07/04/2018
دهب -سهل حشيش - راس شيطان
لازم كل واحد فينا يعرف الاماكن والكنوز دى ويعرف كمان كل الناس اللى عندة
علشان دى اجازة طويلة فاحنا هنقولكم فى البوست ده مرجع جامد جدا لازاى تقضى رحلتك
دهب
قطعة مفيش زيها فى العالم كلة
دهب مش فندق تقعد فيه
دهب متعتها فى الكامب والقعدة فى كوخ
دهب يعنى تاخد لبس تقيل معاك علشان تقعد حوالين النار بليل تشوى مارشميلو وتشرب شاى
بس الصبح تلبس المايوه وتنزل البحر عادى
دهب يعنى هترجع موبايلك مليان ١٠٠٠ صورة ليك فى حتت مختلفة ومن غير فوتوشوب..
كل صورة من دول تخيل غمض عنيك وتخيل انت متصور فيها
هنتكلم النهاردة عن دهب بالتفصيل شوية للى حابب تكون وجهتة فى الشتا ( سيبك من الناس اللى بتروح فى الصيف ) مصر كلها بتبقى حلوة فى الشتا بالذات وهنتكلم بالتفصيل عن كل الاماكن اللى تتراح فى الشتاء
دهب يعنى هتعيش و هتعرف معنى الفترة و الطبيعية يعنى هتبعد عن الحياة السياحية ومش هيتضحك عليك بشوية ديكور يعنى هتسافر و تتبسط باقل التكاليف ويبقى عندك صور و ذكريات ملهاش حدود.
هتروح دهب بالأتوبيس وتقريبا بيتراوح من 230 : 270 جنية رايح جاى او بعربيتك وده طبعا هيكون احلى لان الطريق ممتع ده غير انها هتوفر عليك كتيير فى الانتقالات هناك .المسافة من القاهرة لدهب حوالى 530 كيلو و احلى معاد للسفر فجرال علشان توصل بدرى و متضيعش اليوم.
نيجى بقى للاقامة على فكرة انتا مش لازم تكون حاجز من قبلها عادى ممكن تروح و تحجز و انت هناك طالما مش عيد أو موسم سعر الفرد تقريبا فى الغرفة الدبل 300 جنيه 3 ليالى و خلى بالك احجز بس فطارعلشان انت طول اليوم هتبقى بره ( بس الكلام دة للى رايح معاه أطفال لكنلو انت فردانى او انت وصحابك او حتى انت ومراتك فالكامبات هتبقى أفضل ليك اوى من كل حاجة وهتحب الأسترخاء والأنتخة أوى .
خلاص وصلت وفضيت شنطك انزل بقى روح على ثرى بولز اللى معروف أن البلو هول هى الأشهر بس المكان دة برضه ميتفوتش . منطقه الثري بولز دى منطقه فيها مناظر طبيعه جميله التقاء الجبال مع المياة دى منظر تقف ادامة كتير اوى . والمكان دا للناس الى عاوزة تعمل دايفنج لانه مكان روعة واى حد يقدر يغطس فيه او يعمل سنوركلينج- ويفضل يبقى معاك كاميرات علشان اللى عاوز يصور تحت الميه ميفوتش الجمال دة كلة. والصخور هناك فوق الروعة وملونة وبعد ما تطلع من الميه تقعد فى الكافيه فى المرجيحة على البحر تتمرجح بالسرير المعلق وتستمتع بغروب الشمس فى منطقة من اجمل مناطق الغطس فى العالم كمان موجود عشش بدوية للاسترخاء وفيها حمامات نظيفة وماكولات خفيفة هتقضى اليوم هناك و تقدر تظبط مع اى كافيتريا انها تعملكم الغدا...
