12/03/2023
🇨🇦 કેનેડા 🇨🇦 જવાની ઉતાવળમાં છેતરાતા નહીં, ફ્રોડ કન્સલ્ટન્ટને કઈ રીતે ઓળખશો?
Canada immigration: આજકાલ કેનેડા જવાનો જબરો ક્રેઝ જોવા મળી રહ્યો છે. કેનેડાએ વીઝા પ્રોસેસ સરળ કર્યા પછી ત્યાંના વીઝા માટે લાઈનો લાગી રહી છે. ગુજરાતમાંથી તો કેનેડા જનારાનો રાફડો ફાટ્યો છે. કેનેડા માટે હાલમાં જે પડાપડી જોવા મળી રહી છે તેનો કેટલાક લેભાગૂ તત્વો લાભ પણ લઈ રહ્યા છે. કેનેડાના વીઝાની પ્રોસેસ માટે કોઈપણ કન્સલ્ટન્ટની મદદ લેતા પહેલા તે ફ્રોડ તો નથી ને તે જાણી લેવું ઘણું જરૂરી છે. તેના માટે અમે તમને અહીં કેટલીક ટિપ્સ આપી રહ્યા છીએ.
કેનેડા હાલમાં ભારતીયો માટે ફેવરેટ દેશ બની ગયો છે. અત્યારે ખાસ કરીને ગુજરાતમાં તો કેનેડા જવા માટે લાઈનો લાગી રહી છે. હાલમાં કેનેડા માટે સરળતાથી વીઝા મળી જતા હોવાથી આ સ્થિતિ જોવા મળી રહી છે. જોકે, કેનેડાના વીઝાના નામે ફ્રોડની પણ ઘણી ઘટનાઓ પણ સામે આવી છે. ત્યારે કેનેડા જવા ઈચ્છતા લોકોએ છેતરપિંડીથી બચવા શું કરવું તેના માટે કેટલીક બાબતો ખાસ ધ્યાન રાખવી જરૂરી છે. કેનેડાની સરકારે પણ તે અંગે પોતાની વેબસાઈટ પર વિસ્તારપૂર્વક માહિતી આપેલી છે. કેનેડા માટે વીઝા પ્રોસેસ કરતા પહેલા એ માહિતી જાણી લેશો તો મોટી છેતરપિંડી અને આર્થિક નુકસાનથી બચી જશો.
વીઝા પ્રોસેસ માટે કેનેડામાં રહેતા ઓળખીતાની મદદ લો
કેનેડાના વીઝા માટે પ્રોસેસ કરવામાં ત્યાં રહેતા તમારા પરિવારના સભ્ય કે વિશ્વાસાત્ર મિત્રની મદદ લો એ જ સૌથી સારો રસ્તો છે. તે કોઈ રૂપિયા લીધા વિના પ્રતિનિધિ તરીકે તમારી અરજી કરવામાં મદદ કરી શકે છે.
ઈમિગ્રેશન એજન્ટ માન્યતા પ્રાપ્ત છે કે નહીં તેની તપાસ કરો
જો તમે કોઈ ઈમિગ્રેશન એજન્ટની મદદથી કેનેડાના વીઝાની પ્રોસેસ કરી રહ્યા છો તો એ એજન્ટ કેનેડાની સરકાર દ્વારા માન્યતા પ્રાપ્ત છે કે નહીં તેની તપાસ કરો. કેનેડા સરકારની વેબસાઈટ (www.canada.ca) પર અપાયેલી માહિતી મુજબ,કેનેડામાં ઈમિગ્રેશન વીઝા કે રહેવા માટે કોઈપણ પ્રકારના વીઝા માટે તમે કેનેડિયન ઈમિગ્રેશન વકીલ, ક્યુબેક નોટરી કે પછી ઈમિગ્રેશન કન્સલ્ટન્ટ્સ ઓફ કેનેડા રેગ્યુલેટરી કાઉન્સિલ (ICCRC- https://iccrc-crcic.ca/fraud-prevention/)ના લાઈસન્સ્ડ એજન્ટનો સંપર્ક કરી શકો છો. આ લોકો સર્ટિફાઈડ અને લાઈસન્સ ધરાવતા હોય છે અને તેમને કેનેડા ઈમિગ્રેશન માટે ટ્રેનિંગ અપાયેલી હોય છે. આઈસીસીઆરસી રેગ્યુલેટરી ઓથોરિટી છે, જેને ઈમિગ્રેશન કન્સલ્ટન્ટની સેવા લેનારા ગ્રાહકોની સુરક્ષા માટે કેનેડાની સરકારે સ્થાપિત કરી છે.
