Hazondale Retreats

31/10/2024

မက်လောက်စရာထပ်ဆောင်းခံစားခွင့်တွေရဖို့ U U Ye Kalawthar စီစဉ်တဲ့ Starry Night Camping trip ကိုသာ join လိုက်ပါလို့ တိုက်တွန်းပါရစေ။

30/10/2024

ကလောမြို့လေးကိုလာခဲ့ပါ။ ဟေဇန်ဒေးလ်ကအချိန်တိုင်းမှာလှနေပါတယ်။
https://hazondale.wixsite.com/home

28/10/2024

ဒီနေ့က ငါးရက်တဈေးနေ့နော်။

Check out Hazondale Retreats Kalaw’s video.

17/10/2024

"မင်္ဂလာရှိသော သီတင်းကျွတ်ကာလလေးပါနော်"
ဝါလကင်းလွတ်လို့ မိုးကုန်ပြီး ဆောင်းအကူးလေးမှာ ကလောမြို့လေးက အရင်တိုင်းလှနေပြီနော်။
ရာသီအလိုက်ပွင့်တဲ့ Cosmos ပန်းဝါလေးတွေရယ်၊ ပန်းနှမ်းခင်းတွေ အပြင် Marigold ပန်းခင်းတွေက November လကုန်အထိလောက်တော့ ရှိနေအုန်းမှာပါ။
ရေဘေးဒဏ်ကြောင့် ခေတ္တခဏစိတ်ပင်ပန်းခဲ့ရပေမယ့် လမ်းပန်းဆက်သွယ်ရေးတွေရော၊ လည်ပတ်စရာနေရာတွေပါ ပြန်လည်အသက်ဝင်နေပြီမို့ ခရီးသွားများတဲ့ ဒီကာလမှာ ကြိုတင်မှာယူထားဖို့ တိုက်တွန်းလိုပါတယ်။
အော်ဒါ့အပြင်၊ ကလောမြို့ခရီးသွားလုပ်ငန်းနဲ့ ဆက်စပ်ပြီး အသက်မွေးဝမ်းကျောင်းပြုကြတဲ့ ကလောဒေသ အတွက်ရည်ရွယ်ပြီး အထူးနှုန်းထားတွေနဲ့ ကြိုဆိုလျှက်ရှိနေတယ်ဆိုတာကိုလည်း သီတင်းကောင်းပါးပါရေစေနော်။
ပုံလေးတွေကတော့ အခုရက်ပိုင်းက တိမ်ပင်လယ်ရှုခင်းတွေပါ။
ကျေးဇူးတင်လျှက်...
Hazondale Retreats
https://hazondale.wixsite.com/home

11/10/2024

ပြည်တွင်းပြည်ပ ခရီးသွားတွေကြားမှာ ရေပန်းစားတဲ့ ကလောမြို့လေးဟာ မကြုံစဖူးခံစားခဲ့ရတဲ့ ရေကြီးမြေပြိုဒဏ်ကို ပြင်းထန်စွာခံစားခဲ့ရပြီး ပြန်လည်ထူထောင်ရေးတွေ အစွမ်းကုန်ပြန်လုပ်နေပြီဖြစ်ပါတယ်။
လူဦးရေ ၃သောင်းအောက်သာရှိတဲ့မြို့ငယ်လေးနဲ့ ပတ်ဝန်းကျင်မှတိုင်းရင်းသားတို့ဟာ စိုက်ပျိုးရေးကလွဲရင် အဓိက ခရီးသွားလုပ်ငန်းအပါ်မှာ မှီခိုနေကြရပါတယ်။
အတိုချုံးပြောရင်၊ ကလောမြို့ကိုလာရောက်လည်ပတ်ခြင်းက သင်ရဲ့ ကူညီမစခြင်းဘဲဖြစ်ပါတယ်။
ဒီလိုလာရောက်နိုင်ဘို့ Hazondale Retreats ကနေပြီး သဘာဝဘေးဒဏ်မှ ပြန်လည်ထူထောင်ခြင်းမှာ ပါဝင်သောအားဖြင့်၊ အထူးနှုန်းထားများဖြင့် ပိတ်ရက်ရှည် သီတင်းကျွတ်ကာလအတွက် လျှော့ပေးပြီးထားသောစျေးနှုန်းများထက် ပို၍သက်သာသောနှုန်းထားများဖြင့် ဧည့်ဝတ်ပြုဖို့ရန် ဖိတ်ခေါ်လျှက်ရှိပါတယ်ဆိုတဲ့ အကြာင်း၊ ကြော်ငြာမဟုတ်တဲ့ သီတင်းကောင်းအမှန်ကို လက်တို့ပါရစေနော်။

ကျေးဇူးပြု၍ အသေးစိတ်ကို Page Messenger ကဖြစ်ပါစေ၊ Phone 09 254020652 သို့ ဆက်သွယ်ပေးပါနော်။
Hazondale Retreats