اليوم اللى بعده ممكن تنزل الاول عند منطقة الفنار وتنزل تغطس هناك وهتلاقى فيل مصنوع من هيكل حديدى سنة 2014
ودى مبادرة لصنع بيئة جديدة لنمو الشعاب المرجانية ودة أتجاة جميل جدا لمحبى الغطس وفى دول كتير عملتة زى امريكا و تايلاند و نيوز ودول نزلوا سفن حربية ودبابات وعربيات القطار اللى بتقدم لعمل بيئة جديدة ومزارات تحت المياة
المفترض ان المنطقة دى هيبقى فيها 4 تماثيل تانى غير الفيل وفعلا فى واحد تانى موجود دلوقتى لأحد الرموز الفرعونية و بليل بقى تطلع جبل الطويلات فى سهرة بدوى بس خد معاك لبس تقيل هتقعد تشرب الشاى اللى بالمرمرية وتاكل اللحمة المشوية اللى زى ما بتشوفها فى الافلام ولو ريحت جسمك وبسيط للسماء هتلاقى نفسك فى راحة نفسية وانت فى حتة تانية خالص
ممكن كمان تروح البلو هول و منها لمحمية ابوجالوم و متنساش تعمل سنوركلينج فى الكيفز من الاخر كدة هتحتار تروح فين ولا فين ولا فين. بس عموما الغطس فى دهب متعة متتفوتش
بصراحة 3 ليالى مش كفاية على دهب ولو تعرف تقعد اكتر يبقى كويس فعلا البلد جميلة هتلاقى هناك الكافيهات معمولة من اعادة تدوير الاخشاب و البلاستيك كمان الاسعار زى هنا تقريبا مفيش تلوث مفيش ضوضاء و الناس هادية و اهل البلد بيبقوا مرحبين بيك وكفاية بس انك تبص للجبال و البحر حتى لو قعدت كدة بس معملتش اى حاجة من اللى قلنا عليها..
بالنسبة لانتقالاتك هناك فهتتعامل بعربيات الربع نقل هتتفق مع واحد وتاخد رقم تليفونه المشوار هيتكلف من 50 :70 جنيه طبعا انتم كل ما هنبقوا مجموعة فالسعر هيقل عليكم فى المصاريف
الاسعار:- تقريبا
ثرى بولز 15 جنيه
البلو هول و ابو جالوم بالمركب 100 جنيه
بيتش باجى لوادى جنى 100 جنيه
الهرة فى جبل الطويلات 30 جنيه
===سهل حشيش===
بس محدش تقريبا اتكلم عن سهل حشيش وجمالها وروعتها.يمكن بعض الناس حكت عن تجربتها مع فندق في سهل حشيش مش سهل حشيش نفسها.
البوست دا انا عايز اتكلم في عن سهل حشيش. موقع و تعريف سهل حشيش
سهل حشيش هي منطقة سياحية في الغردقة (قبل الغردقة تقريبا ب 20 كم ) بعد سينزو مول و بوابة الغردقة ب 7 دقايق بالعربية على الشريط الساحلي للبحر الأحمر. ويعد من أحدث المشاريع السياحية العملاقة على سواحل البحر الأحمر.
سهل حشيش فيها فنادق لكن عددها ليس بالكثير تقريبا عشر فنادق او اكثر قليلا,,طبعا افضلهم واجملهم واغلاهم سعرا البارون بالاس واوبري سهل حشيش.
سهل حشيش منطقة جميلة جدا جدا جدا..اول ما تدخلها هتحس انك كانك في حتة من اوروبا من الخضرة والنظافة والجمال المعماري للفنادق و المباني الخاصة,,
الكلام دا من خضرة ونظافة وجمال دا برا الفنادق في شوارع و منطقة سهل حشيش عشان كدا لما حد اعرفه بيزل سهل حشيش اقوله لازم تخرج برا الفندق و تشوف جمال منطقة سهل حشيش.لو على فندق حلو وجميل فيه فنادق كتير جميلة في الغردقة.