આઈસીસીઆરસીની વેબસાઈટ પર ફ્રોડ સાથે સંલગ્ન નિયમોને જોશો તો જાણવા મળશે કે, કેનેડા સરકારના કોઈપણ રિપ્રેઝન્ટેશન માટે આ ત્રણમાંથી કોઈ એકનું એસોસિએટ્સ હોવું જરૂરી છે. કોઈ ભારતીય તેના માટે ડાયરેક્ટ પ્રેઝન્ટેશન કરી શકે નહીં. નિયમ કહે છે કે, જો કોઈ ભારતમાં ઈમિગ્રેશન કન્સલ્ટન્સીનું કામ કરે છે, તો તેણે ઉપરોક્ત ત્રણમાંથી કોઈ એક સાથે જોડાયેલા હોવું જરૂરી છે.
જો ઈમિગ્રેશન એજન્ટ રૂપિયા લેતો હોય તો આ બાબત તપાસો
જો તમે એક ઈમિગ્રેશન એજન્ટ (સલાહકાર, વકીલ કે ક્યુબેક નોટરી) કન્સલ્ટન્ટને તેની સેવાઓ માટે રૂપિયા આપો છો, તો તે પેઈડ કન્સલ્ટન્ટ છે અને તેના માટે તેનું માન્યતાપ્રાપ્ત હોવું ફરજિયાત છે.
કોઈ વ્યક્તિ ICCRCનો સભ્ય છે કે નહીં તે કઈ રીતે જાણશો
આઈસીસીઆરસીની વેબસાઈટ પર તમે લાઈસન્સ પ્રાપ્ત કન્સલ્ટન્ટને તેમના નામ, ઉપનામ, ઓફિસના એડ્રેસ કે રજિસ્ટ્રી ક્રમાંકનો ઉપયોગ કરી શોધી શકો છો. અહીં ( https://iccrc-crcic.ca/find-a-professional/) તમે એ પણ જોઈ શકશો કે એ કન્સલ્ટન્ટ સામે ભૂતકાળમાં કોઈ કાયદાકીય કાર્યવાહી થઈ છે કે નહીં. કેનેડાના ઈમિગ્રેશન વકીલ તેઓ જે પ્રાંતમાં રહેતા હોય તેની લૉ સોસાયટીના સભ્ય હોય છે, જેમ કે, લૉ સોસાયટી ઓફ ઓંટારિયો કે બ્રિટિશ કોલંબિયા. તમારે માત્ર એ તપાસવાનું છે કે ,શું કન્સલ્ટન્ટ કે ઈમિગ્રેશન વકીલ પાસે લાઈસન્સ છે કે નહીં? જો તમને કોઈ કન્સલ્ટન્ટ કે ઈમિગ્રેશન વકીલ પોતાનો લૉ સોસાયટી નંબર કે ICCRC નંબર આપવાની ના પાડે તો સમજી લેવું કે તેની પાસે લાઈસન્સ નથી.
અરજી મંજૂર થવા પર જ રૂપિયા લેવા- નિશ્ચિત રીતે નકલી છે
કેનેડા રેગ્યુલેટરી કાઉન્સિલ (ICCRC)ના ઈમિગ્રેશન કન્સલ્ટન્ટ્સ દ્વારા રેગ્યુલેટેડ ઈમિગ્રેશન કન્સલ્ટન્ટને ખાસ કરીને આકસ્મિક આધાર પર બિલિંગની મંજૂરી નથી અપાતી. તેનો અર્થ છે કે, વીઝા અરજી મંજૂર થવા પર કોઈ ચાર્જ લેવાનો હોતો નથી. જો કોઈ આવો ચાર્જ લઈ રહ્યું છે તો સમજી લેવું કે તે આઈસીસીઆરસીના નિયમોને તોડી રહ્યું છે અને પ્રામાણિક નથી કે પછી તે આઈસીસીઆરસીનો સભ્ય નથી.