ကလောလမ်းညွှန်

11/09/2024

ကလောမြို့အတွက် RedAlert ပါ။
Typhoon Yagi နဲ့အတူပါလာတဲ့ မိုးကြီးမှုကြောင့် ရှမ်းပြည်နေရာ အတော်များများမှာ ရေကြီးရေလျှံမှုတွေတောက်လျှောက်ဖြစ်နေပါတယ်။ ကလောမြို့အတွက် သမိုင်းတင်ရမည့် ရေကြီးမှုကို မနေ့ ၁၀ ရက်နေ့ မနက်ကတည်းစတင်ခဲ့ပြီး မိုးရွာသွန်းမှုအခြေအနေအရ ပြန်ကျမယ် မကျဘူးဆိုတာ မသိနိုင်ပါဘူး။ လူနေရပ်ကွပ်တော်တော်များများ ရေမြုပ်နေပြီး၊ ပျက်စိးဆုံးရှုံးမှုတွေများသလို၊ ပိတ်မိနေပြီးဒုက္ခရောက်နေသူတွေ များစွာရှိနေပါတယ်။
ပြည်ထောင်စုလမ်းမကြီးမှာဆိုရင် နမ့်ပန်တက်အနီး ပြည်ညောင်တံတားပျက်စီးမှုရှိတယ်လို့ သိရပြီး ကားများပိတ်မိနေတယ်လို့ကြားရသလို၊ ကလောမှအထွက် အင်းပြင်မရောက်ခင် သစ်တောစိုက်ခင်းနားမှာ လမ်းမကြီးပေါ်ရေကျော်နေလို့ ကားလေးများနစ်နေပြီး အသွားအလာလုပ်လို့ အဆင်မပြေသေးပါဘူး။ ဒါကြောင့် အင်းပြင်၊ မြင်းကဘက်သွားမည့် သူများလည်း ဒီရက်ပိုင်းအတွင်း အဆင်မပြေလောက်သေးပါ။
Internet လိုင်းများ၊ လျှပ်စစ်မီးများပြတ်တောက်နေသလို၊ mobile networks တော်တော်များများလည်း ပြတ်တောက်နေပါတယ် ဆိုတာ အသိပေးပါရေစေ။
အားလုံးကလောမြို့နဲ့ အတူ သဘာဝဘေးဒဏ်ကျရောက်နေတဲ့ နိုင်ငံတဝှမ်းလုံးအတွက် သတိရပေးကြပါလို့။

Hazondale Retreats

Photo by: Ko Zin Min Htet, Kalaw travelling

06/09/2024

အခုဆိုရင် September လထဲကိုရောက်လာပြီနော်။
နေသာတဲ့ရက်တွေများလာပေမယ့် တောင်ခိုးတွေနဲ့စိမ်းညို့နေတဲ့ ရှမ်းတောင်တန်းကြီးတွေက စိမ်းလန်းခြင်းတွေနဲ့ ရှုမငြီးဖွယ်ရှိနေသလို မိုးအကုန်ဆောင်းအကူးကနေပြီး တိမ်ပင်လယ်ဖြစ်တဲ့ မနက်ခင်းတွေလည်းကြုံကြိုက်နိုင်ပါသေးတယ်။
ရာသီအလိုက်ပန်းတွေက အစွမ်းကုန်လှနေသလို၊ ကလောမြို့ကနေမိနစ်ပိုင်းအတွင်းမှာပင် လှပလွန်းတဲ့ Marigold ပန်းခင်းတွေကို ဒီနှစ်မှာ ထူးထူးခြားခြားခံစား လည်ပတ်နိုင်ပါသေးတယ်။
ပွင့်လင်းရာသီလို ဧည့်သယ်တွေနဲ့ ကျပ်ညှပ်နေတာ၊ ဓါတ်ပုံရိုက်ဖို့ စောင့်ဆိုင်းနေရတာမျိုးမရှိဘဲ စိတ်အေးချမ်းသာစွာ အပန်းဖြေနိုင်မယ့် အချိန်မျိုးပါ။
ကားခ၊ ဆီဘိုးကအစ၊ အရာရာစျေးနှုန်းတွေမြင့်တက်လာပေမယ့် အခုလိုခက်ခဲချိန်မှာ ခေတ္တလောက်ဖြစ်ဖြစ် အပန်းဖြေနိုင်အောင် စျေးနှုန်းကိုမတက်ထားတည့်အပြင် 15% OFF ပါထပ်ပြီးပေးထားပါတယ်။

Hazondale Retreats က ကလောမြို့ထဲ ခြံကျယ်ကြီးတွေနဲ့ဆိတ်ငြိမ်အေးချမ်းတဲ့နေရာမှာ ရှိပြီး ကလောနာရီစင်ကနေဆို ၂မိနစ်လောက်ဘဲဝေးပါတယ်။ ကလောဆိုတဲ့ အရသာစစ်ကိုခံစားနိုင်ပြီး၊ အနီးနားမှာ နာမည်ကြီး Cafe တွေကို ထင်းရှုးနံ့သင်းပြီး ရှုခင်းလေးတွေရှိတဲ့ လမ်းပေါ်လျှောက်ပြီးသွားနိုင်ပါတယ်။
ခြံဝန်းကျယ်ထဲမှာ သေးငယ်ပေမယ့် ချစ်စရာ ကောင်းတဲ့ အိမ်လေးက အိပ်ခန်းနှစ်ခန်းရှိပြီး ဧည့်သယ် ၄ ယောက် အပြင် နောက်ထပ် ၂ ယောက် ကို Sofa-bed ပေါ်မှာ အိပ်နိုင်ပါတယ်။
* အိပ်ခန်း ၂ ခန်း (၂ယောက်အိပ်ကုတင် ၁ ခန်း၊ ၁ ယောက်အိပ် ၂ကုတင် ၁ခန်း)
* ရေချိုးခန်း အိမ်သာ ၂ ခန်း
* ဧည့်ခန်း ၂ ခန်း
* Mini Kitchen နဲ့ dinning
* Balcony with views
* ခြံအတွင်း Fire pit နဲ့ BBQ space
* မြက်ခင်းစိမ်းလေးနဲ့ ပန်းပင်၊ စိုက်ခင်း
* Guitar, Badminton, Card games
* မနက်စာအတွက် ခေါက်ဆွဲခြောက်၊ ကြက်ဉ
* လျှပ်စစ်မီးက အချိန်ပြည့်နီးပါးရပါတယ်။ မီးပြတ်ရင်တော့ မီးအိမ်၊ ဓါတ်မီးတို့ ပေးထားပါတယ်
* 24hr Wifi
* ကားအနည်းဆုံးနှစ်စီး လုံခြုံစွာရပ်ထားနိုင်ပါတယ်။
အိမ်နဲ့ကပ်ရပ်မှာ ကလောမြို့က နာမည်ကြီး Orange seafood hotpot ဆိုင်ရှိပြီး၊ ခြံကျော်ပြီး တရုတ်စာနဲ့ အခြားအစားအသောက်တွေကို လွယ်လွယ်ကူကူ မှာယူနိုင်ပါတယ်။