كمان سهل حشيش ليها كورنيش ممكن تمشي في برجلك (حوالي 6 كم طوله ) او تأجر عربية الجولف او عجلة.و بكدا هتعدي تشوف جميع الفنادق اللي تطل على البحر من ناحية شاطئها لان طبعا مش هتقدر تخش الفندق جوا لكن قصدي ان الكورنيش دا بتقدر تمشي في لاخره وبالتالي هتمر يجميع الشواطئ للفنادق.
من اكتر المناطق واجملها اللي روحتها في مصر هي سهل حشيش .
ناس كتير فاكرة ان سهل حشيش الاقامة بها غالية جدا والليلة فيها ممكن توصل ل 1500 جنيه للفردين اقامة شاملة
لكن في حل ابسط من كدا بكتير و ارخص وهو الاقامة في استديوهات او شاليهات .في شقق فندقية او استديوهات او شاليهات فندقية بتكون رخصية وممتازة و يكون السعر ممكن ما بين 350 ل 400 الليلة الواحدة لفردين من غير وجبات
===رأس شيطان ====
رأس شيطان جنه على ارض مصر المشوار تقريبا بياخد 6 ساعات وتقريبا الرحلة مش هتبقى مكلفه اوى وهنقولك أزاى ..
الجو الصبح فوق الممتاز يعنى هتنزل المياه عادى جدا لكن بليل طبعا لازم تعمل حسابك فى لبس تقيل
مبدئيا لو معاك عربيه كويسه فهيبقى الاختيار ده افضل من المواصلات او لو عدد حاولوا تأجروا ميكروباص مخصوص افضل من الشركات اللى موجوده دلوقتى ولو هتركب اتوبيس هتركب نويبع بس خليك عارف هتنزل فين بالظبط لانها مش محطة رسميه
اماكن الاقامه هناك بقى بتتنوع ما بين خيم مشدوده على الرمل او أكواخ على تلال او فى اكشاك على البحر علطول بص كل الاختيارات مريحه وانت رايح وعارف انك رايح علشان هتقعد مع الطبيعه بس لو انت أنف اوى خليك فى الاكواخ لانها فيها خصوصيه اكتر والحمامات مشتركه بس طبعا نضيفه لانها منطقه سياحيه..
الكهرباء هناك بمولدات فطبعا على نص الليل هتفصل وتقعد بقى فى جو النار الى هتتلموا حواليها فخلى معاك كشاف طوارئ احتياطى
القعده بقليل هناك بجد ممكن تخليك تعد النجوم لانك هتلاقيها واضحه جدا لان تقريبا مفيش اى ملوثات هناك
الاكل هناك بقى بصراحه من امتع الحاجات ( بما أننا بنحب الاكل ) فالصبح بيبقى فى بيض وعيش بدوى وفول وزبده وبطاطس محمره وطبعا طول اليوم فى اكل عادى لو حابب تطلب وبليل الاكل برده بيبقى غالب عليه الطابع البدوى وعموما خللى بالك لان معظم الاماكن هناك بتجمعلك فلوس الاكل وبتحاسب عليها فى الاخر فلازم تبقى عامل حسابك فى الفلوس
انت رايح تستجم فخللى الموبايل أخر اهتماماتك يدوبك للطوارئ او لو حد عاوز يطمن عليك غير كده نصيحه نفضله خالص وهتلاقى كراسى على البحر معموله للأسترخاء خد معاك كتاب او موسيقى ..
الأجواء بليل من غير نور حلوه اوى وممكن الصبح تتسلق الجبال اللى حواليك وبيبقى فى النشاط ده ممكن تسأل عليه فى الكامب
النوم هناك بيبقى بدرى والصحيان بدرى علشان تستمتع باليوم كامل
لازم يبقى معاك فوطه ومناديل وكشاف والبطاقه طبعا وكوتشى لو حابب تطلع الجبل وبيرسول واووف اللى بيترش على الجسم