કન્સલ્ટન્ટ અંગે આ બાબતો પણ જાણી લેજો
રિટેનર એગ્રીમેન્ટ પર સહી કરતા પહેલા અને પ્રક્રિયા શરૂ કરતા પહેલા તમારી પાસે તમારા કન્સલ્ટન્ટ અંગે બધી જાણકારી હોવી જોઈએ, જેમાં કન્સલ્ટન્ટનું પુરું નામ, કાર્યાલયનું સરનામું, ફોન નંબર અને ઈમેલ સહિત સંપર્કની જાણકારી, આઈસીસીઆરસી કે લૉ સોસાયટીનો રજિસ્ટર નંબર. ઉપરાંત તમારો કન્સલ્ટન્ટ તમારા ઈમેલ કે ફોન કોલનો કેટલો જલદી જવાબ આપશે તે અંગે પહેલેથી જ ચર્ચા કરી લેજો. સામાન્ય રીતે 24થી 48 કલાકમાં જવાબ આપવાની સામાન્ય સમય મર્યાદા છે. તમારો કન્સલ્ટન્ટ કોણ છે, તેનો સંપર્ક કઈ રીતે કરવો, અરજી પ્રક્રિયા કેવી હશે તે અંગે બધી માહિતી મેળવી લેવી.
કન્સલ્ટન્સીની શરતો અને સેવા અંગે કોન્ટ્રાક્ટમાં સ્પષ્ટતા જરૂરી
કેનેડિયન રેગ્યુલેટેડ ઈમિગ્રશન કેન્સલ્ટન્ટ્સ અને કેનેડિયન ઈમિગ્રેશ વકીલોએ પોતાના ગ્રાહકોની સાથે એક કોન્ટ્રાક્ટ પર સહી કરવાની હોય છે જેથી તેમને ઈમિગ્રેશન સેવા આપી શકાય. આ કોન્ટ્રાક્ટમાં કન્સલ્ટન્ટના સંપર્ક અંગેની જાણકારી, આપવામાં આવનારી સેવાઓની યાદી, ફીના પ્રકાર અને કેટલા રૂપિયા થશે તેની વિગત, રૂપિયા ક્યારે ભરવાના રહેશે તેની વિગત, જો કન્સલ્ટન્ટ સાથે કોઈ મતભેદ થાય તો શું કરવું તેની જાણકારી, આઈસીસીઆરસી કે લૉ સોસાયટીનો સંપર્ક કરી કન્સલ્ટન્ટ સામે ફરિયાદ કઈ રીતે કરવી તેની માહિતી હોવી જરૂરી છે. આ કોન્ટ્રાક્ટ (જેને રિટેનર એગ્રિમેન્ટ કહેવાય છે) તમારી સહી હોય તે પછી જ એક પ્રોફેશનલ ઈમિગ્રેશન સલાહકાર કે વકીલ તમારી વીઝા પ્રોસેસમાં મદદ માટે આગળ વધવો જોઈએ. જો કોન્ટ્રાક્ટ પર તમને સહી કરવા કહેવામાં નથી આવતું, તો તે વ્યક્તિ કાં તો એક લાઈસન્સ પ્રાપ્ત પ્રોફેશનલ નથી કે પછી તે નિયમો તોડી રહ્યો છે.
વીઝાની ગેરન્ટી આપનારનો વિશ્વાસ ન કરો
એ વાતનું ખાસ ધ્યાન રાખો કે કોઈપણ કન્સલ્ટન્ટ વીઝાની ગેરન્ટી આપી શકતો નથી. જો કોઈ તમને એવું કહી રહ્યું હોય કે તે તમારા વીઝા મંજૂર કરાવી દેવાની કે જલદી કરાવી આપવાની ગેરંટી આપી રહ્યો છે તો તેના પર આંધળો વિશ્વાસ ન મૂકવો.
The Government of Canada website is a single point of access to all programs, services, departments, ministries and organizations of the Government of Canada.