မကြာခင်မှာဘဲ Hazondale မှာ ဆုံကြမယ်နော်။
အခြားအချက်အလက်နဲ့ ဓါတ်ပုံတွေကို ဒီမှာဝင်ကြည့်ပေးပါနော်။
https://hazondale.wixsite.com/home/

01/09/2024

Hanzondale နဲ့ ပတ်သက်ပြီး သတင်းအချက်အလက်အားလုံးကို လွယ်လွယ်ကူကူနဲ့တနေရာထဲမှာ ကြည့်ရှုလို့ရမဲ့ website ကိုပြင်ဆင်လွှင့်တင်ထားပြီးပါပြီ။
မကြာခင်မှာဘဲ ကလောမြို့က Hazondale မှာလာရောက်အပန်းဖြေရင်းတွေ့ကြမယ်နော်။

ဒီ link ကနေကြည့်ပေးပါ။

03/08/2024

"ကလောမြိုမ ပလောင်ရေပေါ်ဈေး"

ကလောချောင်းရေပြည့်ရင် ပြန်လင်းတယ်လို့ဆိုရိုးစကားရှိပါတယ်။
အကယ်လို့ပြန်မလင်းလို့မိုးဆက်ရွာနေမယ်ဆိုရင်တော့ဖြင့် နောက်တဈေးကသေချာပေါက် ပလောင်ရေပေါ်ဈေးဖြစ်ပါပြီဆိုတဲ့အကြောင်း...

ပြန်လင်း = မိုးရပ်၍အလင်းပြပြမြင်ရသည်။

အပျော်သဘော‌ဖြင့်သာဖတ်ပေးပါနော်။

30/07/2024

"မိုးထဲလေထဲက ကလောစျေး"

ဒီရက်ပိုင်းမှာ မိုးအရမ်းမကြီးပေမယ့် နေ့ရောညပါဆက်တိုက် မရပ်မနားပါဘဲ။ မနက် ၉ နာရီလောက်မှာတောင် အပူချိန်က ၁၈ဒီဂရီဘဲရှိပြီး လေနဲ့မိုးနဲ့ အုံ့ဆိုင်းနေတာကြောင့် အိမ်ထဲမှာဘဲကွေးနေချင်စိတ်ကို တွန်းလှန်ရင်း စျေးဘက်ထွက်ခဲ့ပါတယ်။ ဒီလိုရာသီဥတုကို စိန်ခေါ်ပြီး လာရောက်ရောင်းချရသူရော စျေးသုံးလာတဲ့သူတွေရော ခက်ခဲပင်ပန်းကြပါတယ်။ တဝမ်းတခါးအတွက် သက်ဝင်လှုပ်ရှားနေတဲ့ မိုးထဲလေထဲက ကလောစျေးနေ့ပုံရိပ်တချို့ကို မျှဝေပါရေစေနော်။

ချစ်ခြင်းအားဖြင့်။

Hazondale Retreats
https://bit.ly/3xg5WyL

26/07/2024

ဆင်တောင် (၃၉၃၄ပေ)သို့ အလည်တခါက်

ကလောမြို့ရဲ့အနောက်တောင်ဘက်မှာရှိတဲ့ ဆင်တောင်ရွာဘက်ကိုအလည်လိုက်ခဲ့ပါအုန်းနော်။

[အများသူငါသွားနေကျနေရာများထက် ခွဲထွက်ရှာဖွေစူးစမ်းလိုသူများအတွက်ရည်ရွယ်ပါတယ်။ ဖတ်ရှုချိန် ၅ မိနစ်ခန့်။]

“Be a traveler, not a tourist.”

