها داخلك هو الشغل الأون لاين عن طريق الإنترنت أو إنك تشتري عربيه وترخصها وتشتغل بيها أوبر كام ساعه بعد شغلك الأساسي أو دراستك والعربيات سعرها رخيص هنا
٣_ إبتدي طور نفسك في موضوع الشغل الأون لاين وإفتح حساب في البنك وإشتغل وحوش فلوس علي قد ما تقدر
