18/05/2022
❤️🌊
مطروح تقدر تقول عليها المصيف الطيب، لإنها من أيام ماكنا بنقول رايحين المصيف مش رايحين الساحل، وسواء كنتوا بتقعدوا في كليوباترا ورومل، أو كنت بتاخدوا جناح في البوسيت، فدايما تحس إن فيها ريحة العيلة واللمة والصحاب والفراخ البانيه والمكرونة.
المية المتلجة وهي نازلة من الكولمن المحطوط على الترابيزة قدامك أو الكانز اللي في الآيس بوكس وانت قاعد لافف الفوطة حواليك ومتكتك من السقعة بس برضه بتشربها.
مدينة بتقبلك زي ما إنت إلا في حالة واحدة، إنك تفضل نايم طول النهار، هتلاقي روح المدينة لبست حد منكم وهو بيزعق "اصحوااا إحنا جايين هنا عشان ننام؟! تريلاكس ماشي، تنام؟ انسى!
متهيألي إن مطروح هي المكان الوحيد اللي شوفت فيه درجات الأزرق دي كلها، أجمل مياه ممكن تنزلها في مصر، لو إنت سمكة زيي وبتقضي كل أيامك في البحر، فإنت في المكان المناسب، أجمل من الريفيرا وأجمل من شواطئ أوروبا كلها على البحر المتوسط، لو روحت مكان زي سيزر باي هتلاقي لنفسك مكان ع البحر تقدر تقعد فيه السفرية كلها مع كتبك ومزيكتك ومش محتاج حاجة تانية من العالم.
حمام كليوباترا إزاي؟ هي كليوباترا كانت بتستحمى هنا فعلا؟! صخرة الغرام وكهف الملح والنعناع واللب الأبيض وكهف رومل! آه لازم نجيب نعناع ولب أبيض عشان الناس ماتكلش وشنا.
مطروح جميلة زي بنت مش محتاجة تحط ميك أب عشان تلفت الأنظار، هي حلوة زي ما هي ببساطتها بتلقائيتها وكرمها بميتها الزرقاء الشفافة الصافية.زي كل الذكريات اللي بتيجي ف بالنا لما بنسمع اسمها، ذكريات بريحة النعناع واللب وبصوت الست وهو شغال من مكان ما تحت البلكونة اللي احنا متجمعين فيها بليل.
"أهرب من قلبي أروح على فين ليالينا الحلوة ف كل مكان!"
مش هنهرب يا ست
إحنا هنجيب قلبنا ونيجي نقضي إسبوع هنا ♥️
تعالي بقي واحنا نوديك مطروح وتعيش الكلام ده 😉🏊