မသွားခင် Google Maps ပေါ်မှာလမ်းကြောင်းရှာကြည့်ပေမယ့် အဆင်မပြေပါဘူး။ ဟိုးအရင်ကရောက်ခဲ့ဘူးတဲ့ ဟင်းခါးကုန်းပလောင်ရွာကိုလည်း မြေပုံပေါ်မှာ စေတီတောင်ရွာနာမည်နဲ့ဖြစ်နေတော့ ဘာဘဲဖြစ်ဖြစ် မေးမြန်းသွားမယ်ဆိုပြီး ကလောကနေ နေ့လည်စာစားပြီး ဆိုင်ကယ်နဲ့ထွက်လာဖြစ်ပါတယ်။ လမ်းကတော့ တာရော၊ ရွာသစ်လမ်းဆုံအထိ ကျောက်ချောခင်းလမ်း ဖြစ်ပေမယ့်၊ အဲဒီကနေ ဟင်းခါးကုန်းရွာအထိ မြေနီလမ်းဖြစ်လို့ တော်တော်သတိထားသွားရပါတယ်။ မိုးရွာချိန်နဲ့ ရွာပြီးကာစဆိုရင်တော့ အတွေ့အကြုံမရှိရင် မသွားသင့်ပါဘူး။
ခရီးစဉ်ရဲ့ရည်ရွယ်ချက်က ဆင်တောင်နားမှာရှိတဲ့ တောင်ကြားရထားလမ်းနဲ့ ဆင်တောင်ရွာကို ရထားဆိုက်ရောက်ချိန်ကိုလေ့လာရင်း အပြန်မှာ ကမ်းပါနီ (ကဘားနီ) ဉမင်လှိုင်ခေါင်းကို သွားကြည့်ဖို့ဖြစ်ပါတယ်။ လမ်းက ဟင်းခါးကုန်းအထွက်ကနေ နှစ်ခွ ခွဲးသွားတာဖြစ်လို့ ရထားအမှီ ဆင်တောင်ဘက်ကိုအရင်သွားဖို့ ရွှေးချယ်ခဲ့ပါတယ်။
အရင်ဆုံး ပလောင်ရွာကိုဝင်ပြီး ဖုန်းထဲမှာ save ထားတဲ့ပုံတွေပြပြီး လမ်းကြောင်းနဲ့နေရာကိုအကူညီတောင်းခဲ့ပါတယ်။ သူတို့ကျေးဇူးကြောင့် လွယ်လွယ်ကူကူဘဲ ဆင်တောင်မရောက်ခင် တောင်ကြားရထားလမ်းကိုရှာတွေ့ပါတယ်။ တောင်နံမြင့်ကြီးကြားထဲကို ကွေ့ဝိုက့်ဝင်လာတဲ့ ရထားလမ်းက ကျောက်သားနံရံမှာ ရေညှိစိမ်းစိမ်းနဲ့တွဲလောင်းကျနေတဲ့ နွယ်ပင်တွေ၊ တိတ်ဆိတ်ပြီး အလင်းရောင်ပြပြသာရှိနေတဲ့ တောင်ကြားထဲမှာ လျှောက်သွားရတဲ့ ခံစားချက်က ပထမတော့သဘောကြအံ့သြမှင်သက်မိပြီး တဖြည်းဖြည်း ခြောက်ခြားသလို ကျောထဲ့စိမ့်လာမိသလိုပါဘဲ။ အဖော်နဲ့သွားဖို့ အကြံပြုလိုပါတယ်။
အဲဒီဘက်ကနေမှဆက်ဆင်းလာလိုက်ဆင်တောင်ဝင်တာနဲ့ အစိုးရကျောင်းထိပ်လေးတင် နောက်ထပ် တောင်ကြားရထားလမ်းထပ်တွေ့ရပြန်တယ်။ ဒီနေရာက ပထမနေရာလောက်မရှည်လျားပေမယ့် လှပါတယ်။ လူသူမရှိပေမယ့် ကျောင်းကအသံတွေသဲ့သဲ့ကြားနေရတော့ စိတ်သက်သာရပါတယ်။ နောက်မှာသိရတာ၊ ဒီနေရာကို သဲကျင်းလို့ခေါ်ပြီး၊ ကလောဘက်ကရထားလာရင် အရှိန်နဲ့ဆင်းလာတာမို့ ဘူတာရဲ့အပေါ်မှာရှိနေတဲ့ သဲကျင်းတောင်ကြားမှာ အရှိန်သတ်၊ ပြီးမှနောက်ပြန်လွန်းထို့းပြီး သံလမ်းပြောင်းကာ ဘူတာဝင်တယ်လို့ လေ့လာရပါတယ်။
ရထားအဝင်ကမှီရုံလေးဘဲဆိုတော့ ဘူတာကိုအမြန်သွားပြီး ရထားမလာခင်၊ ရပ်ထားချိန်နဲ့၊ ပြန်ထွက်သွားချိန်ထိ ရှိနေလိုက်ပါတယ်။ ဆင်တောင်ဘက်ကထွက်တဲ့ မျှစ်၊ ငပျော၊ ပိန္ဒဲ တို့ကို အဓိကရောင်းချတာတွေ့ရပြီး၊ ရထားခဏရပ်ချိန်မှာတော့ တော်တော်လေးစည်ကားလိုက်ပါတယ်။ ရထားမောင်းစက်ဘိုကတော့ အညောင်းညာပြေလေး ခြင်းဝိုင်းမှာ ဝင်ခတ်နေလေရဲ့။
ရွာထဲခေတ္တလောက်လည်ချင်ပေမယ့် ကဘားနီသွားချင်သေးတာကြောင့် ရထားထွက်တာနဲ့ ပြန်ဖြစ်ပါတယ်။ အပြန်တောင်တက်လမ်းက ထင်ထားတာထက် စိန်ခေါ်မှုများပါတယ်။ လမ်းခွဲရောက်တာနဲ့ ကဘားနီဘက်ကို ချိုးပြီး မမှောင်ခင်ပြန်ရောက်နိုင်တယ်လို့ မျှော်လင့်ပေမယ့် လမ်းကတကယ့်ကျောက်ကြမ်းလမ်းဖြစ်ပြီး တောထဲမှာ အလင်းရောင်အတော်လေးနဲလာတာရယ်၊ အပြန်မြေသားလမ်းကို မိုးမကြီးလို့မချော်ခင် ခက်ခက်ခဲခဲဆုံးဖြတ်ပြီးမှ လမ်းတဝက်နေနှုတ်ဆက်ပြီး ကဘားနီကို နောက်တခါအတွက်ထားခဲ့လိုက်ပါတယ်။

ချစ်ခြင်းအားဖြင့်။

Hazondale Retreats
https://bit.ly/3xg5WyL
“Standout from the crowd. Be different. Experience awesomeness”

20/07/2024

ကလောအနောက်ဖက်က ပလောင်ရွာတွေဖက်ကို ခဏလောက်အတူသွားကြည့်ရအောင်နော်။

[အများသူငါသွားနေကျနေရာများထက် ခွဲထွက်ရှာဖွေစူးစမ်းလိုသူများအတွက်ရည်ရွယ်ပါတယ်။ ဖတ်ရှုချိန် ၃ မိနစ်ခန့်။]
Be a traveler, not a tourist.

ဒီခရီးကအရင်ကဆိုခက်ခက်ခဲခဲလမ်းလျှောက်သွားရပြီး အသွားအပြန်ဆိုရင် တနေ့ခရီးပါဘဲ။ အခုတော့ ကျောက်ချောခင်းလမ်းရှိနေပြီဆိုတော့ ကား၊ ဆိုင်ကယ်၊ စက်ဘီးနဲ့ နာရီပိုင်းနဲ့တင် အသွားအပြန်လုပ်နိုင်ပါပြီ။ ဒီလမ်းကနေဘဲ နာမည်ကျော်ပလောင်တောင် viewpoint ကိုပါ တခါတည်းလည်ပတ်နိုင်ပါသေးတယ်။

နှီးဘုရားကိုကျော်လိုက်တာနဲ့ စိမ်းညို့နေတဲ့ ထင်းရှုးတောကြီးကို ဖြတ်ပြီး ကွေ့ကာဝိုက်ကာနဲ့ လမ်းတဖက်မှာတော့ ရေအေးကန် ကာကွယ်တောကြီးရယ် တဖက်မှာတော့ မျက်စိတဆုံး တောင်တန်းအသွယ်သွယ်နဲ့ ရင်သပ်ရှုမောစရာ မြင်ကွင်းတို့က စိတ်ကိုချက်ခြင်းဆိုသလို ကြည်လင်သွားစေပါတယ်။

မကြာခင်မှာဘဲ သပ်ရပ်လှပတဲ့ ရွာသစ်လို့အမည်တွင်တဲ့ ပလောင်ရွာကြီးကို တောင်စောင်းမှာ လက်ဖက်ခင်းတွေကို ဖြတ်ပြီးတွေ့ရပါတယ်။ ရွာရဲ့အနောက်ခံကတော့ ရွှေမင်းဖုန်းစေတီနဲ့ နောက်ထပ် ပလောင်ရွာဖြစ်တဲ့ ညောင်ကုန်းရွာ တစိတ်တပိုင်းကို ခပ်ပြပြလေးမြင်းနေရပါတယ်။ ခြေကျင်ခရီးကြမ်းလျှောက်တဲ့သူတွေကတော့ ရွာသစ်ကို ဆင်းပြီး ရွာထဲကဖြတ်ပြီး အိမ်တွေလည်ပတ်၊ လူမျိုးဓလေ့ထုံးတမ်းတွေကိုလေ့လာ၊ ဘုန်းကြီးကျောင်းကိုလည်ပြီး လျိုထဲကိုပြန်ဆင်းပြီး နောက်ထပ်ပလောင်ရွာဖြစ်တဲ့ တာရောကိုဆက်လည်ပတ်လေ့ရှိပါတယ်။ အရင်တုန်းက ဒီရွာမှာ ရှေးပလောင်တို့ရဲ့နေထိုင်မှုပုံစီဖြစ်တဲ့ အိမ်ရှည် (long house)တွေရှိခဲ့ဖူးပါတယ်။ ဒီကနေမှ ဟိုးတောင်ထိပ်မှာရှိနေတဲ့ ကိုမိုတေးတို့တဲ (ယခု viewpoint) ကိုအဆုတ်ကွဲလောက်အောင် ပေထောင်ချီပြီး ပြန်တက်ရပါတယ်။ မတက်နိုင်ရင်လဲ နေ့လည်စာငတ်မယ်မဟုတ်လား။
မိုးတွင်းကာလမှာ ပလောင်တောင်ဖက်ကိုလည်ပတ်ရတာ စိတ်ချမ်းသာစရာကောင်းပါတယ်။ မြင့်မားမတ်စောက်တဲ့ တောင်တွေပေါ်မှာစိုက်ထားတဲ့ လက်ဖက်၊ လိမ္မော်၊ ပိန္ဒဲ နဲ့ ဟင်းသီးဟင်းရွက်စိုက်ခင်းတွေကို လေ့လာမိတဲ့အခါ ပလောင်လူမျိုးတို့ရဲ့ ပင်ပန်းစွာလုပ်ကိုင်စားသောက်ရတာကို စာနာမိသလို တန်းဖိုးလည်းပိုပြီးထားလာမိပါတယ်။

ပြန်ခါနီး ပလောင်တောင် Viewpoint ကို ဝင်ခဲ့ပေမယ့် တိမ်တွေအရမ်းပိတ်လာပြီး ညနေလည်းစောင်းလာပြီးမို့ ကလောကို ပြန်လာခဲ့ပါတော့တယ်။

ချစ်ခြင်းအားဖြင့်။
Hazondale Retreats

Standout from the crowd. Be different. Experience awesomeness.

17/07/2024

ဒီတပတ်တော့ ကလောမြို့ရဲ့တောင်ပိုင်းကို ခဏအလည် လိုက်ခဲ့ပေးပါအုန်းနော်။
အများသူငါသွားနေကျနေရာများထက် ခွဲထွက်ရှာဖွေစူးစမ်းလိုသူများအတွက်ရည်ရွယ်ပါတယ်။ ဖတ်ရှုချိန် ၃ မိနစ်ခန့်။
Be a traveler, not a tourist.

ကလောဆိုတာ ပြည်တွင်းခရီးသွားတွေကြား ခေတ်မစားခင်ထဲက နိုင်ငံတကာက ဧည့်သည်တွေကြားမှာ အသစ်သစ်တွေကိုမှစွန့်စားရှာဖွေလိုသူတွေ၊ တိုင်းရင်းသားတို့ရဲ့လူနေမှုနဲ့ သဘာဝအလှအပတွေကို မြတ်နိုးသူ ခရီးသွားများအတွက် မဆုံးနိုင်တဲ့ အခွင့်အလမ်းတွေပြည့်နေတဲ့ ဒေသတခုပါ။
အများသူငါလည်ပတ်နေတဲ့ ရိုးအီနေတဲ့ beaten track လို့ခေါ်တဲ့ လမ်းဟောင်းကြီးကနေခွဲထွက်ပြီး မတူညီတဲ့ အတွေ့အကြုံသစ်တွေအတွက် ကိုယ့်ကိုယ်ကို စိန်ခေါ်ကြည့်စေချင်ပါတယ်။ ဒီအတွက် နောင်တရစရာမရှိတဲ့အပြင် တကယ်ဘဲဘဝမှာ မြတ်မြတ်နိုးနိုးနဲ့ အမှတ်ရစရာတွေ ကျန်ရှိနေပါလိမ့်မယ်။
တောင်တန်းတွေထူထပ်ကြမ်းတမ်းတဲ့ ကလောဒေသမှာဆန်စပါးစိုက်ပျိုးဖို့ လှေကားထစ်စိုက်ပျိုးနည်းကို အသုံးချရပါတယ်။ ဒီလိုမိုးဉီးရာသီမှာ လှေကားထစ်စိုက်ခင်းတွေကိုလေ့လာဖို့ ကလောမြို့တောင်ပိုင်းမှာရှိတဲ့ နန့်သဲ၊ မြင်စိုင်းကုန်းနဲ့ မြင်းဒိုက်ရွာတွေဖက်ကိုသွားလည်ဖြစ်ခဲ့ပါတယ်။
မနက်စောစော မိုင်းလုံးတောင်ခြေလမ်းအတိုင်း Nanthe’ Café Garden ကိုကျော်လိုက်တာနဲ့ စည်ကားနေတဲ့ နန့်သဲရွာထဲကိုရောက်လာပါတယ်။ အခုတော့အိမ်ယာစီမံကိန်ုးတွေ၊ ဟိုတယ်တွေနဲ့ နန့်သဲရဲ့မနက်ခင်းကလှုပ်ရှားနေပါတယ်။ ရွာလေးကိုကျော်တာနဲ့ တောင်ကြားတွေထဲမှာ ဟိုတကွက်ဒီတကွက်နဲ့ စိမ်းစိုနေတဲ့ စပါးခင်းတွေတွေ့နေပါပြီ။ မြင်မြင်သမျှရှုခင်းတွေက လှလွန်းလို့မကြာခဏရပ်ပြီးငေးလိုက်၊ ဓါတ်ပုံရိုက်လိုက်နဲ့ပေါ့။ နန့်သဲကျော်တာနဲ့ ကွေ့ဝိုက်ပြီးတက်လာတဲ့လမ်းလေးက ဘေးဘက်က ရေအေးကန် ကာကွယ်တောကြီးနားကနေကပ်ပြီးသွားတာမို့ နက်မှောင်အေးစိမ့်နေပြီး၊ လမ်းတဖက်မှာတော့ ထူးထူးခြားခြား မြေသားနဲ့ဆောက်ထားတဲ့ (mud house) အိမ်လှလှလေးတချို့ကိုတွေ့ရပါတယ်။ မြင်စိုင်းကုန်းရွာထဲကိုမရောက်ခင်အထိ လမ်းတလျှောက်လုံး လှေကားထစ်စိုက်ခင်းတွေနဲ့ မိုးရွာရွာနေပူပူ ကြိုးစားစိုက်ပျိုးနေကြတဲ့ တိုင်းရင်းသားတို့ရဲ့လုပ်ငန်းခွင်ကိုလှပတဲ့ရှုခင်းတွေနဲ့အတူ လေ့လာခဲ့ရပါတယ်။ မြင်စိုင်းကုန်းက မြင်းဒိုက်နဲ့ကပ်ရပ်ရှိနေပြီး စတိုးဆိုင်ကြီးကြီးတွေ၊ သစ်တော်ခြံကျယ်ကြီးတွေနဲ့ စိုက်ပျိုးရးကို အဓိကအသက်မွေးတဲ့ရွာကြီးပေါ့။
မြင်းဒိုက်က ဘူတာရုံရှိတဲ့ရွာလေးဖြစ်ပြီး ကလောအလွန်တဘူတာ သို့ ကလောအလိုတဘူတာပေါ့။ ဒီဘူတာက ရွာရဲ့လည်ပတ်ဖို့အချက်အခြာဖြစ်ပြီး ကိုလိုနီခတ်ကျန် အဆောက်အဦးနဲ့ မီးရထားနဲ့ဆိုင်တဲ့ သမိုင်းတွင် ပစ္စည်းတွေက အတိတ်ကာလကို တွေးဆစေပါလိမ့်မယ်။
ဘူတာနဲ့ကပ်လျှက်ရှိနေတဲ့ လက်ဖက်ရည်ဆိုင်လေးကတော့ မြင်းဒိုက်ရဲ့ မမေ့နိုင်စရာဆိုင်တခုထက်ပိုပါတယ်။ လွန်ခဲ့သောနှစ်ပေါင်းများစွာက trekking trip သွားရင် နေ့လည်စာအမြဲစားခဲ့တဲ့ဆိုင်ပါဘဲ။ ဒါပေမယ့် အရင်လူတွေမဟုတ်တော့ပါဘူး။ ကလောမှာကတည်းက အီကြာကွေးအရမ်းကောင်းတယ်လို့ကြားဖူးပေမယ့် ရောက်သွားတဲ့အခါတော့ ကုန်သွားပါပြီ။ ဗိုက်ကလည်းဆာနေပြီဆိုတော့ မကြိုက်ပေမယ့် ရနိုင်တယ့် ချာပါတီနဲ့လက်ဖက်ရည်ဘဲမှာလိုက်ပါတယ်။ တိုတိုပြောရရင် တသက်စားဖူးတဲ့ ချာပါတီထဲမှာ အကောင်းဆုံးလို့ ပြောလို့ရပါတယ်။ ဒါအပြင် လက်ဖက်ရည်က ထူးခြားတဲ့ နှပ်ရည်အနံ့မွေးမွေးလေးနဲ့ ကလောအပြန်လမ်းအထိ လျှာထဲမှာစွဲပြီးပြန်လာခဲ့ရပါတယ်။ ဆိုင်အပြင်အဆင်က ပန်းတွေအစုံနဲ့မို့ စိတ်ကို လန်းဆန်းစေပြီး၊ စာအုပ်နှစ်သက်သူတွေအတွက် စာဖတ်ဖို့ စာကြည့်စားပွဲလေးပါထားပေးထားတာ ထူးခြားပါတယ်။ အချိန်ရရင် မြင်းဒိုက်ကနေ မိနစ်ပိုင်းလောက်ဘဲ ဆက်သွားရင် ရွာပုဖက်က နောက်ထပ်အလှတရားတွေပါခံစားနိုင်ပါသေးတယ်။
ကလောကနေ လွယ်လွယ်ကူကူနဲ့ အများနဲ့မတူ သဘာဝအလှအပတွေကို နေ့တဝက်သို့ နာရီပိုင်းနဲ့တင်ခံစားချင်ရင်တော့ ဒီခရီးတိုလေးကို တိုက်တွန်းလိုက်ပါတယ်။

ချစ်ခြင်းအားဖြင့်။
Hazondale Retreats

Standout from the crowd. Be different. Experience awesomeness.

12/07/2024

ဒီတခါတော့ ကလောမြို့ရဲ့ မြောက်ဘက်မှာရှိတဲ့ တောင်တန်းတွေဆီကို ခဏအလည်လိုက်ခဲ့ပါနော်...

ကလောမြို့ကိုရောက်လာခဲ့ရင် ဘယ်မှဝေးဝေးသွားစရာမလိုဘဲ အနီးအနားမှာ နာရီပိုင်းလေးအချိန်ပေးလိုက်တာနဲ့ လှပတဲ့ရှုခင်းတွေနဲ့ ထင်းရှုးနံ့သင်းသင်လေးနဲ့ ရှင်းသန့်တဲ့လေထု၊ စိတ်ကြည်နှုးမှုပေးနိုင်တဲ့ သဘာဝတရားကိုခံစားနိုင်ပါတယ်။

ဒီမြောက်ဖက်အခြမ်းမှာတော့ နာမည်ကျော် သိမ်တောင်ကျောင်း၊ City View။ တောင်မင်းကြီးခုံပြာနဲ့ မနောလှတောင်ဘုရား နဲ့ အဖေ့ခြံ ကော်ဖီဆိုင် / ပန်းစိုက်ပျိုးရေးတို့ ရှိနေပါတယ်။ ဒေသခံတွေအတွက်တော့ မနက်သို့ ညနေပိုင်း လမ်းလျှောက်ကြတဲ့ ထင်းရှုးတန်းလမ်းလေးပေါ့။ ကလောမြို့ကို ထင်းရှုးပင်တန်း လမ်းကျဉ်းလေးကနေ ပြပြလေး မြင်နေရတာလည်း ခံစားမှုတမျိုးပါဘဲ။ ညနေပိုင်းဆိုရင်တော့ sunset လေးကြည့်ရင်း ပြန်ဆင်းရတဲ့အရသာကတော့ မမေ့နိုင်စရာပါဘဲ။
တနေရာကဆိုရင် ဟိုးအဝေးက ပလောင်လူမျိုးတို့ရဲ့ရွာကြီးဖြစ်တဲ့ ပိန္ဒဲပင်ရွာကိုလှမ်းမြင်နေရပြီး၊ တချို့နေရာတွေဆိုရင် နာမည်ကျော် Kashmier ကတောင်ကြားမြင်ကွင်းတွေလိုပါဘဲ။
ဒီတောင်တန်းတွေက အမြင့်ပေ ၅၀၀၀ ကျော်အထိမြင့်တာကြောင့် ပတ်ခြာလည် မြင်ကွင်းတော်တော်များများကို မြင်ရပါတယ်။ ရေယားဘက်ကပြည်ထောင်စုလမ်းမကြီး၊ မနောလှတောင်ဘုရား၊ အိုးစည်တောင်ဘုရား၊ စခန်းသာဘက်ကမြင်ကွင်းတွေကနေ မှိုင်းလုံးတောင် microwave နဲ့ ဟိုးဝေးဝေးက နန့်သလဲတဲအထိဆိုပါတော့။

အားလုံးဘဲ ကျန်းမာပျော်ရွှင်လုံခြုံရတဲ့ သောကြာပိတ်ရက်လေးတွေဖြစ်ပါစေလို့...
ချစ်ခြင်းအားဖြင့်။

Hazondale Retreats
https://bit.ly/3xg5WyL

05/07/2024

ဘာလိုလိုနဲ့ သောကြာနေ့ပြန်ရောက်လာပြန်ပြီနော်။
အရာရာအားလုံး အဆင်ပြေချောမွေ့မနေပေမယ့် မွန်းကြပ်မှုတွေထဲကနေ ခဏလောက်ဖြစ်ဖြစ် ထွက်လာခဲ့ဖို့ ကလောမြို့လေးက အရင်တိုင်းရှိနေပါတယ်။
ဒီနေ့က လကွယ်သောကြာဖြစ်လို့ ဒေသခံတွေရော၊ ရပ်ဝေးဧည့်သည်တွေကို စည်ကားနေတဲ့ နန်းအွမ်ဘက် မြင်ကွင်းတချို့ကို အလွမ်းပြေစေဖို့ဖော်ပြလိုက်ပါတယ်။
အားလုံးဘဲ လုံခြုံပျော်ရွှင်ရတဲ့ ပိတ်ရက်လေးတွေဖြစ်ပါစေလို့ ...
ချစ်ခြင်းအားဖြင့်။

Hazondale Retreats
https://bit.ly/3xg5WyL

30/06/2024

🏠Promotion Alert!
တောင်ပေါ်ဒေသ ကလောမြိုလေးရဲ့ မိုးရာသီက တနေကုန် အုံ့ဆိုင်းနေတာထက် ပြန်လင်းလာလိုက်၊ တိမ်ခိုးတွေကြားထဲ ရောက်သွားလိုက်၊ ကောင်းကင်ပြာပေါ်မှာ တိမ်ဆိုင်တွေ ပြေးသွားလိုက်နဲ့ပေါ့။ မြန်မာပြည်ရဲ့တောင်ပိုင်းနဲ့ ကမ်းရိုးတမ်းဒေသနဲ့ မတူကွဲပြားပြီး မိုးတွင်းကာလမှာ ထူးထူးခြားခြား မှော်ဆန်အောင်လှတဲ့ မြင်ကွင်းတွေ၊ သန့်ရှင်းပြီး ရှုရှိုက်လို့ကောင်းတဲ့လေထုနဲ့ အရောင်သွေးစုံတဲ့ ပန်းမန်သစ်ပင်တို့နဲ့ ရာသီပေါ် ဒေသအစားအသောက်တို့က သေချာပေါက် လာလည်ရကျိုးနပ်စေပါတယ်။
ဒီအတွေ့အကြုံကို ရစေချင်လွန်းလို့ ကလောမြို့အတွင်းက သီးသန့်ဆန်တဲ့နေရာရှိနေတဲ့ Hazondale Retreats မှ အချိန်အတိုင်းတာတခုအတွက် အထူးစျေးနှုန်းလေးတွေနဲ့ ဖိတ်ခေါ်ပါရစေ။
ဒီ Promotion လေးကို “Monsoon Drizzling Deals” လို့အမည်ပေးထားပြီး ဧည့်သည်တော်များအနေဖြင့် ထူးထူးခြားခြား ၂၅% အထိ သက်သာခွင့်ရမှာဖြစ်ပါတယ်။ Promotion မှာအပိုင်း ၂ ပိုင်းရှိပြီး. Monsoon Drizzling Deals အနေဖြင့် ၁၀% နဲ့ Activity-based promotions အနေဖြင့် ၁၅% ကိုထပ်မံခံစားနိုင်ပါတယ်။ ဒါဆိုရင် အတော်သက်သာသွားပါပြီ။ နောက်ပြီး Hazondale ကမြို့တွင်း အထက်ကရ နေရာတွေနဲံ နာမည်ကြီး Café စားသောက်ဆိုင်တချို့ကို လမ်းလျှောက်ရုံဘဲဆိုတော့ အသုံးစရိတ်ခြွေတာနိုင်သလို ကလောရဲ့ စစ်မှန်တဲ့ ထိတွေ့ခံစားမှု (Authentic Kalaw Vibe) ကို အိမ်ရဲ့ပတ်ဝန်းကျင်မှာပင် ရရှိနိုင်တာကြောင့် လည်ပတ်ဖို့မဟုတ်ဘဲ၊ သက်သက် အနားယူလိုသူများအတွက်လည်း သင့်တော်ပါတယ်။
ခြံကျယ်ကြီးထဲမှာ မိသားစုလိုက်၊ အဖွဲ့လိုက် လွတ်လပ်စာနေထိုင်နိုင်ပြီး ချက်ပြုတ်စားသောက်ဖို့ အစုံထည့်ပေးထားပါတယ်။ အခုဆို လျှပ်စစ်မီးကလည်း အပြည့်လိုရနေတာမို့ အပူပင်ကင်းစွာ အနားယူနိုင်ပါတယ်။ WIFI အမြဲရပြီး Mobile Phone အားလုံးမိပါတယ်။
ပုံမှန်စျေးနှုန်းနဲ့ Promotion ပေးထားတာကတော့ -
• ၁ မှ ၂ ယောက် - ၁၂၀,၀၀၀ကျပ် (၉၀,၀၀၀ကျပ်အထိလျှော့စျေး**)
• ၃ မှ ၄ ယောက် - ၁၅၀,၀၀၀ကျပ် (၁၁၂,၅၀၀ကျပ်အထိလျှော့စျေး**)
• Extra Person - ၂၅,၀၀၀ကျပ် (လူပိုအတွက် Discount မရှိပါ)
** ၁၀% ‘Monson Drizzle Deals’ Discount နှင့် ‘Activity-Based’ Discount အတွက် ဧည့်သည်များကိုယ်တိုင်ပါဝင်လုပ်ဆောင်သည့် အတွက် ၁၅% Discount ၂ ခုပေါင်းဖြစ်ပါသည်။ Activity-based အတွက်လုပ်ဆောင်ပုံကို ဧည့်သည်များအား အသေးစိတ်ထပ်မံရှင်းပြပေးပါမည်။
Hazondale Retreats မှာ ဧည့်သည် ၄ ယောက်အတွက် အိပ်ခန်း ၂ ခန်း၊ ရေချိုးခန်း/အိမ်သာ ၂ ခန်း ရှိပါသည်။ လူပိုအတွက် ၂ ဦး အများဆုံးလက်ခံနိုင်ပြီး Queen-sized Sofa-bed ကိုအသုံးပြုရမည်ဖြစ်ပါသည်။
နောက်ထပ်သတင်းကောင်းကတော့ ဧည့်သည်တော်များ ကလောမြို့သို့ စောရောက်သည် ဖြစ်စေ၊ နောက်ကျမှထွက်ခွါရန်ဖြစ်စေ၊ Hazondale Retreats မှ နောက်ဝင်မည့်ဧည့်သည် အခြေအနေပေါ်မူတည်၍ Early Check-in အား မနက် (၇:၀၀ နာရီ) မှ လည်းကောင်း၊ Late Checkout အား နေ့လည် (၂:၀၀ နာရီ) အထိလည်းကောင်း အပိုငွေကောက်ခံခြင်းမရှိဘဲ ဝန်ဆောင်မှုပေးသွားမည် ဖြစ်ပါသည်။ အခြေအနေအရ အဆင်ပြေစေရန်လုပ်ဆောင်ပေးခြင်းဖြစ်၍ ဧည့်သည်တိုင်း ရရှိနိုင်မည်ဟု အာမ မခံနိုင်တာကို နားလည်ပေးစေလိုပါတယ်။
အားလုံးအသေးစိတ် တခါတည်းဖော်ပြဖို့ ခက်ခဲတာကြောင့် သိလိုတာများအား Page Messenger မှ ဖြစ်စေ၊ ဖုန်းဆက်ခေါ်ဆို၍ ဖြစ်စေ မေးမြန်းပေးပါနော်။
🗒Promotion Period ကတော့ July 01 မှ August 04 အထိဖြစ်ပါတယ်။
မကြာမှီ ကလောမြို့လေးမှာ ဆုံကြရအောင်။
ချစ်ခြင်းအားဖြင့်
Hazondale Retreats